Nahum 2 - De Beebaa Dabu

De oha o Nineveh

¹ Nineveh, tangada oohaa mee gu humai e hai baasi adu gi de goe. Dagitilo i honga de buibui o de aduhale; hagaloosia de haiava; hagadaabena ina oodou goloa hebagi, gai hagammahi ina goodou ma de lo taane!

² Tagi Maolunga e hagaahe ange naa de mahamaha o Jacob bei de mahamaha o Israel, e dee galemu donu de gau e oohaa mee gu oha gilaau ma gu ngadi dagodo gai gu hadihadi olaau laa.

³ Denga mee hungihungi o ono daane hebagi e mmea; denga daane hebagi e kahu i malo mmea. Baalanga o denga hada hebagi e dabadaba mai i de laangi olaadeu e hagadabena ai; gai gilaadeu e aloalohagi alaadeu dao i lo te moana.

⁴ Denga hada hebagi e hagakemo mai i honga haiava, gai e saavini saele i lodo mommee malaelae. Gilaadeu e bei de ula o denga lama; gilaadeu e maalama bei denga uila.

⁵ Ia e manadua naa ono daane hebagi dau; gai gilaadeu e baakuu naa i delaadeu seesee e hulo. Gilaadeu e hagamoolau e hulo gi de buibui, gai de mee buibui gu lava i de hagaduu age.

⁶ Denga haitoga o ssaalingaa vai gu maahuge gai denga hale danuaa gu maoha.

⁷ Dono hahine hodooligi gu deai ono malo, gai gu gaavee gee mai i de henua. Ono haahine hai hegau gu gonogono bei de koo o denga manu kono, ma de hagailiili honga olaadeu hadahada.

⁸ Nineveh gu bei dagodo o de vai e vava laa, ma gu odi vai i ono lodo. Gilaadeu e hagataba, “De kaba! De kaba!” aagai e deai donu dangada e huuhuli dua mai.

⁹ Gaiaadia denga selevaa, gaiaadia denga goolo! E lagolago mmao ono goloa danuaa, ma de lava i goloa hagamogomogo alodahi.

¹⁰ Nineveh gu se ngadi aduhale, gu maoha ma gu ngadi dagodo ai! Dangada gu maatagu, gai olaadeu duli gu pole; dangada alodahi gu manavasaa, gai gu mada tea olaadeu mada!

¹¹ I hee iai de hale o denga laiono, go de mommee alaadeu e haangai ai alaadeu dama, gai go de mommee o de laiono daane ma de laiono hahine e hulo aagena, madali denga dama, gai gilaadeu e dee maatagu?

¹² De laiono daane e oha kano e gaimee ai ana dama gai gu daa dahi manu e gaimee ai de laiono hahine; gai e hhao lo tono hale i manu aana ne daa ga maakau gai e hhao ono haonga i manu aana ne mau.

¹³ “Tilo, au e hai baasi adu gi de goe, go Tagi o denga hagabuulinga hebagi e hagadaba. Au e dudu naa oo hada hebagi, gai au laiono mmahi e daa naa ga maakau i de gadilaasa. Au e kave gee naa mee alodahi aau ne mau i henua i lalo. Gai leo o oo dangada hagailoo e deai naa donu dangada e langona.”