Matthew 4 - De Beebaa Dabu

De hagatale o Iesu

¹ Gai de Hagasaalunga ⌊Dabu⌋ ne dagi Iesu ga kave gi lodo henua e hagatale ai, i daho de ia hagabaubau laa.

² Gai ia tee gaimee i e madahaa laangi ma e madahaa boo, gai ia gu saalohia.

³ Gai de ia hagatale ne humai ga hai ange gi de ia, “Noo go koe donu Tama Daane a de Maadua, gai koe haia hadu nei gi ni duudangaa pelaoaa.”

⁴ Aagai ia ga hai ange, “Gu sisi e hai ange, ‘Tangada e dee mouli donu huu i pelaoaa, aagai ia e mouli donu i muna alodahi e tala i de ngudu o de Maadua.’ ”

⁵ De ia hagabaubau laa ne dagi hogi Iesu gi de aduhale dabu, ga hai ia gi duu i honga dahi dahuuhuu maolunga o de temple,

⁶ ga hai ange gi de ia, “Noo go koe donu Tama Daane a de Maadua, gai koe lele iho. Go hiidinga gu sisi e hai ange, ‘Ia e tala ange naa gi ono dangada de langi oo dagodo, gai gilaadeu ga sigo ai goe i olaadeu lima, gi dee duugia ai doo vae i dahi hadu.’ ”

⁷ Iesu ne hai ange gi de ia, “Gu sisi hogi e hai ange, ‘Koe gi dee hagataalea Tagi Maolunga doo Maadua.’ ”

⁸ Gai de ia hagabaubau laa ne kave hogi ia gi dahi mounga maolunga mmao, ga hagaago ange gi de ia denga nohoanga hodooligi o henua i lalo alodahi ma olaadeu mahamaha,

⁹ gai ia ga hai ange, “Au e gaavadu mee nei alodahi gi de goe, noo koe e duuduli ga ino gi lalo ga daumaha mai gi de au.”

¹⁰ Aagai Iesu ne hai ange gi de ia, “Satan, hano gee mai i ogu daha! Go hiidinga gu sisi e hai ange, ‘Koe gi daumaha ange gi Tagi Maolunga doo Maadua, gai go ia donu huu oou e hai hegau ange aagena!’ ”

¹¹ Gai de ia hagabaubau laa gu hano gee mai i ono daha. Gai tilo, de gau de langi gu loomai ga bale ange ia.

De daamada hegau a Iesu

¹² Gai de masavaa huu a Iesu ne langona ai bolo a John gu noodia ma gu hhao gi lo te hale pono, gai ia ga hano gee i kilaa ga hano gi Galilee.

¹³ Ia ne hano gee hogi i Nazareth ga noho i Capernaum, se aduhale i gaogao de vai, i de vaaenga o Zebulun ma Naphtali,

¹⁴ e hagassula ai muna a de pelaabisi go Isaiah gu tala laa:

¹⁵ “De henua o Zebulun ma de henua o Naphtali, i honga de haiava i gaogao tai, i de baasi dai o Jordan, i Galilee o denga Gentile —

¹⁶ dangada e nnoho i lo te gohu gu gidee e gilaadeu dahi maalama laumalie; gilaadeu e nnoho i de henua o de malu o de magau, de maalama gu hagasula ange gi gilaadeu.”

¹⁷ Mai i de masavaa laa, gai Iesu ne daamada de agoago, ga hai ange, “Daahuli oodou lodo, gu baa mai de nohoanga hodooligi o de langi!”

De hagahi a Iesu denga dangada agoago i taamada

¹⁸ De masavaa o Iesu ne seesee ai i gaogao de Vai o Galilee, gai ia ne hedae ange gi e dogolua hai daina daane, go Simon, dahi ono ingoo laa go Peter, ma dono daina daane go Andrew. Gilaau e tili delaadeu galauna i lo te vai laa, go hiidinga gilaau ni daane haangoda.

¹⁹ Gai Iesu ne hai ange gi gilaau, “Gooluu daudali mai i de au, gai au ga hai gooluu gi ni daane e haangoda ina dangada.”

²⁰ De masavaa laa donu huu, gai gilaau ga dugu alaau galauna ga daudali ange i de ia.

²¹ Iesu ne damaa hanadu ange hogi, gai ia gu gidee e dogolua ange hai daina; olaau ingoo go James ma John. Gilaau e nnoho i lo te boose madali delaau damana go Zebedee, ma e bonobono ange ai alaadeu galauna. Gai ia ne hagahi hogi gilaau.

²² De masavaa laa donu huu gai gilaau ga dugu delaau boose ma delaau damana, gai ga daudali ange i de ia.

De agoago ma de hagaieiangi a Iesu dangada

²³ Gai Iesu ne hagadaga i Galilee alodahi ga agoago i denga synagogue, ga tala de longo danuaa o de nohoanga hodooligi ma de hagaieiangi denga hagadaagangaa magi ma mee hagabaageaa alodahi i daho dangada.

²⁴ Gai ono longo gu dele i Syria alodahi, gai dangada ga gaamai gi ono daha dangada iai denga hagadaagangaa magi alodahi, ma gilaadeu e duasala i de mmae, ma gilaadeu iai denga hagasaalunga baubau, ma gilaadeu e llele age, ma gilaadeu e baagia, gai ia ga hagaieiangi gilaadeu.

²⁵ Gai e soa dangada ne loomai i Galilee ma Decapolis, ma Jerusalem, ma Judea aama de baasi laa o Jordan ga daudali saele i de ia.