Matthew 7 - De Beebaa Dabu

Aude hagamodu ina muna o dahi

¹ “Goodou gi dee hagamodu ina muna o dahi, gi dee hagamodu ina ai oodou muna.

² Go hiidinga goodou e hagamodu naa hogi oodou muna, bei doodou hai ne hagamodu ai muna o de gau ange laa, gai de hagabaaunga oodou e hagabau ange ai gi dangada, go de hagabaaunga hogi e hagabau adu ai gi goodou.

³ Gai gu aha goe gu galo ange ai naa e tilo talaa gainga i lo te ganomada o doo daina, aagai koe e dee gidee tuudangaa laagau i lo too ganomada donu?

⁴ Aabe dee hee dau hai e maua ai i de hai ange gi doo daina, ‘Humai gai au ga aau mai talaa gainga i lo too ganomada naa,’ gai e dahi duudangaa laagau e dagodo i lo too ganomada donu?

⁵ Koe se dangada e daahangadia dangada! Aaua mai i mua tuudangaa laagau i lo too ganomada donu, gi gidee danuaa ai e goe i de aau mai talaa gainga i lo te ganomada o doo daina.

⁶ Goodou gi dee gaavange gi denga gaaduu denga mee dabu; goodou gi dee dilia ange oodou ango gi denga biigi, gilaadeu kana dagadagahi gi lalo olaadeu vae, gai ga huuhuli adu ga hangahanga goodou.

Dangidangi, saalaa, gai dugidugi

⁷ “Dangidangi gai e gaavadu naa donu gi goodou; saalaa gai goodou ga gidee; dugidugi gai e hhuge adu naa donu gi goodou.

⁸ Go hiidinga tangada e dangidangi e maua naa donu ana mee, gai tangada e saalaa e gidee naa donu, gai tangada e dugidugia e hhuge ange naa donu de haitoga gi de ia.

⁹ Gai goai i oodou magavaa e gaavange gi dana dama dahi hadu, noo ia e dangidangi adu i hanu pelaoaa?

¹⁰ Aabe ia e dangidangi adu i hanu mamu, gai dono damana ga gaavange dahi labodo gi de ia?

¹¹ Deenei ai, goodou ni dangada baubau, aagai goodou e iloo i de gaavange mee danuaa gi oodou dama; gai e kii ange donu doodou Damana i de langi i de maua i de gaavange mee danuaa gi gilaadeu e dangidangi ange ai gi de ia!

¹² Deenei ai, mee alodahi oodou e llodo dangada gi haia adu gi goodou, gai goodou haia ange hogi gi gilaadeu; deenei de hainga ma muna a denga pelaabisi.

De haitoga damaa mee

¹³ “Goodou ulu i de haitoga mada damaa mee, go hiidinga de haitoga e hano laa ga duu ange gi de hagaduasala e mada laumalie ma de lahalaha, gai e soa dangada e ulu ai.

¹⁴ Aagai e mada damaa mee de haitoga ma de gasogaso de haiava e hano gi de mouli, gai e sogoisi donu huu e gidee.

De manu somo ma ono hua

¹⁵ “Goodou kana ange dagidiiloo denga pelaabisi hadu muna, gilaadeu e kahu naa bei denga ssiibi e loomai ai gi oodou daha, aagai olaadeu lodo e bei denga wolf.

¹⁶ Gai goodou e madea naa gilaadeu i olaadeu hua. E aha, e maua e gidaadeu i de hagihagi hanu grape mai i denga manu daladala, aabe go hua o de fig mai i denga manu dabeo?

¹⁷ Gai e bei ai hogi, denga manu danuaa e hhua mai ai hua danuaa, aagai manu baubau e hhua mai ai hua baubau.

¹⁸ De manu somo danuaa e dee maua gi hhua mai ai hua baubau, aagai de manu baubau e dee maua hogi gi hhua mai ai hua danuaa.

¹⁹ Manu ssomo alodahi e dee maua gi hhua e sele donu ga tili ange gi lo te ahi.

²⁰ E bei ai hogi, goodou e madea naa gilaadeu i olaadeu hua.

Au e dee iloo donu goodou

²¹ “E dee go dangada alodahi e hagahia mai, ‘Tagi Maolunga, Tagi Maolunga’ e ulu i de nohoanga hodooligi o de langi, aagai go gilaadeu donu huu e haia lodo o dogu Damana i de langi laa.

²² De laangi laa gai e soa naa dangada e hai mai gi de au, ‘Tagi Maolunga, Tagi Maolunga, gimaadeu ne pasa pelaabisi i doo ingoo, ma de hai gi hulo denga hagasaalunga baubau, aama de hai denga mee hagalele mouli lagolago i doo ingoo!’

²³ Aagai au e hai ange naa gi gilaadeu, ‘Au e dee iloo donu goodou. Goodou hulo gee mai i ogu daha, goodou ni dangada e haia de baubau!’

Luu daane hagatuu hale

²⁴ “Deenei ai, dangada alodahi e langona agu muna nei ga hai hegau ai, e bei dagodo o tangada heiangi e hagaduu laa dono hale i honga de baba.

²⁵ Gai ga pala iho huu de langi, ga hagahonu age de vai, ma de ssau de madangi ga usu de hale laa, gai tee maua gi baguu, go hiidinga ne hagaduu i honga de baba.

²⁶ Gai tangada e langona agu muna gai e dee hai hegau ai, e bei dagodo o tangada lodo senga e hagaduu laa dono hale i honga de gelegele.

²⁷ Gai ga pala iho huu de langi, ga hagahonu age de vai, ma de ssau mai de madangi ga usu de hale laa; gai gu baguu ga maoha alodahi!”

Ssauaa o Iesu

²⁸ Gai ga lava huu muna a Iesu, gai dangada soa i kilaa gu llele mouli i ana agoago,

²⁹ go hiidinga ia e agoago bei tangada iai ssauaa, e dee bei de gau sisi.