Matthew 8 - De Beebaa Dabu

De hagaieiangi a Iesu taane lebelaa

¹ De masavaa o Iesu ne ahe iho ai i de mounga, gai dangada soa ga daudali ange i de ia.

² Gai tilo, dahi daane lebelaa ne humai ga duuduli i ono mada i mua, ga hai ange, “Tagi Maolunga, noo koe e lodo, gai koe e maua donu i de hai au gi gilimalali.”

³ Gai ia ga haalo dono lima ga poo ange ia, ga hai ange. “Au e lodo, koe gu gilimalali!” De masavaa laa donu huu gai taane laa gu ieiangi.

⁴ Gai Iesu ga hai ange gi de ia, “Aude daalaa ange mee nei gi dahi dangada daudahi, gai koe hannoo hagaagona ange goe gi tangada haimeedabu, ma de hai ssigidaumaha gi bei dagodo muna a Moses, e hagadonu ai ⌊doo ieiangi⌋ i olaadeu daha.”

De ieiangi o tangada hai hegau o tagi o de lau

⁵ De masavaa o Iesu ne ulu ai i Capernaum, gai dahi dagi o de lau ne humai ga dangidangi ange gi de ia,

⁶ ga hai ange, “Tagi Maolunga, dogu dangada hai hegau e made dono angaanga ma e dagodo i de hale, ia e sae mmao.”

⁷ Gai Iesu ne hai ange gi de ia, “Au e hano donu e hagaieiangi ia.”

⁸ Aagai tagi o de lau ne hai ange gi de ia, “Tagi Maolunga, au e dee bau ange gi de hagaulu goe i dogu hale. Aagai koe daalaa donu huu de muna, gai dogu dangada hai hegau gu ieiangi.

⁹ Go hiidinga au se dangada hogi e noho i lalo ssauaa o dahi, gai e soa daane hebagi i ogu lalo. Gai noo au e hai ange gi dahi, ‘Hannoo!’, gai ia ga hano; be au e hai ange gi dahi, ‘Humai!’, gai ia ga humai; aabe e hai ange gi dogu dangada hai hegau, ‘Haia de mee nei!’, gai ia ga hai.”

¹⁰ De masavaa huu a Iesu ne langona ai ana muna, gai ia gu lele ono mouli ga hai ange gi dangada e daudali ange laa i de ia, “Ni muna abodonu aagu e hai adu nei gi goodou, au tigi gidee dahi gai laumalie bee nei i magavaa o de gau Israel.

¹¹ Au e hai adu gi goodou: dangada soa e loomai naa i dua aama mai i dai ga nnoho madali Abraham, ma Isaac, aama Jacob i de nohoanga hodooligi o de langi.

¹² Aagai dangada niiolaadeu de nohoanga hodooligi e tili naa gi lo te gohu i duaahaho, go de mommee o de tangi ma de hagaida ai gauvae.”

¹³ Gai Iesu ne hai ange gi tagi o de lau, “Hannoo! Gai e hai donu gi bei dagodo o doo gai.” Gai dono dangada hai hegau gu ieiangi i de aoaa laa donu huu.

De hagaieiangi a Iesu dangada soa

¹⁴ Iesu ne hano hogi gi de hale o Peter, gai ia gu gidee ssaulaba o Peter gu magi ma gu vvela de angaanga.

¹⁵ Gai ia ga poo ange dono lima; gai dono angaanga gu dee vvela. Aagai de hine laa ga hidi age ga hai ange hanu gai e gaimee ai gilaadeu.

¹⁶ De ahiahi laa gai dangada ne gaamai gi Iesu dangada soa iai denga hagasaalunga baubau, gai ia ne hai gi hulo denga hagasaalunga laa i dahi muna daudahi, ma de hagaieiangi denga magi alodahi.

¹⁷ De mee nei ne hai e hagassula ai mee gu tala i daho de pelaabisi go Isaiah, e hagadaba, “Ia ne kave odaadeu baageaa ma de hagauda odaadeu magi.”

Mee e buibuia dangada gi dee daudali ange i Iesu

¹⁸ Gai ga gidee huu e Iesu bolo gu kona de soa dangada i kilaa, gai ia ga hai ange gi ana dangada agoago gilaadeu ga hulo gi de baasi laa o de vai.

¹⁹ Gai dahi daane sisi ne humai ga hai ange gi Iesu, “Tangada Agoago, au e lodo e daudali adu i de goe i mommee alodahi oou e hano aagena.”

²⁰ Iesu ne hai ange gi de ia, “Denga gaaduu de vao e hanu olaadeu haonga, gai denga manu llele e hanu olaadeu hoohanga, gai Tama a Tangada e deai donu se mommee e hagadagodo ange aagena dono biho.”

²¹ Dahi ana dangada agoago ne hai ange gi de ia, “De Ia Aamua, dugua mai au e hano e danu dogu damana i mua.”

²² Aagai Iesu ne hai ange gi de ia, “Daudali mai i de au, gai dugua ange gilaadeu e maakau gi danumia alaadeu maakau.”

De hagasee a Iesu de madangi mmahi

²³ Gai Iesu ne gage gi lo te boose, gai ana dangada agoago ne hulo hogi madali ia.

²⁴ Gai tilo, gu ssau mai de madangi mmahi gi honga de vai laa, gai delaadeu boose gu dai abulu. Aagai Iesu e seni.

²⁵ Gai ana dangada agoago ga loomai ga hhango ia, ga hai ange, “De Ia Aamua, hagaola ina gidaadeu, gidaadeu ga maakau nei.”

²⁶ Iesu ne hai ange gi gilaadeu, “Gu aha gu maatagu ai naa goodou? Oodou kai e vaaligiligi mmao!” Aagai ia ga hagasee de madangi ma de vai, gai gu malino ange hogi.

²⁷ Gai ana dangada agoago gu llele mouli ga hagataba, “Se dangada bee hee deenei? De madangi ma de vai ne hagallongo ange gi de ia!”

De hagaieiangi o luu daane iai hagasaalunga baubau

²⁸ Gai dono masavaa huu ne dae ai gi de baasi laa o de vai, i de henua o de gau Gadarene, gai ia gu hedae ange gi e dogolua daane iai denga hagasaalunga baubau, e ssao mai i lodo daanunga. Gilaau e kona mmao de hagamaatagu olaau dagodo, deelaa ai, gu deai dangada e maua i de loomai laa kilaa.

²⁹ Gai luu daane laa ne hevaalogi ga hai ange, “Ni aha oou e lodo ai i omaau daha, Tama Daane a de Maadua? Koe e humai naa e hagammae gimaau i mua de masavaa?”

³⁰ Gai e dahi hagabuulingaa biigi e gaimee i dahi mommee i kilaa.

³¹ Gai denga hagasaalunga baubau laa ne dangidangi ange gi Iesu, ga hai ange, “Noo koe e hai gimaadeu gi hulo, gai koe haia gimaadeu gi hulo gi ulu ange gi lodo biigi laa.”

³² Iesu ne hai ange gi gilaadeu, “Goodou hulo.” Gai gilaadeu ne sasao ga hulo ga ulu ange gi lodo biigi laa. Gai biigi laa alodahi gu saavini iho i de hadi aho ga hulo gi lo te vai, gai gilaadeu alodahi gu maalemo.

³³ Gai dangada e diiloo ange laa denga biigi ga saavini ga hulo gi de aduhale ga tala mee hugadoo gu hai laa, ma mee gu hai ange gi luu daane iai laa denga hagasaalunga baubau.

³⁴ Gai dangada alodahi i de aduhale laa gu loomai e hedae ange gi Iesu. Gai de masavaa huu alaadeu ne gidee ai ia, gai gilaadeu ga dangidangi ange ia gi hano gee mai i delaadeu ungaamee.