Proverbs 14 - De Beebaa Dabu

¹ De hine heiangi e hagaduu age dono hale, aagai de hine lodo senga e oha iho dono hale.

² Tangada e hai hegau laa i de mee abodonu e madagu i Tagi Maolunga, aagai tangada e hai hegau laa i de hagasenga e hagangadi mee ia.

³ Muna a tangada lodo senga e bei de laagau e hagailiili ai laa tua, aagai muna a de gau heiangi e buibui gilaadeu.

⁴ Noo e deai donu kaau, gai de mommee o denga manu gu ngadi dagodo; aagai mahi o denga kaau e hai ga lagolago hua manu.

⁵ Tangada tala hagadonu i de mee abodonu e dee hadu muna i de masavaa e hagamodu ai muna, aagai tangada tala hagadonu hadu muna e tala muna hhadu.

⁶ Tangada doo mee e ssala de heiangi, gai e dee gidee e ia, aagai de iloo mee e hai ngaohie ange gi tangada e donu ange laa.

⁷ Hagaui gee mai i tangada lodo senga, go hiidinga koe e dee maua de iloo mee i ana muna e tala.

⁸ Tangada maanetonu e heiangi i de hagasaele dono haiava e hano ai, aagai de gau llodo ssenga e hagasengalia donu.

⁹ De gau llodo ssenga e hakadanga i de hagaheohi o haisala, aagai gilaadeu e heohi e kave naa de abodonu.

¹⁰ Tangada e donu iho gi dagodo de daemaha ono lodo, gai e deai hogi se dangada e iloo dagodo o dono malangilangi.

¹¹ De hale o tangada baubau e oha naa ga maoha, aagai de hale malo o tangada heohi e hagadagadaga ange naa.

¹² E dahi haiava e dulagi be go de haiava heohi ange gi tangada, aagai e hano ga duu ange gi de magau.

¹³ Ga gadagada naa donu tangada, gai ono lodo e mmae donu, gai de malangilangi e sui naa donu ga se lodo baubau.

¹⁴ Tangada e huli gee laa i de mee heohi e kave naa donu de hagaoanga o ana hegau, gai tangada danuaa e kave naa hogi de hagaoanga o ana hegau.

¹⁵ Tangada senga e hagadonusia mee alodahi, aagai tangada maanetonu e dagitilo dono hai e seesee ai.

¹⁶ Tangada heiangi e madagu i Tagi Maolunga, ma de kino i de baubau, aagai tangada lodo senga e lodo maolunga ma de vaivai hai hegau.

¹⁷ Tangada e moolau laa de lili e hai hegau i de lodo senga, gai dangada e kino i tangada e haia hagasaele baubau.

¹⁸ De gau llodo ssenga e kave de lodo senga, aagai de gau maanetonu e kave naa de iloo mee.

¹⁹ De gau baubau e ino naa gi lalo i mada i mua o de gau danuaa, gai de gau baubau e ino naa gi lalo i gaogao haitoga o tangada heohi.

²⁰ Dangada e paa ange gi tangada hagaau aloha e kino donu hogi i de ia, aagai tangada lava e soa dangada e hai soa ange gi de ia.

²¹ Tangada e hagangadi mee ina tangada e baa ange gi de ia e haisala donu, aagai e manuuia tangada e abodonu ange gi gilaadeu e duasala.

²² Dangada e haia hagatau baubau e haisala donu, aagai gilaadeu e haia hagatau danuaa, e kave de abodonu ma de mee abodonu.

²³ Hegau alodahi e hanu donu mee e maua ai, aagai denga ngadi muna e hai ga hagaau aloha tangada.

²⁴ De lava o de gau heiangi go de hau i honga olaadeu biho, aagai de llodo ssenga o de gau llodo ssenga e hagaago mai de lodo senga.

²⁵ Tangada tala hagadonu i de muna abodonu e hagaola mouli o dangada, aagai tangada tala hagadonu hadu muna e daahanga dangada.

²⁶ Tangada e madagu laa i Tagi Maolunga e lodo mmahi, gai se buibui ange gi ana dama.

²⁷ De madagu i Tagi Maolunga go de vai o de mouli, gai e hagaui gee tangada mai i de magau.

²⁸ Dangada soa mmao go de mahamaha o de hodooligi, aagai tagi o de henua e dee sula donu noo e deai dangada e hagallongo ange gi de ia.

²⁹ Tangada e dee moolau laa de lili se dangada e laumalie dono donu, aagai tangada e moolau laa de lili e hagaago mai dono lodo senga.

³⁰ De baba i lodo o tangada e hai ga mmahi de angaanga, aagai de lodo gaiaa e hai ga pobo ivi o tangada.

³¹ Tangada e vaivai haia laa tangada hagaau aloha e hagangadi mee de ia ne haia gilaau, aagai be goai e abodonu ange gi gilaadeu e duasala e hagadubu de Maadua.

³² Tangada baubau e hagaduasala donu huu i ana hegau baubau, aagai tangada heohi e dahi donu ono buibui i de masavaa o de magau.

³³ De heiangi e dagodo i daho tangada e donu ange laa, gai e dee maleva donu i lodo o tangada senga.

³⁴ De mee heohi e hai ga maolunga dahi henua, aagai de haisala e hagadookaa dangada.

³⁵ De hodooligi e malangilangi i tangada hai hegau heiangi, aagai tangada hai hegau hagadookaa dangada e hagaduasala naa i dono bole.