Proverbs 11 - De Beebaa Dabu

¹ Tagi Maolunga e kino i de mee hagahidi hagasenga, aagai e malangilangi i de mee hagahidi e heohi abodonu.

² De sula age o de lodo maolunga e gaamai naa hogi de hagadogaa, aagai de lodo maolalo e humai naa hogi madali de heiangi.

³ De hai hegau i de mee abodonu e dagi gilaadeu e hai hegau ai, aagai dangada e dee hai hegau laa i de mee abodonu e maakau naa donu i delaadeu hadu muna.

⁴ Goloa lagolago e deai ono haigamaiana i de laangi o de bole, aagai de mee heohi e hagaola tangada mai i de magau.

⁵ De heohi o olaadeu e dee haisala e hai gi soe delaadeu haiava, aagai dangada baubau e magau i hiidinga delaadeu baubau.

⁶ De heohi o olaadeu e heohi e hagaola gilaadeu, aagai gilaadeu e dee hai hegau i de mee abodonu e noodia naa i olaadeu llodo dee heohi.

⁷ De masavaa naa huu o tangada baubau e magau ai, gai dana tali e lilo hogi; gai dana tali ange gi ono mahi e lilo hogi.

⁸ Tangada heohi e ola mai naa i de hai ngadaa, aagai tangada baubau e duu ange naa donu aagena.

⁹ De ngudu o tangada baubau e hagaduasala tangada e paa ange gi de ia, aagai de iloo mee e hai naa ga ola gilaadeu e heohi.

¹⁰ De masavaa naa huu o dangada heohi e hagadagadaga age ai, gai dangada i de aduhale gu malangilangi, gai de masavaa naa huu o dangada baubau e maakau ai, gai dangada gu kona de malangilangi.

¹¹ De manuuia o olaadeu e heohi e hai ga hagadagadaga age de aduhale, aagai muna a de gau baubau e oha de aduhale.

¹² Tangada lodo senga e hagangadi mee tangada e baa ange gi de ia, aagai tangada e donu ange e hagapuni dono ngudu.

¹³ Tangada hai samu e tala mee e dee tala, aagai tangada e hai hegau laa i de mee abodonu e daohi de mee e dee alaange de tala.

¹⁴ Noo e deai se muna e bale ai, gai de huaadangada e maakau donu; aagai noo e soa de gau hagasaele, gai dangada e kii donu.

¹⁵ Tangada e hagatoo donu laa bolo ia e hagao muli a dahi dangada gee e duasala donu, aagai tangada e dee hagatoo donu laa i de mee nei e noho baba.

¹⁶ Dangada e hagadubu de hine abodonu, aagai de gau alasala go de lava donu huu alaadeu e mau.

¹⁷ Hegau a tangada abodonu e hai donu ga danuaa ange gi de ia, aagai tangada alasala e hagabaubau donu huu ia.

¹⁸ Tangada baubau e kave denga hagaoanga hagasenga, aagai tangada e hai hegau laa i de mee heohi, e kave donu de hagaoanga abodonu.

¹⁹ Tangada e hagaduu ngae laa i de mee heohi e mouli, aagai tangada e hagaduu ngae laa i de baubau e magau donu.

²⁰ Tagi Maolunga e kino i de gau maanadu baubau, aagai e malangilangi i gilaadeu e dee haisala olaadeu dagodo.

²¹ Ni muna abodonu, tangada baubau e dee haihai naa donu ga dee hagaduasala, aagai dangada heohi e ilaage naa.

²² De hine mahamaha e dee maua laa i de hilihili de mee heohi, e bei de buulei goolo i de usu o de biigi

²³ De mee o tangada heohi e lodo ai e sula mai ai naa tanuaa, aagai de tali a tangada baubau e duu ange naa gi de bole.

²⁴ Dahi dangada e abodonu i de ngadi gaavange mee, aagai ia e kii ange naa donu de lagolago ana mee; tangada ange laa e daohi mee e heohi dana gaavange, aagai ia e hano naa donu ga hagaau aloha.

²⁵ Tangada e hagamanuuia ina laa dangada e hagadagadaga age; tangada e balea ange dangada, e kave naa hogi de bale.

²⁶ Dangada e hagamalaia tangada e daohia denga grain, aagai e hagamanuuia tangada e hagao ina gi daha ana grain.

²⁷ Tangada e hagammahi laa e ssala tanuaa e maua naa de abodonu, aagai de baubau e ahe ange naa gi tangada e saalaa de baubau.

²⁸ Be goai e tali hagalodolodo ange gi dono lava e hagadaga iho naa, aagai dangada heohi e bei naa de manu somo lau kohu.

²⁹ Tangada e hagahai ngadaa ina laa dono huaabodu, se ngadi madangi donu huu aana e kave, gai tangada lodo senga e hai hegau ange naa gi tangada heiangi.

³⁰ Hua o de heohi go de manu somo o de mouli; gai tangada heiangi e maua e ia lodo o dangada.

³¹ Noo tangada heohi e kave de hagaoanga o ana hegau i henua i lalo, gai e kii ange naa de kave hagaoanga o tangada baubau ma tangada haisala.