Philippians 1 - De Beebaa Dabu

De hagaboo

¹ Mai i daho Paul ma Timothy, luu dangada hai hegau o Klisdo Iesu. Ange gi dangada alodahi o de Maadua i lodo o Klisdo Iesu i Philippi, madali denga dagi ma de gau bale.

² De abodonu ma de baba mai i daho de Maadua taadeu Damana aama Iesu Klisdo Tagi Maolunga gi dagodo i oodou daha.

De hagaahe ange de abodonu i talodalo

³ Au e hagaahe ange de abodonu gi dogu Maadua i masavaa alodahi aagu e maanadu ai goodou.

⁴ Masavaa alodahi oogu e dalodalo ai i goodou, gai au e dalodalo ma de malangilangi,

⁵ i hiidinga goodou ni dangada e hai hegau madali au i de longo danuaa, mai i taamada ga dae mai ai gi iainei.

⁶ Gai au e iloo abodonu bolo de Maadua ne damadaa ina laa de hegau danuaa i oodou lodo naa, e duudagi naa donu de hegau naa ga dae ai gi dana hagalava i de laangi o Klisdo Iesu e ahe mai ai.

⁷ Gai de heohi donu dagu maanadu goodou alodahi i tagodo nei, go hiidinga goodou e hagamogomogo donu i ogu daha, gai goodou alodahi gu kave tuuhanga hegau nei madali au, i dogu masavaa e nnoho ai i lo te hale pono, aama dagu tala hagadonu dagodo o de longo danuaa.

⁸ Gai go de Maadua dogu dangada tala hagadonu, i dagu tala adu bolo au e buliaamou mmao i goodou alodahi bei de aloha o Klisdo Iesu.

⁹ Gai au e dalodalo gi hagadagadaga age oodou aaloha, madali de iloo mee abodonu aama de tonu danuaa ange gi de mee heohi,

¹⁰ gi maua ai e goodou i de buni ange gi de mee heohi, gai goodou gu gilimalali ma teai oodou baubau i de laangi o Klisdo e ahe mai ai.

¹¹ Gai oodou mouli gu hoohonu i hua o de heohi ne daamada mai laa i mahi o Iesu Klisdo, e hagamahamaha ai ma de tuhi ai de Maadua.

De hagadagadaga age o de longo danuaa

¹² Denga daina, au e lodo goodou gi iloo bolo mee gu hai mai nei gi de au gu hagasula ma de hai gi hagadagadaga age de longo danuaa.

¹³ Gai mee nei gu dele hogi i daho denga daane hagaloosi alodahi i de Praetorium, ma dangada ange laa alodahi, gilaadeu gu iloo bolo au gu noho i lo te hale pono i hiidinga o Klisdo.

¹⁴ Gai de baasi soa o denga daina gu lo taane ai hogi i lodo o Tagi Maolunga, i hiidinga dogu hhao gi lo te hale pono, ma de kii ange tee maatagu i de tala de longo danuaa.

¹⁵ Hanu e agoago Klisdo i delaadeu llodo gaiaa, ma de llodo e hagadau gaavange, aagai hanu e agoago i de lodo se muna abodonu.

¹⁶ Gilaadeu e agoagona laa Klisdo i de aloha, e iloo bolo au ne tili ange gi lo te hale pono, gai au ga tala hagadonu ai de longo danuaa.

¹⁷ Gai de gau ange laa e agoago i Klisdo i delaadeu llodo e hagadau gaavange, e dee go de lodo gilimalali abodonu, aagai gilaadeu e maanadu de hai gi kii ange dogu daemaha i dogu masavaa e noho ai i lo te hale pono.

¹⁸ Gai au e dee anga ange donu gi de mee nei. De mee hagamogomogo go delaadeu agoago Klisdo i mee alodahi, e dee hilihili be go de lodo e dee se muna abodonu aabe go de lodo se muna abodonu. Gai au e duudagi naa donu huu de malangilangi,

¹⁹ go hiidinga au e iloo bolo au e ola mai naa donu i mee gu hai mai gi de au, i doodou dalodalo ma de bale mai i daho de Hagasaalunga o Iesu Klisdo.

²⁰ Gai dagu tali ma dagu tali hagalodolodo bolo au e dee dogaa naa donu i dahi mee daudahi, aagai au e lo taane iainei aama masavaa alodahi i de hagamahamaha Klisdo i dogu angaanga nei, e dee hilihili be au e mouli aabe e magau.

²¹ Go hiidinga dogu mouli go Klisdo, gai dogu magau go dagu maua abodonu.

²² Noo e daulooloa dogu mouli, gai gu kii ange de lagolago hua o agu hegau. Deenei ai, au gu dee iloo be dee hee dogu mee e lodo ai.

²³ Au gu lua lodo i dagu maanadu luu mee nei: au e lodo e hano gee mai i de mouli nei e hano gi daho Klisdo, go hiidinga e kii ange donu i tanuaa.

²⁴ Aagai e kii ange de haigamaiana adu gi goodou noo au e mouli.

²⁵ Au e iloo too donu de mee nei: au e daulooloa naa donu dogu mouli madali goodou alodahi, gi hagadagadaga age ai goodou ma de malangilangi i de gai,

²⁶ gi kii ange ai doodou malangilangi i lodo o Klisdo Iesu, i hiidinga dogu dae adu gi oodou daha.

²⁷ Gai goodou mouli gi bei dagodo muna o de longo danuaa o Klisdo, e dee hilihili be au e hanadu ga hedae adu gi goodou, aabe au e dee maleva, gai au e langona bolo goodou e tuu ma e makaga i de lodo daudahi, ma de hagadau bale i de hebagi i doodou hagadonu de longo danuaa.

²⁸ Gai goodou gi dee maatagu i gilaadeu e hai baasi adu gi goodou; de mee nei e hagaago ange gi gilaadeu bolo gilaadeu e daa naa ga maakau, aagai goodou e hagamouli. De mee nei se hegau nii de Maadua.

²⁹ Go hiidinga ia tee dugu adu donu huu goodou de maua i de kai ange gi Klisdo, aagai goodou gi hagaduasala hogi i ono hiidinga.

³⁰ Gai goodou e hagaduu ngae hogi madali au i de hebagi oodou gu gidee ma de langona bolo au goi hebagi ai huu iainei.