Numbers 24 - De Beebaa Dabu

¹ Gai ga gidee huu e Balaam bolo Tagi Maolunga e malangilangi i de hagamanuuia Israel, gai ia tee ahe ange e hai hanu huuhuaa mee, bei denga hanonga ange laa, aagai ia ne huli ga hano gi de vao.

² Gai Balaam gu gidee de gau Israel e nnoho gainga madali olaadeu aamuli. Gai de Hagasaalunga o de Maadua gu hano iho gi ono elunga,

³ gai ia ga tala ana muna, ga hagadaba, “Muna a Balaam, tama daane a Beor, muna a taane e gidee mee,

⁴ muna a taane ne langona muna a de Maadua, ma de gidee de midi hagaago ange mai i daho de Ia Mmahi Mmao laa; ia ne hagabaguu gi lalo, gai luoono mada e aala.

⁵ Jacob, ga dae laa de mahamaha oo hale malo, Israel, oo mommee nnoho gaainga e mahamaha!

⁶ Gai e bei denga geelonga i de mommee lahalaha, ma denga veelenga i gaogao dahi saalingaa vai, ma denga aloe a Tagi Maolunga ne doo, ma denga cedar e ssomo i gaogao denga vai.

⁷ Denga vai e ssali mai naa i lodo alaadeu bagede; gai ana golee e doo i lodo vai lagolago, gai dono hodooligi e maolunga ange i Agag, dono nohoanga hodooligi e hagaamua naa.

⁸ De Maadua ne hagassao mai ia i Egypt, gai luoono hanga e mmahi bei de kaau daane aada; ia e oha naa denga huaahenua e kino i de ia, ga hadihadi gi too dagidahi olaadeu ivi, ma de tili gilaadeu i dana mee hholu.

⁹ Israel e dogoduli naa bei de laiono, gai e bei de laiono hahine — goai e maua i de hhango ia? Gilaadeu e hagamanuuia ina goe, e hagamanuuia naa, gai gilaadeu e hagamalaia ina goe, e hagamalaia naa.”

¹⁰ Gai Balak gu lili mmao i Balaam. Gai ia ne paa luoono lima i hiidinga dono lili, ga hai ange gi Balaam, “Au ne aalu adu goe gi humai gi hagamalaia ina ogu hagadaumee, gai tilo, koe gu hagamanuuia gilaadeu i denga hanonga e dolu nei.

¹¹ Deenei ai, hagamoolau ahe gi doo henua. Au ne hai adu bolo au e hagao adu goe, aagai Tagi Maolunga gu hai gi deai soo hagaoanga.”

¹² Gai Balaam ga hai ange gi Balak, “E aha, tee daalaa ange e au gi denga daane aau ne hai gi loadu gi ogu daha, ga hai ange,

¹³ ‘Ga gaamai naa donu e Balak gi de au, dono hale e honu laa i selevaa ma goolo, aagai au e dee maua donu i de hai ogu mee e lodo ai, e dee hilihili be se mee danuaa aabe se mee baubau. Au e dee maua donu i tee daudali i muna a Tagi Maolunga, gai au e tala donu huu muna a Tagi Maolunga e tala mai’?

¹⁴ Tilo, au ga ahe nei gi daho ogu dangada. Aagai koe humai, gai au ga tala adu, dagodo o mee a de huaadangada nei e hai adu gi de goe ma oo dangada, i laangi e loomai.”

Muna pelaabisi a Balaam i de haa hanonga

¹⁵ Gai Balaam ne basa pelaabisi, ga hagadaba, “Muna pelaabisi a Balaam tama daane a Beor, go muna a taane madagide,

¹⁶ muna a taane e hagalaangona muna a de Maadua, ma de donu ange gi de iloo mee o de Ia Maolunga Mmao laa, ma de gidee midi mai i daho de Ia Mmahi Mmao laa, ia e hagabaguu gi lalo gai luoono mada e aala.

¹⁷ Au e gidee ia, gai e dee go iainei; au e daumada ia, aagai ia tigi baa mai. Dahi heduu e sobo age naa i daho Jacob, dahi laagau hodooligi e sula age naa i Israel; ga dagahi gi bala de biho o Moab, ma de ngadi biho o hagadiilinga o Sheth.

¹⁸ Edom e hagadee kii ina naa, dono hagadaumee go Seir e hagadee kii naa hogi, aagai Israel e kii naa.

¹⁹ Dahi dagi e sula age naa i daho Jacob, ga daa naa gu maakau dangada ne ola i denga aduhale.”

Muna pelaabisi a Balaam i de lima hanonga

²⁰ Gai ga gidee huu e Balaam de gau Amalek, gai ia ne basa, ga hagadaba, “Amalek go tahi i magavaa o denga huaahenua i taamada, aagai e oha naa donu i de hagaodi.”

²¹ Ia ne gidee hogi de gau Ken, gai ia ga tala ana muna, ga hagadaba, “Doo mommee noho e makaga, gai doo hoohanga e hili i lo te baba;

²² aagai de gau Ken e daia naa ga maakau, i de masavaa o de gau Assyria e noonooa ai goodou ga kave!”

²³ Gai ia ne tala ana muna, ga hagadaba, “E vakaa naa dangada, goai e maua gi ola i de masavaa a de Maadua e hai ai mee nei?

²⁴ Denga vaga e loomai naa i Kittim ga hebagi ange gi Assyria ma Eber; gai gilaadeu e oohaa naa hogi.”

²⁵ Gai Balaam ne hidi age ga ahe gi dono hale; gai Balak ne ahe hogi ga hano.