Philippians 2 - De Beebaa Dabu

Gaavee de lodo maolalo o Klisdo

¹ Deenei ai, noo e dahi oodou llodo mmahi i daho Klisdo, be se hagaaneane i de aloha, be go de buni i lodo o de Hagasaalunga ⌊Dabu⌋, aabe go de lodo aloha ma de abodonu ange gi dangada,

² gai goodou haia gi honu abodonu dogu malangilangi, i de buni i oodou lodo, ma de buni i de aloha, ma de buni i de lodo ma de maanadu daudahi.

³ Goodou gi dee haia donu huu oodou mee e llodo ai aabe go de llodo maolunga, aagai goodou gi lodo maolalo ma de tala bolo de gau ange laa e danuaa ange i goodou.

⁴ Goodou gi dee dagidiiloo donu huu oodou mee e llodo ai, aagai dagidiiloo hogi mee o de gau ange laa e llodo ai.

⁵ Gai haia hogi gi dagodo de lodo nei i oodou lodo, go de lodo e dagodo laa i daho Klisdo Iesu:

⁶ ia go de Maadua donu, gai ia tee maanadu donu bolo dono bei dagodo de Maadua se mee e daohi,

⁷ aagai ia ne dugu mee laa alodahi, ga hai gu bei dagodo o tangada hai hegau, ma de haanau bei dagodo o dangada. De masavaa oona ne hai ai ga bei dagodo o dangada,

⁸ gai ia ne hagamaolalo ga dugu ange donu ia e daa gi magau, ga daudau i honga de laagau lui.

⁹ Deenei ai, de Maadua gu hagaamua ia ma de gaavange gi de ia de ingoo e maolunga ange i denga ingoo alodahi,

¹⁰ gai alodahi e duuduli naa ga hagadubu de ingoo o Iesu, i de langi ma henua i lalo, aama lalo de gelegele,

¹¹ gai dangada alodahi e tala hagadonu naa bolo Iesu Klisdo go Tagi Maolunga, ga hagamahamaha ai de Maadua Tamana.

Goodou gi ni mee e hagamaalama ai dangada

¹² Deenei ai, ogu daina hagamogomogo, goodou e daudali i agu muna i masavaa alodahi, e dee go dogu masavaa donu huu e noho ai i oodou daha, gai e kii ange donu de heohi doodou hai de mee nei i dogu masavaa e dee maleva ai. Goodou duudagi ina de hagaago mai i oodou hegau bolo goodou gu hagamouli, i de maatagu ma de bolebole,

¹³ i hiidinga go de Maadua donu e hai hegau i oodou lodo, ga hai ai goodou gi llodo ma de maua i de hai ono mee e malangilangi ai.

¹⁴ Goodou haia mee alodahi i tee nnanu aabe go de hagadaumee,

¹⁵ gi dee haisala ai goodou, gai gi gilimalali bei dagodo dama a de Maadua e heohi abodonu laa, i doodou nnoho i magavaa o de atangada baubau ma de hai alaadeu hai, gai goodou gi ni mee e hagamaalama ina dangada, bei dagodo o denga heduu e hagamaalama ina laa lo te langi i lunga,

¹⁶ i doodou hagammahi ga daohi muna o de mouli, gi maua ai e au i de tala tuhi i de laangi o Klisdo e humai ai, bolo au tee ngadi savini aabe teai haigamaiana o agu hegau.

¹⁷ Aagai noo dogu mouli e hai gi bei ssigidaumaha o mee unu e llingi ange laa gi honga ssigidaumaha o oodou kai, gai au e malangilangi donu ma de lodo danuaa madali goodou alodahi.

¹⁸ Gai goodou gi malangilangi hogi ma de llodo danuaa madali au.

Timothy ma Epaphroditus

¹⁹ Au e tali hagalodolodo ange gi Tagi Maolunga go Iesu bolo au e hai naa Timothy gi hanadu gi oodou daha i de masavaa moolau, gi malangilangi ai hogi au i dagu iloo oodou dagodo.

²⁰ Gai e deai ange donu se dangada e bei dagodo o Timothy, i dono lodo mmahi i de hai de mee e danuaa adu gi goodou.

²¹ De gau ange laa alodahi e ssala donu huu olaadeu mee e llodo ai, e dee go mee o Iesu Klisdo e lodo ai laa.

²² Aagai goodou gu iloo donu dagodo de haigamaiana o Timothy, i dono hai hegau madali au bei dagodo o tama ma dono damana i de hagadele de longo danuaa.

²³ Deenei ai, au e lodo e hai ia gi hanadu gi moolau, i de masavaa aagu e iloo ai be dee hee de hai e hagamodu ai ogu dagodo.

²⁴ Gai au e hagadonusia bolo e dee mmule naa donu gai Tagi Maolunga gu dugu mai au gi hanadu gi oodou daha.

²⁵ Au e maanadu bolo e danuaa dagu hai gi ahe adu taadeu daina go Epaphroditus, ia se daane hai hegau madali au ma de hebagi madali au, go tangada oodou ne hai gi humai gi balea mai au i de masavaa oogu ne duasala ai.

²⁶ Go hiidinga ia gu kona mmao dono buliaamoou i goodou alodahi, ma dono daemaha i hiidinga ia gu iloo bolo goodou gu langona bolo ia nogo magi.

²⁷ Ni muna abodonu ia nogo magi donu ga dai magau. Aagai de Maadua ne abodonu ange gi de ia, gai e dee ange donu huu gi de ia, gai mai hogi gi de au, ga hagaieiangi ia kana gona odi de daemaha dagu mee e hagauda.

²⁸ Gai au gu kii ange donu dogu lodo e hai ia gi hanadu gi oodou daha, gi malangilangi ai goodou i doodou gidee ia, gai gi dee kona ai dogu manavasaa i goodou.

²⁹ Deenei ai, goodou abodonu ange gi de ia i lodo o Tagi Maolunga i de malangilangi laumalie, ma de hagadubu denga daane bei ia,

³⁰ go hiidinga ia ne dai magau donu i dana hai hegau a Klisdo; ia ne hagangadi mee dono mouli gi maua ai e ia i de hagalava mee alodahi oodou tee maua i de hai e bale mai ai au.