Proverbs 13 - De Beebaa Dabu

¹ Tama daane heiangi e hagallongo agoago a dono damana, aagai tama hagamanege e hagangadi mee dono hagaseegina.

² Muna a tangada e hai ia ga gai mee danuaa, aagai mee o de gau haisala e llodo ai go de alasala.

³ Tangada e kana ange laa gi ana muna e tala, e hagaloosi dono mouli, aagai tangada e lagolago laa ana muna e tala, e duu ange donu gi de hagaduasala.

⁴ Tangada vaiduu e lodo gi mee, gai e deai donu ana mee e mau, aagai tangada hai hegau e maua mee alodahi oona e lodo ai.

⁵ Tangada heohi e kino i de tala muna hadu, aagai hegau a tangada baubau e hagadookaa ma de hagangadi mee ina.

⁶ De mee heohi e hagaloosi tangada e dee haisala, aagai de baubau e hai gi dee sula tangada baubau.

⁷ Dahi dangada e hai bolo ia se dangada lava, aagai e deai donu ana mee; gai dahi e hai bolo ia e hagaau aloha, aagai e lagolago donu ono goloa.

⁸ De lava o dahi dangada e maua i de hagaola dono mouli, aagai e deai donu dangada e hagamadagu ina tangada hagaau aloha.

⁹ De maalama o tangada heohi e maalama mmao, aagai de laama a tangada baubau e diinei naa donu.

¹⁰ De hagamaolunga e hidi mai ai de hagadaumee, aagai de heiangi e gidee i daho dangada e gaavee muna bale.

¹¹ De lava e maua laa i de hadu muna e moolau donu de odi, aagai de lava e hagabudu dagi de momo laa e hagadagadaga age donu.

¹² Noo de tali hagalodolodo a tangada tee sula, gai ono lodo e daemaha, aagai de hai ga ssula lodo o tangada e bei de manu somo o de mouli.

¹³ Tangada e hagangadi mee ina laa muna bale e hagaduasala donu; aagai tangada e hagadubu ina denga hainga e kave naa dono hagaoanga.

¹⁴ Agoago a tangada heiangi e bei de vai o de mouli, e hagaui gee ina laa tangada mai i de magau.

¹⁵ De heiangi e hai ga hagadubu ina tangada, aagai de haiava o tangada e dee hai hegau laa i de mee abodonu e hai ngadaa.

¹⁶ De gau maanetonu alodahi e hai hegau i de iloo mee, aagai hegau a tangada lodo senga e hagaago mai dono lodo senga.

¹⁷ Tangada hagailoo baubau e duu ange naa gi de hai ngadaa, aagai tangada hagailoo e hai hegau laa i de mee abodonu e hagaheloongoi dangada.

¹⁸ Tangada e dee anga ange laa gi muna bale e hagaau aloha ma de hagadogaa ina, aagai tangada e hagalaangona laa muna hagaheohi e maua de hagadubu.

¹⁹ E hagamalangilangi de hai ga bei lodo o tangada, aagai tangada lodo senga e dee lodo e hano gee mai i de baubau.

²⁰ Tangada e daudali ange i de gau heiangi e hagadaga ange naa de heiangi, aagai tangada e hagabuni ange gi de gau llodo ssenga e hagaduasala donu.

²¹ De hai ngadaa e daudali ange i de gau haisala, aagai de hagaoanga o olaadeu e heohi go tanuaa.

²² Tangada danuaa e bolo ange dahi mee gi ono mogobuna, aagai de lava o tangada baubau e doange moo tangada heohi.

²³ De gelegele o tangada hagaau aloha tigi doo laa e maua donu gi lagolago hua iai, aagai e gaavee gee naa i de gau vaivai daakodo.

²⁴ Tangada e daohia de laagau haaele, e kino i dana dama, aagai tangada e aloha laa i dana dama, e kana ange ga haele ia.

²⁵ Tangada heohi e gaimee ga bosu danuaa, aagai lo te dinae o tangada baubau e hiigai i masavaa alodahi.