Proverbs 1 - De Beebaa Dabu

Taamada o de iloo mee

¹ Muna hagasengasenga a Solomon, tama daane a David, de hodooligi o Israel:

² gi maua ai e dangada de heiangi ma dahulinga heohi; ma de tonu ange gi muna o de iloo mee;

³ gai gi maua ai muna hagaheohi ma de iloo mee, ma de hagamodu heohi, aama de hagahedae ai dangada;

⁴ e hai gi heiangi de gau llodo ssenga, ma de gaavange gi de gau mmodo de iloo mee aama de hilihili gi heohi —

⁵ tangada heiangi gi hagalaangona gi kii ange ai de lagolago ana mee e iloo, gai mee nei ga dagi ai tangada e donu ange aagena —

⁶ gi donu ange ai ia gi denga muna heiangi, aama muna hagasengasenga a de gau heiangi.

⁷ De madagu i Tagi Maolunga go taamada o de heiangi; aagai tangada lodo senga e kino i de heiangi ma agoago heohi.

Muna bale ange gi denga dama

⁸ Dagu dama, hagalaangona muna a doo damana e hagaheohi adu ai goe, gai aude dilia agoago a doo dinana.

⁹ Muna nei e bei de hau mahamaha i honga doo biho, aama sseini e dau laa i doo ua.

¹⁰ Dagu dama, noo de gau baubau e usuusu adu goe gi haia de baubau, aude hagallongo ange gi gilaadeu.

¹¹ Noo gilaadeu e hai adu, “Humai madali gimaadeu, gidaadeu ga tali e daa dahi dangada gi magau, gidaadeu ga daa gi magau tangada tigi haisala;

¹² gidaadeu ga hai gilaadeu gi bei dangada e loiho laa gi de mommee o de gau maakau, gilaadeu alodahi gi bei dagodo o dangada e loiho laa gi lo te geelonga o de gau maakau;

¹³ gidaadeu e maua naa denga hagadaagangaa goloa danuaa, e hhao ai lodo odaadeu hale gi hoohonu i goloa ne hai gi de mahi;

¹⁴ humai, dau madali gimaadeu, gai gidaadeu ga vaevae mee nei i odaadeu magavaa” —

¹⁵ dagu dama, aude hano madali gilaadeu, aude daudali ange i alaadeu hegau;

¹⁶ go hiidinga e moolau donu delaadeu hai de baubau, gai e moolau hogi delaadeu daa dangada ga maakau.

¹⁷ E deai haigamaiana de dugu dahi sele i de mommee a denga manu llele e gidee ai.

¹⁸ De gau bee nei e tali donu huu delaadeu maakau, gilaadeu e daa donu huu gilaadeu gi maakau.

¹⁹ Aanei hogi dagodo o dangada alodahi e haia ga lagolago olaadeu mee i de vaivai hai dangada; goloa bee nei e daa donu huu tangada ga magau.

Muna a de iloo mee e oo ma e tala

²⁰ De heiangi e oo i honga de haiava, ia e oo i mommee e hagabuni ai dangada;

²¹ ma ma te haiava e hagalongaa ai dangada, ma de basa i lodo haitoga o de aduhale, ga hagadaba:

²² “De gau llodo ssenga, dee hee maa taulooloa doodou llodo e daohi doodou llodo ssenga? Dee hee maa taulooloa doodou doo i mee, ma doodou kino i de heiangi?

²³ Goodou aanga mai gi agu muna hagaheohi; tilo, au e hai naa gi iloo e goodou ogu lodo, ga hai gi tonu ange goodou gi agu muna.

²⁴ Au ne hagahi goodou, gai goodou tee llodo e hagallongo agu muna; au ne haalo adu dogu lima gi goodou, gai teai se goodou ne anga mai;

²⁵ goodou ne hagangadi mee agu muna hagaheohi alodahi, gai goodou ne kino donu i agu muna ne hagasee ai goodou,

²⁶ deelaa ai, au e gadagada naa hogi i goodou i doodou masavaa e hai ngadaa ai; au e doo mee naa hogi i goodou, i doodou maatagu,

²⁷ ma de masavaa o de hai ngadaa e dae mai ai gi goodou, bei dagodo o de madangi mmahi, ma de hai ngadaa e humai ai bei dagodo o ssio, ma tuasala aama tee nnoho paba e tae mai ai gi goodou.

²⁸ Gai gilaadeu e hagahi mai naa au, aagai au e dee basa ange naa donu; gilaadeu e hagammahi naa e ssala gi gidee au, aagai gilaadeu e dee gidee naa donu au.

²⁹ Go hiidinga gilaadeu ne kino i de iloo mee, gilaadeu tee hai gi maatagu gilaadeu i Tagi Maolunga,

³⁰ gai ne kino i agu muna e bale ange ai gilaadeu, ma de hagangadi mee dagu hagasee gilaadeu,

³¹ gilaadeu e gai naa hua o alaadeu hegau, ma de boobosu i de gai hua o alaadeu hagatau.

³² Gai de daahuli gee o de gau llodo ssenga e daa gilaadeu ga maakau; gilaadeu e maakau naa donu, i delaadeu maanadu bolo gilaadeu e danuaa donu huu;

³³ aagai tangada e hagalaangona agu muna e noho baba ma de duadonu, e dee manavasaa ono lodo i de hai ngadaa.”