Numbers 34 - De Beebaa Dabu

Denga ngaadonga o de henua

¹ Gai Tagi Maolunga ga hai ange gi Moses,

² “Daalaa ange gi de gau Israel bolo de masavaa naa huu oodou e tae gi de henua go Canaan (deenei de henua e gaavadu goodou gi henua ai, go de henua o Canaan alodahi),

³ gai de ngaadonga o doodou henua mai i ngaage go de vao o Zin, i gaogao de henua o Edom. Gai doodou ngaadonga mai i ngaage e daamada mai i Tai Soolo i baasi dua;

⁴ gai e hhagi ga hano gi ngaage i de madadaagodo o Akrabbim, ga hano gi Zin ga hano ai gi Kadesh Barnea i baasi ngaage; gai e duudagi mai i kilaa ga hano gi Hazar Addar, ga hano ai laa gaogao o Azmon;

⁵ gai mai i Azmon e hhagi ga hano gi Ssaalingaa Vai o Egypt, gai e hano ga dae gi tai.

⁶ Gai doodou ngaadonga mai ai i dai go Mediterranean; deenei doodou ngaadonga mai ai i dai.

⁷ Gai goodou hagailonga ina de ngaadonga o doodou henua i dua mai i de Mediterranean ga hano ga dae gi de mounga go Hor;

⁸ mai i de mounga go Hor ga dae gi Lebo Hamath, gai dono ngaadonga go Zedad;

⁹ gai e hano hogi ga dae gi Ziphron, gai dono ngaadonga go Hazar Enan; deenei de ngaadonga o doodou henua mai i ngaiho.

¹⁰ Gai goodou hagailonga ina de ngaadonga o doodou henua i dua mai i Hazar Zenan ga hano ai gi Shepham;

¹¹ gai e hano iho mai i Shepham ga hano gi Riblah i baasi i dua o Ain; gai e hano iho mai i kilaa ga dae gi ngaadonga o de vai go Kinnereth i baasi dua;

¹² ga hano iho ai ga duu i Jordan, gai dono ngaadonga go Tai Soolo. Deenei doodou henua ma ono ngaadonga alodahi i luu baasi.”

¹³ Gai Moses ne tala ange gi de gau Israel, ga hai ange, “Deenei de henua oodou e kave e henua ai i de hai tada, go de henua a Tagi Maolunga gu tala bolo e gaavange gi denga aamuli e siva ma de baasi aamuli ange laa.

¹⁴ Gai denga huaabodu i de aamuli o Reuben, mai i olaadeu dubuna madagidagi, ma huaabodu i de aamuli o Gad, mai i olaadeu dubuna madagidagi, aama denga huaabodu i dahi luu baasi de aamuli o Manasseh gu kave olaadeu boolonga;

¹⁵ luu aamuli ma de baasi aamuli laa ne kave olaadeu mommee i de baasi laa o Jordan i baasi i dua o Jericho, go de baasi ange gi ssoobonga o de laa.”

Dagi o denga aamuli

¹⁶ Gai Tagi Maolunga ga hai ange gi Moses,

¹⁷ “Aanei ingoo o denga daane e vaevaaea ange de henua gi dangada: go tangada haimeedabu go Eleazar aama Joshua tama daane a Nun.

¹⁸ Gai koe hilia hogi dagidahi dagi mai i denga aamuli, gi balea ange gilaau gi vaevaaea ange ai de henua gi dangada.

¹⁹ Aanei ingoo o denga daane: tagi o de aamuli o Judah go Caleb tama daane a Jephunneh.

²⁰ Tagi o de aamuli o Simeon go Shemuel, tama daane a Ammihud.

²¹ Tagi o de aamuli o Benjamin go Elidad, tama daane a Kislon.

²² Tagi o de aamuli o Dan go Bukki, tama daane a Jogli.

²³ Tagi o de aamuli o luu dama daane a Joseph aanei: tagi o de aamuli o Manasseh go Hanniel, tama daane a Ephod;

²⁴ tagi o de aamuli o Ephraim go Kemuel, tama daane a Shiphtan.

²⁵ Tagi o de aamuli o Zebulun go Elizaphan, tama daane a Parnak.

²⁶ Tagi o de aamuli o Issachar go Paltiel, tama daane a Azzan.

²⁷ Tagi o de aamuli o Asher go Ahihud, tama daane a Shelomi.

²⁸ Tagi o de aamuli o Naphtali go Pedahel, tama daane a Ammihud.”

²⁹ Aanei denga daane a Tagi Maolunga ne tala ange gilaadeu gi vaevaaea ange de henua gi de gau Israel i de henua go Canaan.