Nehemiah 12 - De Beebaa Dabu

De gau haimeedabu ma de aamuli o Levi

¹ Gai aanei de gau haimeedabu, ma hagadiilinga o Levi ne aahe mai madali Zerubbabel tama daane a Shealtiel, ma Jeshua: go Seraiah, ma Jeremiah, ma Ezra,

² ma Amariah, ma Malluk, ma Hattush,

³ ma Shecaniah, ma Rehum, ma Meremoth,

⁴ ma Iddo, ma Ginnethoi, ma Abijah,

⁵ ma Mijamin, ma Maadiah, ma Bilgah,

⁶ ma Shemaiah, ma Joiarib, ma Jedaiah,

⁷ ma Sallu, ma Amok, ma Hilkiah, aama Jedaiah. Aanei de gau haimeedabu maolunga ma olaadeu daina i de masavaa o Jeshua.

⁸ Denga hagadiilinga o Levi: go Jeshua, ma Binnui, ma Kadmiel, ma Sherebiah, ma Judah, aama Mattaniah, go gilaadeu ma ono daina e dagina denga daahili e hagaahe ange ai de abodonu.

⁹ Bakbukiah ma Unni ma olaau soa ange laa e tuu i de baasi laa i de masavaa o taumaha.

¹⁰ Gai Jeshua ne hagadili Joiakim, Joiakim ne hagadili Eliashib, Eliashib ne hagadili Joiada,

¹¹ Joiada ne hagadili Jonathan, gai Jonathan ne hagadili Jaddua.

¹² Gai laangi o Joiakim, gai aanei dagi o denga hagadiilinga o de gau haimeedabu: mai i de hagadiilinga o Seraiah go Meraiah; mai i de hagadiilinga o Jeremiah go Hananiah;

¹³ mai i de hagadiilinga o Ezra go Meshullam; mai i de hagadiilinga o Amariah go Jehohanan;

¹⁴ mai i de hagadiilinga o Malluchi go Jonathan; mai i de hagadiilinga o Shebaniah go Joseph;

¹⁵ mai i de hagadiilinga o Harim go Adna; mai i de hagadiilinga o Meraioth go Helkai;

¹⁶ mai i de hagadiilinga o Iddo go Zechariah; mai i de hagadiilinga o Ginnethon go Meshullam;

¹⁷ mai i de hagadiilinga o Abijah go Zicri; mai i hagadiilinga o Miniamin ma Moadiah, go Piltai;

¹⁸ mai i de hagadiilinga o Bilgah go Shammua, mai i de hagadiilinga o Shemaiah go Jehonathan;

¹⁹ mai i de hagadiilinga o Joiarib go Mattenai; mai i de hagadiilinga o Jedaiah go Uzzi;

²⁰ mai i de hagadiilinga o Sallai go Kallai; mai i de hagadiilinga o Amok go Eber;

²¹ mai i de hagadiilinga o Hilkiah go Hashabiah; mai i de hagadiilinga o Jedaiah go Nethanel.

²² Gai dagi o denga hagadiilinga o Levi, i de masavaa o Eliashib ma Joiada, ma Johanan, ma Jaddua, aama de gau haimeedabu, ne daohi olaadeu ingoo, i de masavaa o Darius, de hodooligi o Persia.

²³ Gai dagi o denga hagadiilinga o de aamuli o Levi ne daohi olaadeu ingoo i de beebaa e daohi ai laa hegau ga dae ai loo gi de masavaa o Johanan tama daane a Eliashib.

²⁴ Gai dagi o de aamuli o Levi: go Hashabiah, ma Sherebiah, ma Jeshua tama daane a Kadmiel, aama olaadeu daina e tuu laa i de baasi ange laa, e hagadau hagaahe ange ai de abodonu ma de tuhi, bei dagodo muna a David, taane o de Maadua.

²⁵ Gai Mattaniah ma Bakbukiah, ma Obadiah, ma Meshullam, ma Talmon, ma Akkub, go dangada e hagaloosia denga mommee doange i gaogao denga haitoga.

²⁶ Gilaadeu nei ne hai hegau i de masavaa o Joiakim tama daane a Jeshua, tama daane a Jozadak, aama de masavaa o de goobenaa go Nehemiah, aama Ezra tangada haimeedabu ma sisi.

De hagadabu o de buibui o Jerusalem

²⁷ Gai de masavaa ne hagadabu ai de buibui o Jerusalem, gai gilaadeu ne ssala dangada de aamuli o Levi mai i mommee alodahi olaadeu e nnoho ai laa, ga gaamai gilaadeu gi Jerusalem e hai ai taonga i de malangilangi, ma de hagaahe ange de abodonu madali denga daahili, aama de hagadangidangi i denga cymbal, ma harp, aama lyre.

²⁸ Gai de gau daahili ga loomai i denga mommee i luu baasi o Jerusalem, aama mai i aduhale i luu baasi o Netophah,

²⁹ mai i Beth Gilgal, ma mommee o Geba ma Azmaveth, go hiidinga de gau daahili ne hagatuu olaadeu aduhale i luu baasi o Jerusalem.

³⁰ Gai de gau haimeedabu ma de hagadiilinga o Levi ga hagagilimalali gilaadeu i mua, gai gilaadeu ga hagagilimalali hogi dangada, ma denga haitoga, ma de buibui.

³¹ Gai au ne hai denga dagi o Judah gi nnoho i honga de buibui. Au ne hai hogi e lua hagabuulinga daahili gi hagaahe ange de abodonu. Dahi hagabuulinga e hano gi de baasi madau, gi de buibui o de Haitoga o Duudae.

³² Hoshaiah ma dahi luu baasi o denga dagi o Judah e daudali adu i olaadeu dua,

³³ ma Azariah, ma Ezra, ma Meshullam,

³⁴ ma Judah, ma Benjamin, ma Shemaiah, ma Jeremiah,

³⁵ ma hanu dama a de gau haimeedabu ma alaadeu trumpet: go Zechariah tama daane a Jonathan, tama daane a Shemaiah, tama daane a Mattaniah, tama daane a Micaiah, tama daane a Zaccur, tama daane a Asaph,

³⁶ madali ono dangada, go Shemaiah, ma Azarel, ma Milalai, ma Gilalai, ma Maai, ma Nethanel, ma Judah, ma Hanani, madali denga mee hagadangidangi a David taane o de Maadua. Gai Ezra tangada sisi e hano i olaadeu mada i mua.

³⁷ Gai gilaadeu ne duudagi mai i de Haitoga o de Vai ga loage i denga vae gaagenga o de Aduhale o David, gi de mommee e hanage ai laa gi de buibui ga hulo ga ui i de hale o David ga hulo ai gi de Haitoga o denga Vai i baasi gi dua.

³⁸ De lua hagabuulinga daahili ne hagaahe ange de abodonu ga hulo ai gi de baasi gee. Gai au ne daudali ange i gilaadeu i honga de buibui, madali dahi luu baasi o dangada, ga hulo ai ga ui i de Hale Dagitilo o denga Mommee Dao Mee ga hulo ai gi de bae lahalaha,

³⁹ ma laa honga de Haitoga o Ephraim, ma de Haitoga o Jeshanah, ma de Haitoga o denga Mamu, ma de Hale Dagitilo o Hananel, ma de Hale Dagitilo o de Lau, ga tae ai gi de Haitoga o denga Ssiibi; gilaadeu ne hulo ga tae gi de Haitoga o de Gau Hagaloosi.

⁴⁰ Gai luu hagabuulinga daahili e hagaahe ange laa de abodonu, ne hulo ga tuu i olaadeu mommee i de hale o de Maadua, gai au ne duu hogi i kilaa madali denga dagi ange laa,

⁴¹ gai de gau haimeedabu e tuu ma alaadeu trumpet: go Eliakim, ma Maaseiah, ma Miniamin, ma Micaiah, ma Elioenai, ma Zechariah, aama Hananiah;

⁴² gai Maaseiah, ma Shemaiah, ma Eleazar, ma Uzzi, ma Jehohanan, ma Malkijah, ma Elam, aama Ezer i kilaa hogi. Gai de hagabuulinga daahili go Jezrahiah e dagina.

⁴³ Gai gilaadeu ne hai denga sigidaumaha lagolago mmao i de laangi laa, ma de malangilangi, go hiidinga de Maadua gu hagamalangilangi gilaadeu i de malangilangi laumalie. Denga haahine ma gauligi gu malangilangi hogi, gai delaadeu malangilangi i Jerusalem gu langona i de mommee mmao.

⁴⁴ De masavaa laa gai ne hili ange hanu daane gi diiloo ange denga mommee doange e dugu ai laa mee a dangada e daohi age, ma denga huamanu e hagihagi i taamada, ma mee o dahi diba i diba e madaangahulu. Gai gilaadeu gi hagabudulia mee nei mai i veelenga o denga aduhale i luu baasi denga aduhale, go tiba gu dugu ange laa gi de gau haimeedabu, ma de aamuli Levi bei de hai gu sisi ai i de hainga. Go hiidinga dangada o Judah ne malangilangi i hegau a de gau haimeedabu ma de hagadiilinga o Levi.

⁴⁵ Gai gilaadeu ne hai hegau a delaadeu Maadua, aama hegau o de hagagilimalali, gai e bei ai hogi de gau daahili ma de gau hagaloosi haitoga, bei de hai a David ma dana dama go Solomon gu tala ange ai.

⁴⁶ Madagidagi loo i de masavaa o David ma Asaph, gai e hanu e dagina de gau daahili, ma denga daahili tuhi ma de hagaahe ange ai de abodonu gi de Maadua.

⁴⁷ Laangi o Zerubbabel ma Nehemiah, gai de gau Israel alodahi ne gaavange diba a de gau daahili ma de gau hagaloosi haitoga i dahi laangi ma dahi laangi. Gilaadeu ne vvae hogi tiba a de hagadiilinga o Levi ange laa, gai denga hagadiilinga o Levi ne vvae gee tiba a denga hagadiilinga o Aaron.