Philemon 1 - De Beebaa Dabu

Denga hagaboo

¹ Mai i daho Paul, taane gu hhao laa gi lo te hale pono, i hiidinga o Klisdo Iesu, aama mai i daho Timothy taadeu daina. Ange gi Philemon, demaau soa hai hegau hagamogomogo,

² aama ange gi Apphia demaau daina hahine, ma Archippus demaau soa e hebagi laa madali gimaau i de hebagi nei, aama ange gi de nohoanga dabu e hagabuni laa ma e daumaha i doo hale.

³ De abodonu ma de baba mai i daho de Maadua taadeu Damana, aama mai i daho Tagi Maolunga go Iesu Klisdo gi dagodo i oodou daha.

De gai aama de aloha o Philemon

⁴ Au e hagaahe ange de abodonu gi dogu Maadua i masavaa alodahi oogu e dalodalo ai i de goe,

⁵ go hiidinga au gu langona dagodo o doo gai ange gi Tagi Maolunga go Iesu, aama doo aloha ange gi dangada alodahi o de Maadua.

⁶ Gai au e dalodalo bolo dau hagahai hegau doo gai, gi haia gi hagadagadaga age taadeu iloo mee danuaa alodahi adaadeu e hanu i lodo o Klisdo.

⁷ Dogu daina, doo aloha gu hagamalangilangi ma de hagaaneane ogu lodo, i hiidinga koe gu hagaaneane lodo o dangada o de Maadua.

Tangidangi a Paul i hiidinga o Onesimus

⁸ Au e maua donu gi lo taane i hiidinga o Klisdo, i de tala hagasoe adu au mee e hai.

⁹ Gai au e dee lodo e hai de mee nei, aagai au e dangidangi adu i hiidinga dogu aloha i de goe. Deenei ai, go au go Paul, au se daane madumadua, gai iainei gu noho i lo te hale pono i hiidinga o Klisdo Iesu,

¹⁰ au e dangidangi adu i hiidinga o dagu dama go Onesimus, au gu hai gi se damana niiona i dogu masavaa gu noho ai nei i lo te hale pono.

¹¹ I mua gai ia e deai ono haigamaiana adu gi de goe, gai iainei ia gu hanu donu ono haigamaiana mai gi gidaau ngaadahi.

¹² Gai au gu hai ia gi ahe adu gi oo daha, gai dogu aloha e madali ia.

¹³ Gai au ne lodo donu e dugu ia gi noho i ogu daha, gai ia ga sui ai goe ga bale mai au i de masavaa oogu e noho ai i lo te hale pono i hiidinga dagu tala de longo danuaa.

¹⁴ Aagai au tee lodo e hai dahi mee noo tigi dugua mai i oo daha; doo abodonu mai gi de au gi se mee mai donu i oo lodo, gai gi dee se mee ne hai gi de mahi.

¹⁵ Gai agu made ia ne hano gee mai i oo daha i dahi damaa masavaa, gi maua ai e goe i de hagaahe adu ia gi noho i oo daha ga hano ai.

¹⁶ Iainei ia gu dee se dangada hai hegau donu huu, aagai gu kii ange i tangada hai hegau, ia gu se daina hagamogomogo. Ia e dee se daina hagamogomogo mai donu huu gi de au, gai e kii ange naa donu doo aloha i de ia, i hiidinga ia se dangada hai hegau niiou, gai se daina hogi i lodo o Tagi Maolunga.

¹⁷ Gai noo koe e hagabinga bolo au se dangada hai hegau madali goe, gai koe abodonu ange gi de ia bei doo hai e abodonu mai ai laa gi de au.

¹⁸ Noo ia gu hai adu dahi baubau gi de goe, aabe gu muli adu gi de goe i dahi mee, gai koe dau ina mai mee naa gi de au.

¹⁹ Go au go Paul, go au donu ne siia muna nei i dogu lima: au e hagao adu naa donu au mee; gai au e dee lodo e hagamaanadu adu bolo koe e muli mai donu gi de au i doo mouli.

²⁰ Deenei ai, e taina, haia gi hanu haigamaiana o agu hegau adu gi de goe i lodo o Tagi Maolunga. Haia gi baba ogu lodo i lodo o Klisdo.

²¹ Au e tali bolo koe e hai naa donu gi bei agu muna, au e sisi adu de leda nei i dagu iloo bolo koe e hai naa donu ga dubu ange i agu mee gu dangidangi adu ai gi de goe.

²² Gai koe hagadabena ina hogi dahi aabi e noho ai au, go hiidinga au e tali hagalodolodo bolo au e hanadu naa donu gi oodou daha i doodou dalodalo i de au.

Hagaboo hagaodi

²³ Epaphras, taane madali au i lo te hale pono i hiidinga o Klisdo Iesu, e gaavadu hogi dana hagaboo gi de goe,

²⁴ madali a Mark, ma Aristarchus, ma Demas aama Luke, go denga daane e hai hegau madali au.

²⁵ De abodonu o Tagi Maolunga go Iesu Klisdo gi dagodo i daho oodou hagasaalunga.