Micah 3 - De Beebaa Dabu

De hagaseegina o denga dagi ma denga pelaabisi

¹ Gai au ne hagadaba: “Denga biho o Jacob, ma dagi o de gau Israel, goodou hagalaangona. E dee se mee heohi doodou hai gi iloo de hagamodu heohi?

² Goodou ni dangada e kino i tanuaa gai e llodo i de baubau; goodou e bei denga manu e holeholea laa gili o ogu dangada ma de aau gee kano i olaadeu ivi.

³ Goodou e gai kano o ogu dangada ma de holehole olaadeu gili, gai e hadihadi olaadeu ivi gi too dagidahi; goodou e duuduu gilaadeu bei kano manu i lo te anibada, ma kano e hhao ange laa gi lo te kamaa.”

⁴ Gai gilaadeu e tangi ange naa gi Tagi Maolunga, aagai ia e dee basa ange naa donu gi gilaadeu. Ia e huli gee naa i gilaadeu i de masavaa laa, i hiidinga de baubau alaadeu hegau.

⁵ E hagadaba Tagi Maolunga: “Dagodo o denga pelaabisi e hagasengalia laa ogu dangada, noo dangada e haangai ange gilaadeu, gai gilaadeu ga hagataba, ‘De baba gi dagodo i oo daha;’ noo tangada e dee haangai ange gilaadeu, gai gilaadeu ga hagadabena e hebagi ange gi de ia.

⁶ Deenei ai, de boo e dae mai naa gi goodou, gu deai oodou midi hagaago ange e gidee, gai gu gohu, goodou gu dee maua i de tala mee e loomai. Denga pelaabisi e dee gidee naa de laa, gai de laangi e hai naa ga gohu ange gi gilaadeu.

⁷ Gai gilaadeu e daalaa mee e loomai e dookaa naa, de gau hai huuhuaa mee e hagangadi mee ina naa. Gilaadeu alodahi e dookaa naa ga haoli olaadeu mada, go hiidinga de Maadua gu dee basa ange gi gilaadeu.”

⁸ Aagai ogu dagodo, au gu hhao ma gu honu i de mmahi ma de Hagasaalunga o Tagi Maolunga, ma de hagamodu heohi, aama de mmahi, e tala ange ai gi Jacob ono haisala, ma de tala ange gi Israel ono baubau.

⁹ Goodou dagi o dangada o Jacob, goodou dagi o de gau Israel, nnoho mai hagalaangona. Goodou e kino i de hagamodu muna heohi, gai e hagahaisala mee heohi alodahi.

¹⁰ Goodou ne hagaduu Zion i dodo o dangada, gai ne hagaduu Jerusalem i de baubau.

¹¹ Dagi o Jerusalem e hagamodu muna e kave ai denga ngadi gaavange hagasenga, de gau haimeedabu e agoago e kave ai dahi hagaoanga, gai denga pelaabisi e tala mee tigi loomai e kave ai denga sseene. Aagai gilaadeu e hagataba bolo delaadeu tali go Tagi Maolunga, “E aha, Tagi Maolunga e dee noho nei i odaadeu daha? E deai naa donu se hai ngadaa e baa i gidaadeu.”

¹² Deenei ai, Zion e hagabalabala ina naa bei de veelenga i oodou hiidinga. Jerusalem e bei naa dahi hagabuudungaa mee maoha, gai tuuduu iai laa de temple e hai naa ga se lodo mee muimui.