Philippians 3 - De Beebaa Dabu

De heohi abodonu

¹ Denga daina, aanei agu muna hagaodi: goodou malangilangi i hiidinga lodo o Tagi Maolunga! E dee hai ngadaa mai donu gi de au dagu ahe ange e sisi adu muna mau nei gi goodou, aagai se mee e buibui ai goodou.

² Goodou dagidiiloo denga gaaduu ma gilaadeu e haia de baubau, aama gilaadeu e duuduudia olaadeu angaanga.

³ I hiidinga go gidaadeu donu de tuu dagaholiage abodonu, gai e daumaha ange gi de Maadua i de hagasaalunga ma de malangilangi i taadeu buni ma Klisdo Iesu, gidaadeu e dee tali hagalodolodo ange gi mee e hai i de angaanga.

⁴ Gai noo tangada e hagadaba bolo ia e dahi ana tali ange gi mee e hai i de angaanga, gai au e kii ange donu de hanu hiidinga aagu e dahi ai agu tali ange gi mee bee nei:

⁵ au ne tuu dagaholiage i de hagavalu laangi i dua dogu haanau; au se dangada donu Israel, mai i de aamuli o Benjamin, gai ne haanau mai se dangada Hebrew, gai dagodo o de daohi de hainga, au se Pharisee;

⁶ dagodo o dogu lodo gaiaa; au ne vaivai hai de nohoanga dabu; gai tagelo o dogu heohi, go dagu daohi de hainga, au tee hagahaisala donu dahi hainga daudahi.

⁷ Aagai mee alodahi aagu ne mau i dagu hai i mee nei, gai au e hagabinga bolo ni ngadi mee donu i hiidinga o Klisdo.

⁸ Gai e dee deenei donu huu, gai au e hagabinga bolo mee alodahi ni ngadi mee donu, i hiidinga de hagamogomogo ange mmao dagu iloo Klisdo Iesu dogu Dagi Maolunga, gai go ono hiidinga aagu ne hagangadi mee ai mee alodahi. Au e hagabinga bolo mee nei e bei donu denga gainga, gi maua abodonu ai e au Klisdo,

⁹ ma de dau madali ia, gai e dee se heohi ne maua i dogu daudali i de hainga, aagai se heohi ne maua i dogu gai ange gi Klisdo — go de heohi mai i daho de Maadua ne maua laa i de gai,

¹⁰ gi maua ai e au i de iloo Klisdo, ma ssauaa ne hagamouli ina age laa ia, ma de hagauda denga hagaduasala madali ia, ma de magau bei ono dagodo,

¹¹ gai noo e maua gai au e maua hogi gi mouli age mai i de magau.

De houhou ange gi de hagaodi

¹² Au e dee tala adu bolo au gu maua donu de mee nei, aabe gu heohi abodonu ogu dagodo, aagai au e hagaduu ngae e hai gi maua e au i de kave de mee a Klisdo ne hai ai laa ngau gi niiana.

¹³ Denga daina, au e dee hai adu bolo au gu maua donu de hagaoanga nei, aagai dagu mee e hai go de hagangalo mee gu ui gi ogu dua, gai ga hagaduu ngae ange gi mee e daakodo mai i ogu mada i mua.

¹⁴ Au e hagaduu ngae e houhou ange gi maua e au de hagaoanga i de hagaodi, a de Maadua ne hagahi mai au gi gaavee madali Klisdo Iesu.

¹⁵ Deenei ai, gidaadeu alodahi gu maatua abodonu laa gi se lodo daudahi. Gai noo e hanu oodou mee e dee buni ai, gai go de Maadua e hagaagona adu gi goodou.

¹⁶ Gai gidaadeu ga duudagi hogi de daudali i mee odaadeu gu lava i de agoago ai.

¹⁷ Denga daina, goodou ago mai hogi i de au, ma de dagitilo ga ago ange i gilaadeu e mouli bei de hai amaadeu gu hagaago adu ai gi goodou.

¹⁸ Go hiidinga gu soa donu dangada ni hagadaumee niio de laagau lui o Klisdo i alaadeu hegau e hai. Gai gu lava donu i dagu tala adu gi goodou mee nei i mua, gai au e ahe ange hogi e tala adu gi goodou iainei ma de dangi.

¹⁹ Gai de hagaodi o de gau bee nei go de hagaduasala, delaadeu maadua go olaadeu dinae, gai gilaadeu e hagassoenga i denga mee hagadookaa, gai e maanadu donu huu mee o henua i lalo nei.

²⁰ Aagai gidaadeu, taadeu henua go de langi, go kilaa iai Iesu Klisdo Tagi Maolunga, gai gidaadeu e hagaduu ngae e tali dono ahe mai.

²¹ Gai ia ga sui ai odaadeu angaanga maolalo nei gi bei dagodo o dono angaanga mahamaha laa, i ssauaa ne haia laa ga maua e ia i de dagi mee alodahi.