Micah 1 - De Beebaa Dabu

¹ Tagi Maolunga ne hagailoo ange ana muna gi a Micah taane Moresheth, i de masavaa o Jotham, ma Ahaz, aama Hezekiah e hodooligi ai i Judah. Gai ne hagaago ange gi de ia dagodo mee e hai ange gi Samaria ma Jerusalem.

De hagaduasala o Samaria ma Jerusalem

² Goodou denga huaadangada alodahi, nnoho mai hagalaangona, henua i lalo ma dangada alodahi e nnoho ai, goodou aanga mai hagalaangona, gai de Ia Aamua go Iahweh ga hagabaubau goodou, de Ia Aamua mai i dono temple dabu.

³ Tilo, Tagi Maolunga e humai i dono mommee noho, ia gu hano iho e seesee i honga mommee maolunga o henua i lalo.

⁴ Denga mounga gu vaivai i lalo luoono vae, gai denga geelonga gu mahangahanga, bei denga wax e vaivai laa i de ahi, ma denga vai e ssali iho laa i de madadaagodo.

⁵ Mee nei gu hai i hiidinga haisala o Jacob, ma hiidinga baubau o de gau Israel. Dee hee de haisala o Jacob? E dee go Samaria? Gai dee hee de mommee daumaha o Judah? E dee go Jerusalem?

⁶ “Deenei ai, au e hai naa Samaria gi se hagabuudungaa gainga, gai gi se mommee e doo ai denga veelengaa grape. Au e dili iho naa ono hadu gi lo te geelonga, ma de hai gi ssula age ono dagelo.

⁷ Ono diinonga alodahi e oha naa ga too dagidahi; ana mee ngadi gaavange alodahi e dudu naa i de ahi; gai au e oha naa ono diinonga alodahi. Go hiidinga ana mee ngadi gaavange go de hagaoanga o denga haahine hai be se manu, deelaa ai, gilaadeu e aahe ange naa ga kave de hagaoanga o denga haahine hai be ni manu.”

De tangi ma de hinangalosaa

⁸ Go hiidinga o de mee nei oogu e dangi ai ma de dangi see; au e aau naa ogu mee vae ma de gilisau ga hano saele ai. Au e dangi naa bei denga jackal, ma de gonogono bei de owl.

⁹ Go hiidinga dono maanuga gu dee maua gi mahu, gai gu lele ange hogi gi Judah; gai gu dae gi haitoga o Jerusalem, go de aduhale o ogu dangada.

¹⁰ Aude daalaa mee nei i Gath, gai koe aude dangi donu; gai dige saele i lodo gelegele i Beth Ophrah.

¹¹ Dangada e nnoho i Shaphir, goodou seesee hulo i doodou dookaa ma de gilisau. Dangada e nnoho i Zaanan e dee ssao mai gi tua de buibui. Beth Ezel gu hinangalosaa; go hiidinga delaadeu buibui gu gaavee gee.

¹² Dangada e nnoho i Maroth e tali delaadeu bale danuaa, go hiidinga de hagaduasala gu humai i daho Tagi Maolunga gai gu dae mai donu gi de haitoga o Jerusalem.

¹³ Goodou dangada e nnoho i Lachish, noonoodia ange denga hoosa gi de hada hebagi. Go koe taamada o haisala o tamaa hine o Zion, go hiidinga goodou ne ago ange i haisala o Israel.

¹⁴ Deenei ai, koe e gaavange hanu mee ngadi gaavange gi Moresheth Gath. De aduhale go Aczib e daahanga naa denga hodooligi o Israel.

¹⁵ Au e gaamai ange naa dahi gi hagadee kii ina goodou, dangada e nnoho i Mareshah. De gau aamua o Israel e saavini naa ga mmuni i Adullam.

¹⁶ Dangada o Judah, dahia gi malali oodou biho i doodou hinangalosaa i oodou dama e malangilangi ai. Haia gi malali oodou biho bei de igele gu deai laa ono hulu manu, go hiidinga gilaadeu e hulo gee naa i oodou daha ga hulo gi dahi henua gee.