Matthew 5 - De Beebaa Dabu

De agoago i honga de mounga

¹ Gai ga gidee huu e Iesu dangada soa laa, gai ia ga hanage ga noho i honga dahi duuduu. Gai ana dangada agoago ga loomai gi ono daha,

² gai ia ga daamada de agoago ange gilaadeu, ga hai ange:

De manuuia abodonu

³ “E manuuia gilaadeu e hagaau aloha i de hagasaalunga; niiolaadeu de nohoanga hodooligi o de langi!

⁴ E manuuia gilaadeu e daemaha olaadeu lodo; gilaadeu e hagamaamaane naa olaadeu lodo!

⁵ E manuuia gilaadeu e daudonu; go gilaadeu e henua i henua i lalo!

⁶ E manuuia gilaadeu e hiikai ma de hieunu ange gi de heohi; gilaadeu e hai naa ga boobosu!

⁷ E manuuia gilaadeu e llodo aaloha; gilaadeu e kave naa hogi de lodo aloha!

⁸ E manuuia gilaadeu e gilimalali olaadeu lodo; go gilaadeu e gidee de Maadua!

⁹ E manuuia gilaadeu e hagadanuaa ina magavaa o dangada; gilaadeu e hagabinga naa go dama a de Maadua!

¹⁰ E manuuia gilaadeu e vaivai haia i hiidinga o de mee heohi; niiolaadeu de nohoanga hodooligi o de langi!

¹¹ E manuuia goodou noo e pasa baubau dangada i goodou, ma de vaivai hai goodou, aama de tala denga hagadaagangaa muna hhadu, e hai baasi adu ai gi goodou i ogu hiidinga.

¹² Goodou llodo danuaa ma de malangilangi, go hiidinga e laumalie doodou hagaoanga i de langi. Gilaadeu ne vaivai hai donu hogi denga pelaabisi i mua.

Ssoolo ma de laama

¹³ “Go goodou soolo o de henua. Aagai noo denga soolo gu dee mami soolo, gai dee hee ai naa de hai e hagaahe ange ai e hai gi mami soolo? Gu deai ono haigamaiana, gai go de tili ange donu huu gi de mommee e dagadagahia ai e dangada.

¹⁴ Go goodou de maalama o henua i lalo. De aduhale e duu i honga de mounga e dee maua i de hagammuni.

¹⁵ Dangada e dee haula de laama ga haoli ange i lalo dahi bagede, aagai e dugu ange gi honga dono mommee, e hagamaalama ai dangada alodahi i de hale.

¹⁶ Goodou haia gi gidee e dangada de maalama i oodou daha naa, gai gi gidee ai e gilaadeu oodou hegau danuaa, gai gilaadeu ga tuhi ai doodou Damana i de langi laa.

De agoago i dagodo o de hainga

¹⁷ “Goodou aude hagataba bolo au se humai e oha de hainga ma muna a denga pelaabisi. Au tee humai e oha de hainga, aagai au ne humai e hagasula de hainga.

¹⁸ Ni muna abodonu aagu e hai adu nei gi goodou, de langi ma henua i lalo e llilo naa donu, aagai e deai donu se damaa hagailonga be se doonginga daudahi i de hainga e lilo, ga dae ai gi de odi mee nei i de hagassula.

¹⁹ Deenei ai, be goai e dee daohia dahi hainga damaa mee nei, ma de agoago ange dangada gi dee haia mee nei, gai go ia hugadoo e maolalo i de nohoanga hodooligi o de langi. Aagai be goai e daudali ai ma de agoago mee nei, gai ia e hagabinga bolo e maolunga i de nohoanga hodooligi o de langi.

²⁰ Au e hai adu gi goodou, noo oodou heohi e dee kii ange i heohi o de gau sisi ma denga Pharisee, gai goodou e dee ulu donu i de nohoanga hodooligi o de langi.

De agoago i dagodo o de lili

²¹ “Goodou gu langona bolo gu tala ange gi de gau madagidagi, ‘Aude daia tangada gi magau; aagai be goai e daia tangada ga magau e hagamodu donu ono muna.’

²² Aagai au e tala adu gi goodou, be goai e lili i dono daina, gai e hagamodu donu ono muna; gai e bei ai hogi, be goai e hai ange gi dono daina, ‘Raca’, gai e hagamodu ono muna i mada i mua o de hagabuulinga hagasaele. Gai be goai e hai ange gi dono daina, ‘Koe se boi donu’, gai e hagaduasala donu i de ahi.

²³ Deenei ai, noo koe gu kave dau sigidaumaha gi de mommee o ssigidaumaha, gai koe gu manadua bolo doo daina e dahi ana mee e hai baasi adu ai gi de goe,

²⁴ gai koe dugua dau mee ngadi gaavange i gaogao de mommee o ssigidaumaha, gai koe hannoo i mua hagadanuaa ina ooluu magavaa ma doo daina, gai koe ga aahe mai ga gaavange dau mee ngadi gaavange.

²⁵ Hagamoolau hagaheloongoi ina ooluu magavaa ma doo hagadaumee, i de masavaa ooluu e seesee ai e hulo gi de mommee hagamodu muna, ana vakaa ga gaavange e ia goe gi de ia hagamodu muna, gai de ia hagamodu muna ga gaavange goe gi tangada hagaloosi, gai koe gu tili ange gi lo te hale pono.

²⁶ Ni muna abodonu aagu e hai adu nei gi de goe: koe e dee sao mai naa donu ga dae ai gi dau hagao au muli alodahi.

De agoago i dagodo o de dagodo haisala

²⁷ “Goodou gu langona bolo gu tala e hai ange, ‘Aude dagodo haisala.’

²⁸ Aagai au e hai adu gi goodou: be goai e galo ange gi dahi hahine e lodo ange gi de ia, gai ia gu dagodo haisala donu ma ia i ono lodo.

²⁹ Noo doo ganomada madau gu hagahaisala goe, aagai koe laoa mai dilia. E danuaa ange de tili dahi mee i doo angaanga i de maga ange o doo angaanga alodahi gi lo te ahi.

³⁰ Aagai noo doo lima madau gu hagahaisala goe, aagai koe duudia dilia. E danuaa ange de tili dahi oo lima, i de maga ange doo angaanga alodahi gi lo te ahi.

Agoago i dagodo o de maavae

³¹ “Gai gu tala hogi e hai ange, ‘Be goai naa huu taane e maavae ange gi dono bodu, gai ia gi gaavange gi de ia dahi beebaa maavae.’

³² Aagai au e hai adu gi goodou, be goai e maavae ange gi dono bodu, deelaa donu huu go dono dagodo haisala, gai ia e hai de hine laa gi dagodo haisala. Gai be goai e hai bodu ange gi de hine gu maavae laa gu dagodo haisala donu.

De agoago i dagodo o denga hagatoo donu

³³ “Goodou gu langona gu tala ange gi de gau madagidagi, e hai ange, ‘Aude ngadi haia dahi hagatoo donu soe, aagai haia donu gi bei au hagatoo donu ssoe ange gi Tagi Maolunga.’

³⁴ Aagai au e hai adu gi goodou, goodou e dee hai donu dahi hagatoo donu soe; e dee hilihili be e hai i de langi, i hiidinga go de mommee iai de nohoanga o de Maadua;

³⁵ be gi hagatoo donu i henua i lalo, i hiidinga go de mommee e dugu ange aagena luoono vae; aabe go Jerusalem, i hiidinga go de aduhale o de Hodooligi maolunga.

³⁶ Aude hagatoo donu i doo biho, i hiidinga koe e dee maua donu i de hai dahi sina be se ngaangaaulu uli daudahi.

³⁷ Gai goodou hai ange donu huu, ‘Uaa’ be ‘Deai’; gai muna e kii ange i mee nei ni mee mai i daho de ia baubau laa.

De agoago i dagodo o de sui ange de baubau

³⁸ “Goodou gu langona bolo gu tala e hai ange, ‘De ganomada e sui ange i de ganomada, gai de niho e sui ange i de niho.’

³⁹ Aagai au e hai adu gi goodou, goodou aude suuia ange hegau a tangada baubau, aagai noo dahi dangada e hagaili doo galaahuu madau, gai koe huli ange doo galaahuu ange laa gi de ia.

⁴⁰ Gai noo dahi dangada e lodo e gaavange goe gi de hainga, i hiidinga ia e lodo e kave doo malo gahu, gai koe gaavange hogi gi de ia doo malo laa daha.

⁴¹ Gai noo dahi dangada e hagammahi adu koe gi hano madali ia i e dahi maele, gai koe hannoo madali ia i e lua maele.

⁴² Gai koe gaavange gi tangada e dangidangi adu gi de goe i dahi mee, aude daohia au mee i tangada e lodo laa e hai hegau ai.

Aloha i doo hagadaumee

⁴³ “Goodou gu langona bolo gu tala e hai ange, ‘Aloha i tangada e baa adu gi de goe, gai kino i doo hagadaumee.’

⁴⁴ Aagai au e hai adu gi goodou, aaloha ange gi oodou hagadaumee, gai dalodalo i gilaadeu e vaivai haia goodou,

⁴⁵ gi ni dama ai goodou nii doodou Damana i de langi laa. Ia e hai gi dii de laa i honga o de gau baubau ma gilaadeu e danuaa, gai e hai gi pala iho de langi gi honga olaadeu e heohi, ma gilaadeu e dee heohi.

⁴⁶ Gai noo goodou e aaloha donu huu i gilaadeu e aaloha i goodou, gai e dahi ai naa oodou hagaoanga? E dee aanaa donu hogi hegau a de gau e hagabudulia taagisese e hai?

⁴⁷ Gai noo goodou e hagaboo ange donu huu gi oodou daina, gai e hanu ai oodou mee e dubu ange ai i de gau ange laa? E dee aanaa hogi hegau a denga Gentile e hai laa?

⁴⁸ Deenei ai, goodou gi heohi abodonu, bei doodou Damana i de langi ia e heohi abodonu.