Matthew 6 - De Beebaa Dabu

Abodonu ange gi de gau hagaau aloha

¹ “Goodou kana dagidiiloo gi dee haia e goodou denga hegau danuaa gi gidee ai e dangada. Noo goodou e hai mee nei, gai e deai donu oodou hagaoanga mai i daho doodou Damana i de langi laa.

² Deenei ai, noo goodou gu gaavange hanu mee gi tangada e duasala, aagai goodou gi dee ilihia denga trumpet i mua, bei dagodo hegau a dangada e daahangadia dangada, i denga synagogue ma honga denga haiava, gi duuhia ai e dangada gilaadeu. Ni muna abodonu aagu e hai adu nei gi goodou, gilaadeu gu lava donu i de kave olaadeu hagaoanga.

³ Aagai de masavaa naa huu oodou e gaavange ai dahi mee gi tangada gu duasala laa, gai goodou haia gi dee iloo e doo lima masui mee a doo lima madau gu hai,

⁴ gi dee iloo ai e dangada oodou mee gu ngadi gaavange. Aagai doodou Damana e gidee laa mee e dee gidee ga hagao adu ai goodou.

Agoago i dagodo o talodalo

⁵ “Gai de masavaa naa huu oodou e dalodalo ai, aagai goodou gi dee ago ange i gilaadeu e daahangadia dangada! Gilaadeu e llodo e tuu e dalodalo i denga synagogue ma dege o denga haiava, gi gidee ai e dangada alaadeu hegau. Ni muna abodonu aagu e hai adu nei gi goodou, gilaadeu gu lava donu i de kave olaadeu hagaoanga.

⁶ Gai noo goodou gu dalodalo, aagai goodou ulu gi lodo oodou aabi, ga pono de haitoga, aagai goodou ga dalodalo ange gi doodou Damana e dee gidee laa. Gai doodou Damana e gidee laa mee e dee gidee ga hagao adu goodou.

⁷ Goodou aude ngadi daalaa hanu muna lagolago i doodou masavaa e dalodalo ai, bei de hai o denga Gentile e dalodalo ai. Gilaadeu e maanadu bolo de Maadua e hagallongo alaadeu dalodalo noo gilaadeu e hagalloa alaadeu dalodalo.

⁸ Goodou aude ago ange i gilaadeu, go hiidinga doodou Damana e lava donu i dana iloo oodou mee e duasala ai, i mua doodou dangidangi ange gi de ia.

⁹ Gai deenei doodou hai e dalodalo ai: ‘Demaadeu Damana i de langi laa, gi dabu doo ingoo;

¹⁰ gi humai doo nohoanga hodooligi; gai gi hai oo lodo i henua i lalo, bei de hai e hai ai laa i de langi.

¹¹ Koe gaamai gai e danuaa mai gi gimaadeu ailaa nei.

¹² Gai daalaa omaadeu haisala bei demaadeu tala haisala olaadeu e haisala mai gi gimaadeu.

¹³ Gai gi dee dagia ange gimaadeu gi de hagatale, aagai hagaola ina gimaadeu mai i de ia baubau laa.’

¹⁴ Go hiidinga noo goodou e degi ange gi haisala o dangada, aagai doodou Damana i de langi laa e degi adu hogi gi goodou.

¹⁵ Gai noo goodou e dee degi ange gi haisala o dangada, aagai doodou Damana i de langi e dee degi adu hogi gi oodou haisala.

Agoago i dagodo o de hagahiigai

¹⁶ “Noo goodou e hagahiikai, gai goodou gi dee haia gi dagodo hagaaloha oodou mada, bei dagodo olaadeu e daahangadia dangada. Gilaadeu e hai gi dagodo hagaaloha olaadeu mada, gi gidee ai e dangada bolo gilaadeu e hagahiikai. Ni muna abodonu aagu e hai adu nei gi goodou, gilaadeu gu lava donu i de kave olaadeu hagaoanga.

¹⁷ Gai noo goodou gu hagahiikai, aagai goodou hagasulu ina oodou biho ga hhui oodou mada,

¹⁸ gi dee gidee ai e dangada bolo goodou e hagahiikai, aagai doodou Damana e dee gidee laa. Gai doodou Damana e gidee laa mee e dee gidee ga hagao adu ai goodou.

De lava i de langi

¹⁹ “Goodou gi dee hagaduulia oodou goloa hagamogomogo i henua i lalo, go de mommee e gaina ai e de goa ma de hongagelegele baalanga, aama de gaiaadia e de gau gaiaa.

²⁰ Aagai hagaduulia oodou goloa hagamogomogo i de langi, go de mommee e deai goa iai ma tee hongagelegele baalanga, aagai de gau gaiaa e dee maua i de ulu e gaiaa.

²¹ Go hiidinga go hee naa huu iai oodou goloa hagamogomogo, gai go kilaa hogi iai oodou lodo.

De laama o de angaanga

²² “De ganomada go de laama donu o de angaanga. Deenei ai, noo e danuaa luoo ganomada, gai doo angaanga alodahi e maalama;

²³ gai noo e baubau luoo ganomada, gai doo angaanga alodahi gu gohu. Aagai noo gu hagagohu de maalama i oo lodo, gai gu kona donu de laumalie de gohu!

De Maadua ma oo goloa

²⁴ “E deai donu se dangada e maua i de hai hegau ange gi e dogolua dangada aamua; go hiidinga ia e kino naa i dahi gai e aloha i de ia ange laa, aabe ia e hagapigi ange naa gi dahi gai ga hagangadi mee de ia ange laa. Goodou e dee maua hogi i de hai hegau ange gi de Maadua ma sseene.

Goodou aude manavasaa

²⁵ “Deenei ai, au e hai adu gi goodou, goodou aude manavasaa i oodou mouli, ma oodou mee e gai, be go oodou mee e unu, aabe gi manavasaa i oodou angaanga, ma oodou mee e kahu ai. E aha, e dee hagamogomogo ange de mouli o tangada i denga gai, gai de angaanga e hagamogomogo ange i malo e kahu ai?

²⁶ Goodou kalo ange diiloo denga manu llele: gilaadeu e dee doo, be hagihagi, aabe hagabudu alaadeu gai i mommee doange; aagai doodou Damana i de langi laa e haangai ange gilaadeu. Gai goodou e kii ange donu i de hagamogomogo i denga manu nei.

²⁷ Gai goai i oodou magavaa e maua i de hagapuni ange dahi aoaa e hagalooloa ai dono mouli, i dana maanadu ga manavasaa ai?

²⁸ Aagai gu aha goodou gu manavasaa ai naa i oodou mee e kahu ai? Goodou kalo ange diiloo de hai o denga lilii i lo te duu malaelae e ssomo ai. Gilaadeu e dee hai hegau aabe e llanga olaadeu malo,

²⁹ gai au e hai adu gi goodou, Solomon ma dono mahamaha alodahi tee gahu hagadanuaa donu bei denga manu nei.

³⁰ Aagai noo de Maadua e hakahu danuaa denga helii i lo te duu malaelae, go mee e ssomo laa ailaa nei, gai daiao gu tili ange gi lo te ahi, aagai e dee kii ange naa donu dana hakahu goodou — goodou de gau vaaligiligi oodou kai?

³¹ Deenei ai, goodou gi dee manavasaa gi hagataba, ‘Ni aha amaadeu e gai? Gai ni aha amaadeu e unu? Gai ni aha omaadeu e kahu ai?’

³² Aanei mee a denga Gentile e hagaduu ngae ma e ssala, gai doodou Damana i de langi e iloo oodou mee alodahi e duasala ai.

³³ Aagai goodou saalaa i mua nei de nohoanga hodooligi o de Maadua ma dono heohi, gai mee nei alodahi e gaavadu naa donu gi goodou.

³⁴ Deenei ai, goodou gi dee manavasaa ange gi daiao, go hiidinga daiao e hanu naa hogi mee hagamanavasaa iai. Denga laangi alodahi e hanu hugadoo hai ngadaa iai.