Proverbs 10 - De Beebaa Dabu

Muna hagasengasenga a Solomon

¹ Muna hagasengasenga a Solomon. Tama daane heiangi e hagamalangilangi dono damana, aagai tama lodo senga, e hagadaemaha dono dinana.

² Goloa hagamogomogo e maua laa i de mee dee heohi e deai donu ono haigamaiana, aagai de mee heohi e hagaola mai i de magau.

³ Tagi Maolunga e dee dugu ange tangada heohi gi hiigai, aagai ia e hai gi dee maua e tangada baubau ono mee e lodo ai.

⁴ Tangada vaiduu e hagaau aloha donu, aagai tangada hai mee e sula naa ga se dangada lava.

⁵ Tangada e hagabudulia huamanu i de masavaa mahanahana se dama heiangi, aagai tangada e seni i de masavaa o de hagihagi, se dama hagadookaa dangada.

⁶ Denga manuuia e loomai gi tangada heohi, aagai de ngudu o tangada baubau e hagammuni dono alasala.

⁷ De hagamaanadu o tangada heohi se manuuia, aagai ingoo o de gau baubau e pobo naa ga llilo.

⁸ Tangada heiangi e daohi denga hainga, aagai tangada lodo senga vava de ngudu e dee hagadagadaga age donu.

⁹ Tangada e hai hegau laa i de mee abodonu e noho baba, aagai tangada e seesee laa i denga haiava dee heohi e gidee mai naa ono dagodo.

¹⁰ Tangada e hagadabadaba laa luoono ganomada e hagadaemaha de lodo, gai tangada lodo senga e vava laa de ngudu e dee sula donu.

¹¹ De ngudu o tangada heohi e bei de vai hagamouli, aagai muna a tangada baubau e hagammuni dono alasala.

¹² De kino i dangada e hagahale tee buni o dangada, aagai de aloha e haoli denga haisala alodahi.

¹³ De heiangi e sula mai i lodo muna a tangada e donu ange, aagai de laagau se mee e hagaili ai tua o tangada dee donu.

¹⁴ De gau heiangi e ago gi kii ange delaadeu iloo mee, aagai muna a tangada lodo senga e hagahai ngadaa donu huu ia.

¹⁵ Goloa lagolago o tangada lava e bei de aduhale gu buibui laa ma gu makaga, aagai de hagaau aloha o tangada e hai ga dee hagadagadaga age ia.

¹⁶ De hagaoanga o tangada heohi go de mouli, aagai de hagaoanga o tangada baubau go de hagaduasala.

¹⁷ Tangada e hagalaangona laa muna hagaheohi e hagaago mai de haiava o de mouli, aagai tangada e dee anga ange gi muna hagaheohi e dagi ange dangada ange laa gi de haisala.

¹⁸ Tangada e hagamuunia laa dono kino se dangada donu hadu muna, gai be goai e hagadele ina muna hagabaubau se dangada lodo senga.

¹⁹ De masavaa naa huu aau e tala ai muna lagolago, gai koe e maua donu gi haisala, aagai tangada e maua i de daohi dono alelo se dangada heiangi.

²⁰ Muna a tangada heohi e bei denga selevaa danuaa, aagai lodo o tangada baubau e deai donu haigamaiana.

²¹ Muna a tangada heohi e bale ange dangada soa, aagai de gau llodo ssenga e maakau i hiidinga delaadeu ssenga.

²² De hagamanuuia a Tagi Maolunga e gaamai de lava, gai e deai donu se mee hagadaemaha iai.

²³ Tangada lodo senga e hakadanga i dahulinga baubau, aagai de heiangi se mee hagamalangilangi ange gi tangada e dahi ono donu ange.

²⁴ De mee o tangada baubau e madagu ai laa, e duu ange naa donu gi de ia, aagai de mee o tangada heohi e lodo ai e gaavange naa donu gi de ia.

²⁵ De gau baubau e gaavee gee naa i de masavaa e dau ai de madangi mmahi, aagai tangada heohi e duu ma e makaga ga hano ai.

²⁶ Denga vinegar e hai ga ssae denga niho, gai de useahi e hai ga tangi luu mada, gai e bei ai hogi dagodo o tangada vaiduu a dono dangada aamua e hai laa gi suuia ia.

²⁷ De madagu i Tagi Maolunga e hai ga daulooloa de mouli o tangada, aagai ngadau o de gau baubau e tuu mai naa gi sogoisi.

²⁸ De tali hagalodolodo a dangada e haia de mee heohi e hidi mai ai de malangilangi, aagai de tali a de gau baubau e lilo naa donu.

²⁹ Tagi Maolunga go mommee buibui makaga o tangada e haia de mee heohi, aagai e daa gi maakau gilaadeu e haia de baubau.

³⁰ Tangada heohi e dee hagangalue naa donu; aagai tangada baubau e dee noho naa i honga de henua.

³¹ Muna a tangada heohi e tala iai de heiangi, aagai tangada hadu muna e hai naa gi dee basa.

³² Tangada heohi e iloo be aahee muna e heohi ange gi dahi masavaa, aagai tangada baubau e tala donu denga muna hhadu.