Obadiah 1 - De Beebaa Dabu

¹ De midi hagaago ange a Obadiah. E hagadaba de Ia Aamua go Iahweh i dagodo o Edom — gimaadeu gu langona dahi muna mai i daho Tagi Maolunga; dahi dangada hagailoo gu hai gi hano gi denga huaahenua, gi hai ange, “Hiihidi age, gidaadeu ga hulo e hebagi ange gi de ia!” —

De hagaduasala o Edom

² “Tilo, au e hai naa goe gi maolalo i magavaa o denga huaahenua, koe e kona naa doo hagangadi mee ina.

³ Doo lodo maolunga gu hagasenga goe; koe e noho i lo te baba, ma de hai doo hale i denga mommee maolunga; koe e hagadaba i oo lodo, ‘Goai e maua i de gave iho au gi honga de gelegele?’

⁴ Gai e dee galemu naa donu doo lele ga maolunga bei de igele, ma de hai doo hoohanga i magavaa o denga heduu, gai au e tili iho naa donu goe gi lalo, go Tagi Maolunga e hagadaba.

⁵ Noo de gau gaiaa gu loomai, noo de gau daa dangada gu loomai i de boo — gai se hai ngadaa laumalie e duu i de goe! — e aha, gilaadeu e dee gaiaa naa donu huu alaadeu mee e llodo ai? Noo de gau hagihagi grape gu loomai, e aha, gilaadeu e dee dugu naa hanu momo grape?

⁶ Aagai Esau e gaiaadia naa donu ono goloa ga odi, ono goloa hagamogomogo e gaavee naa hogi!

⁷ Dangada alodahi e balea adu gi goodou i de hebagi e hai naa goodou gi hulo gee i doodou henua; gai dangada gu hagaheloongoi adu e daahanga ma de hagadee kii goodou; dangada e gaina oodou gai e dugu naa ssele e dada ai goodou, aagai goodou e dee iloo naa donu.

⁸ De laangi laa, go Tagi Maolunga e hagadaba, gai au e daa naa gi maakau denga daane heiangi o Edom, ma gilaadeu e tonu ange i denga mounga o Esau.

⁹ Teman, oo daane dau i de hebagi e kona naa donu de maatagu, gai daane alodahi i honga mounga o Esau e odi naa i de daa ga maakau.

¹⁰ Go hiidinga dau vaivai hai doo daina go Jacob, koe e dogaa naa donu, koe e oha ga maoha ga hano ai.

¹¹ I de laangi oou tee anga ange ai e bale ange doo daina, i de masavaa a de gau henua gee ne kave ai ono goloa, gai de gau henua gee ne ulu i ono haitoga ma de dada denga laagau e kave ai Jerusalem, gai koe ne hagabuni ange gi gilaadeu.

¹² Gai e dee heohi dau hagangadi mee doo daina i de masavaa oona ne duasala ai, aabe go doo malangilangi i dangada o Judah i de masavaa olaadeu ne oohaa ina ai, aama doo basa hagamaolunga i de laangi olaadeu ne hai ngadaa ai.

¹³ Gai e dee heohi donu doo ulu i haitoga o ogu dangada i de masavaa olaadeu ne hai ngadaa ai, be go doo malangilangi i delaadeu hai ngadaa i de masavaa olaadeu ne duasala ai, ma de hai gi de mahi olaadeu goloa i de masavaa olaadeu ne duasala ai.

¹⁴ Koe e dee tali i hesilihaginga o denga haiava e daa ai gi maakau dangada e saavini e hulo gee, aabe e booboo dangada ne ola e gaavange gi olaadeu hagadaumee i de laangi olaadeu ne hai ngadaa ai.

¹⁵ De laangi o Tagi Maolunga gu dae mai donu gi honga o denga huaahenua alodahi. Gai au mee ne hai, e hai adu naa donu hogi gi de goe; au hegau baubau e aahe adu naa donu gi de goe.

¹⁶ Goodou ne unu de ubu i honga dogu mounga dabu, gai denga huaahenua alodahi e unu ai naa hogi ga hano ai; gilaadeu e duudagi naa donu huu de unu ai, gai e hai naa ga dagodo be gilaadeu tee haanau donu.

¹⁷ Aagai dangada e ola naa i honga de mounga go Zion, gai de mounga laa e dabu naa; gai dangada o Jacob e kave naa delaadeu henua ga henua ai.

¹⁸ Dangada o Jacob e bei naa dahi ahi, dangada o Joseph e bei naa de ula o dahi ahi; gai dangada o Esau e bei naa denga gainga, gai gilaadeu e dudu naa gilaadeu ga odi. Gai e deai naa donu dangada e ola i dangada o Esau,” go Tagi Maolunga e hagadaba.

¹⁹ Dangada o Negev e nnoho naa i denga mounga o Esau, gai dangada i mommee iai duuduu paa i lalo e kave naa de henua o de gau Philistia. Gilaadeu e kave naa denga veelenga o Ephraim ma Samaria, gai Benjamin e kave naa Gilead ga henua ai.

²⁰ De hagabuulingaa dangada o Israel e kave naa de henua o de gau Canaan, ga hano ai ga dae gi Zarephath; gai dangada o Jerusalem ne gaavee laa gi Sepharad e henua naa i denga aduhale o de Negev.

²¹ De gau hagaola e loage naa gi de mounga go Zion ga dagi ai i denga mounga o Esau. Gai de nohoanga hodooligi e hai naa ga niio Tagi Maolunga.