Micah 7 - De Beebaa Dabu

De duasala o Israel

¹ Gu vakaa loo au! Au gu bei tangada e hagihagia laa huamanu lleu, ma de ogo i dua de hagihagi o de veelengaa grape; gu deai donu gau looloa grape aagu e gai, gai gu deai hogi hua fig lleu aagu e hiigaina laa.

² Gu deai donu dangada heohi i honga de henua, gu deai donu se dangada e hai hegau i de mee heohi e doe. Dangada alodahi gu nnoho huu e daa dangada gi maakau; dahi dangada e noho e daa dono daina.

³ Luu lima ngaadahi gu aabo i de hai de baubau; gai tagi ma tangada hagamodu muna e hai gi de mahi denga mee ngadi gaavange, ma de kave mee ngadi gaavange hagasenga; de gau maolunga e tala ange gi dangada olaadeu mee e llodo ai — gilaadeu e hagaheloongoi i olaadeu magavaa.

⁴ Tangada danuaa hugadoo e bei de manu duiduia, tangada heohi hugadoo e baubau ange i de buibui o manu daladala. De laangi o oo dangada dagitilo gu baa mai donu, go de laangi o de Maadua e dae mai ai gi de goe. Iainei go de masavaa olaadeu e ssenga ange ai.

⁵ Aude hagadonusia tangada e baa adu gi de goe, gai gi dee tali hagalodolodo ange gi doo soa. Koe gi dagidiiloo hogi au muna e tala ange gi de hine i doo gaogao.

⁶ Tama daane e hagangadi mee dono damana, tamaa hine e hai baasi ange gi dono dinana, ssaulaba e hai baasi ange gi dono maa; gai hagadaumee o tangada go dangada donu i dono hale.

⁷ Aagai ogu dagodo, au e dagitilo naa ma de tali ange Tagi Maolunga, au e tali ange de Maadua dogu Ia Hagaola; gai dogu Maadua e hagallongo naa donu dagu dangi.

De duu age ange o Israel

⁸ Dogu hagadaumee, koe gi dee malangilangi i ogu dagodo! Ga baguu naa donu au, aagai au e ahe ange naa donu ga hidi age. Gai ga noho naa donu au i lo te gohu, aagai go Tagi Maolunga dogu hagamaalama.

⁹ Au e hagauda naa de bole o Tagi Maolunga, go hiidinga au gu haisala ange gi de ia, ga dae ai gi dana hagamodu ogu dagodo ma dana hagadaba bolo au gu heohi. Ia e hagasao mai naa au gi de mommee maalama; au e gidee naa dono hai hegau i de heohi.

¹⁰ Dogu hagadaumee e dogaa naa i dana gidee de hai mee nei, tangada ne hai mai laa gi de au, “I hee iai Tagi Maolunga doo Maadua?” Au e gidee naa de hagadee kii ina o dogu hagadaumee; iainei donu gai ia e dagadagahi au gi lo te gelegele bei bela pigi i honga denga haiava.

¹¹ De laangi e hagaduu age ai doo buibui e dae mai naa donu, ma de laangi e hagatolo ai gi daha oo goinga.

¹² De laangi laa, gai dangada e aahe mai naa gi de aduhale mai i Assyria ma denga aduhale o Egypt, ma mai i mommee i Egypt ga hano ai gi Euphrates, aama mai i dahi dai ga hano ai gi tai ange laa ma mai i dahi mounga ga hano ai gi de mounga ange laa.

¹³ Henua i lalo e hai naa ga ngadi dagodo, i hiidinga o dangada e nnoho ai; mee nei ne hai i hiidinga o alaadeu hegau baubau.

Talodalo ma de tuhi

¹⁴ Hagaloosia ange oo dangada i doo dogo, go de hagabuulingaa ssiibi o doo boolonga, go dangada e nnoho laa donu huu i gilaadeu i lodo henua, i de mommee iai de gelegele danuaa. Dugua denga manu gi gaimee saele i Bashan ma Gilead bei dagodo mee nogo hai madagidagi.

¹⁵ “Au e hagaago adu naa agu hegau hagalele mouli, bei de masavaa oou ne sao mai ai i de henua go Egypt.”

¹⁶ Denga huaahenua e dookaa naa i delaadeu gidee naa mee nei, gilaadeu e deai naa olaadeu mahi. Gilaadeu e pono naa olaadeu ngudu i olaadeu lima, gai gilaadeu e longoduli naa.

¹⁷ Gilaadeu e samusamu naa de gelegele bei de labodo, ma denga manu e tolo laa i honga de gelegele. Gilaadeu e sasao mai naa i lodo olaadeu mommee buibui makaga ma de bolebole; gilaadeu e daahuli mai naa gi Tagi Maolunga taadeu Maadua i delaadeu maatagu, gilaadeu e maatagu naa hogi i de goe.

¹⁸ De Maadua, goai e bei oo dagodo, i dau hagangalo baubau aama de degi ange gi haisala o dangada o doo boolonga e doe? Koe e dee golo age doo lili ga hano ai, gai e malangilangi i de hagaago mai doo lodo aloha.

¹⁹ Koe e ahe ange naa ga abodonu mai gi gimaadeu; koe e dagadagahi naa omaadeu haisala gi lalo luoo vae, ma de tili omaadeu haisala alodahi gi lo te moana gelo.

²⁰ Koe e hai hegau ange naa gi Jacob i de muna abodonu, ma de abodonu ange gi Abraham, bei dau hai gu hagatoo donu ange ai gi omaadeu dubuna madagidagi.