Proverbs 12 - De Beebaa Dabu

¹ Be goai e malangilangi i dono haelea, e lodo hogi i de iloo mee, aagai tangada e kino i dono hagaheohi ange, se dangada senga.

² Tagi Maolunga e abodonu ange gi tangada danuaa, aagai Tagi Maolunga e hagabaubau tangada e haia hagasaele baubau.

³ Tangada e dee maua gi noho baba i dana hai de baubau, aagai dangada heohi e dee maua donu gi unuunusia age olaadeu aga.

⁴ De hine danuaa e bei de hau mahamaha i honga de biho o dono bodu, aagai de hine hagadogaa dangada e bei de mee e haia laa ga pobo ono ivi.

⁵ Maanadu a de gau heohi e heohi, aagai hagasaele a de gau baubau e daahanga dangada.

⁶ Muna a de gau baubau e daa gilaadeu ga magau, aagai muna a dangada e hai hegau i de heohi e hagaola dangada.

⁷ De gau baubau e hagadee kii ina naa donu ma de llilo, aagai de huaabodu o olaadeu e heohi e duudagi naa donu huu.

⁸ Dangada e tuhi tangada maanetonu, aagai dangada e kino i tangada maanadu baubau.

⁹ E danuaa ange noo koe se dangada e dee dau, gai e dahi oo dangada hai hegau, i dau tala bolo koe se dangada e dau, gai e deai donu au gai.

¹⁰ Tangada heohi e tilo danuaa ange ana manu dolodolo, aagai de lodo aloha o de gau baubau e vaivai hai dangada.

¹¹ Tangada e dooa dono alahenua e lagolago ana gai, aagai tangada e dolohia saele mee e deai haigamaiana se dangada senga.

¹² Tangada baubau e lodo i goloa o dangada e haia de baubau, aagai tagelo o tangada heohi e hai gi duu ia gi makaga ma de hua lagolago.

¹³ Tangada baubau e hagahaisala donu huu i ana muna e tala, aagai tangada heohi e ola mai naa i de hai ngadaa.

¹⁴ Muna a tangada e hagadanuaa naa ia i mee danuaa; hegau a tangada e hagadanuaa naa donu huu ia.

¹⁵ Tangada lodo senga e maanadu bolo ana hegau e heohi donu, aagai tangada heiangi e hagallongo denga muna bale.

¹⁶ Tangada lodo senga e moolau donu de hagaago mai dono lili, aagai tangada maanetonu e dee anga ange gi muna hagadookaa.

¹⁷ Tangada e daalaa laa de mee heohi e hai ga sula mai de muna abodonu, aagai tangada hagadonu hadu muna e tala de muna hagasenga.

¹⁸ Muna aau e tala i mua dau maanadu e velo lodo o tangada bei de gadilaasa kangi, aagai muna a tangada heiangi e hagaieiangi tangada.

¹⁹ De muna abodonu e dagodo ga hano ai, aagai denga muna hhadu e dagodo donu i dahi masavaa bodobodo.

²⁰ De daahanga dangada e dagodo i lodo dangada e hagatau ina de hai de baubau, aagai gilaadeu e haia laa gi sula de nnoho paba e malangilangi.

²¹ E deai donu se hai ngadaa e duu ange gi gilaadeu e heohi, gai de gau baubau e lagolago donu olaadeu hai ngadaa.

²² Tagi Maolunga e kino i de gau hadu muna, aagai ia e malangilangi i dangada e hai hegau i de mee abodonu.

²³ Tangada maanetonu e dee tala ange gi dangada dana mee e iloo, aagai de gau llodo ssenga e hagaago mai donu delaadeu llodo ssenga.

²⁴ Tangada hai mee e sula naa ga dagi, gai tangada vaiduu e hai naa ga se dangada hai hegau.

²⁵ Tangada e manavasaa laa ono lodo e lodo baubau, aagai muna danuaa e hagamaamaane ono lodo.

²⁶ Tangada heohi e hagakana ange dono soa, aagai de haiava o de gau baubau e dagi gee gilaadeu.

²⁷ Tangada vaiduu e dee maua i de dunu i honga de ahi dana manu ne mau, aagai tangada hai hegau e kave naa goloa hagamogomogo.

²⁸ De haiava heohi go de mouli donu, gai e deai donu se magau i lo te haiava nei.