Micah 6 - De Beebaa Dabu

De hagabaubau a Tagi Maolunga Israel

¹ Noho mai hagalaangona muna a Tagi Maolunga: “Duu age, daalaa doo hagaheohi i mada i mua o denga mounga; haia gi langona e denga duuduu au muna.

² Denga mounga, hagalaangona muna a Tagi Maolunga e hagabaubau ai goodou; denga dagelo o henua i lalo e daakodo laa ga hano ai, goodou hagalaangona. Go hiidinga Tagi Maolunga e dahi ana mee e hai baasi ange ai gi dono huaadangada; ia e hagadaumee ange donu gi Israel.

³ Dogu huaadangada, se aha aagu gu hai adu laa gi de goe? Gai se aha aagu ne hagadaemaha ai laa goe? Basa mai gi agu muna!

⁴ Au ne hagassao mai goe i de henua go Egypt, ma de hagaola goe mai i de henua oou nogo hagahai hegau hagaduasala ina ai. Au ne hai Moses gi hanadu gi dagina goodou madali Aaron ma Miriam.

⁵ Ogu dangada, goodou manadua hagasaele a de hodooligi o Moab go Balak, gai aahee muna a Balaam tama daane a Beor ne basa ange ai; manadua mee ne hai i doodou loomai i Shittim gi Gilgal, gai gi iloo ai e goodou dagodo hegau heohi a Tagi Maolunga!”

⁶ Se aha naa aagu e kave i dogu hano gi mada luu mada o Tagi Maolunga, e daumaha ange ai gi de Maadua maolunga laa? E maua e au i de hano gi mada luoono mada ma agu ssigidaumaha dudu, i denga kaau gu dagidahi olaadeu ngadau?

⁷ E aha, e maua gi malangilangi Tagi Maolunga i e mano ssiibi daane, madali e dahisemada leevaa lolo? E maua e au i de gaavange dagu dama daane madua e tala ai ogu haisala, go dagu dama ne hagadili i taamada, e hagao ai haisala o dogu hagasaalunga?

⁸ Koe tangada, ia gu hagaago adu gi de goe de mee danuaa, gai se aha a Tagi Maolunga e lodo koe gi haia? E dee go de hai hegau i de mee heohi, ma de lodo aloha, aama de seesee i de lodo maolalo madali doo Maadua?

Haisala ma de hagaduasala o Israel

⁹ De leo o Tagi Maolunga e hagahi ai de aduhale — gai de heiangi abodonu go de madagu i doo ingoo — “Hagallongo ange gi de laagau haele ma de ia ne hagamodu ina.

¹⁰ E aha, e maua e au i de hagangalo goloa i de hale o tangada baubau, ne maua i hegau dee heohi, ma de ephah e dee odi ange ma de hagabaubau ina?

¹¹ Dee hee dagu hai e degi ange ai gi dangada e hai hegau i de mee hagahidi hagasenga ma de beagi hagahidi hagasenga?

¹² De gau lava o de aduhale e vaivai hai dangada, gai dangada e nnoho i oo daha e hadu muna, ma de tala muna hagasenga i olaadeu ngudu.

¹³ Deenei ai, au e kona naa donu dagu hagailiili goe, ma de oha goe i hiidinga oo haisala.

¹⁴ Koe e gaimee naa, aagai e dee maua gi bosu, gai doo dinae e dee maua donu gi honu. Koe e hagabudu goloa, gai e dee maua donu gi daakodo, go hiidinga au e dugu ange naa gi de gadilaasa au mee gu doange.

¹⁵ Koe e doo naa au manu, aagai e dee go koe e hagihagia; koe e kumi naa lolo o denga olive, aagai e dee go koe e hai mee ai, koe e dagadagahi naa denga grape, aagai e dee go koe e unumia uvaini e maua ai.

¹⁶ Koe ne kana ange ga daohi hainga a Omri, ma hegau alodahi a de huaabodu o Ahab; goodou e daudali i alaadeu hagasaele. Deelaa ai, au e hai naa goe gi ngadi dagodo, gai oo dangada e hai naa ga llele mouli o dangada, ma de hagangadi mee ina daho dangada.”