Matthew 3 - De Beebaa Dabu

De agoago o John taane Babudaisi

¹ Laangi laa gai a John taane Babudaisi ne hano gi de vao o Judea ga agoago ai,

² ga hai ange, “Goodou daahuli oodou lodo, gu baa mai de nohoanga hodooligi o de langi!”

³ Deenei de ia a de pelaabisi go Isaiah gu tala laa ma e hagadaba, “De leo o dahi e oo i de vao ma e hagadaba, ‘Hagadabena ina de haiava o Tagi Maolunga; hagassoea ono haiava!’ ”

⁴ Gai malo o John e hai i huluhulu o de gamelo, dono beele ni gili kaau. Gai ia e gai denga itebuubuu ma hooni lodo henua.

⁵ De masavaa laa gai dangada o Jerusalem ma Judea, aama dangada alodahi i mommee e paa ange gi ssaalingaa vai go Jordan ne hulo,

⁶ ga babudaisi i daho John i ssaalingaa vai go Jordan ma de tala olaadeu haisala.

⁷ Aagai de masavaa huu a John ne gidee ai denga Pharisee ma Sadducee gu loomai hogi e babudaisi i ono daha, gai ia ga hai ange gi gilaadeu, “Goodou dama a denga labodo hagammau, goai ne hai adu goodou gi hagaola ina goodou mai i de bole gu dai humai laa?

⁸ Goodou hagaagona mai i oodou hegau bolo goodou gu daahuli abodonu oodou lodo.

⁹ Gai goodou aude hagataba, ‘Gimaadeu ni dama nii Abraham’. Au e hai adu gi goodou, de Maadua e maua donu i de hai hadu nei e hai ai dama a Abraham!

¹⁰ Iainei gai de hagadaguu gu dagodo donu i daahido o denga manu ssomo. Deenei ai, manu ssomo alodahi e deai hua danuaa iai e sele iho naa donu ga tili ange gi lo te ahi.

¹¹ Au e babudaisi goodou i vai i de daahuli oodou lodo, gai de ia e humai i ogu dua e maolunga ange i de au; au e dee bau ange gi de aau ono mee vae. Ia e babudaisi naa goodou i de Hagasaalunga Dabu ma de ahi.

¹² Ia e poo de laagau nonu i dono lima, e hagamalaelae ai dana mommee hili huamanu, gai ga hagabudu ana grain e hhao gi lo te hale doange, aagai ga dudu denga gili i de ahi e dee maua laa i de diinei.”

De babudaisi o Iesu

¹³ Laangi laa gai Iesu ne humai i Galilee gi daho John i Jordan e babudaisi ai.

¹⁴ Gai John ne hagatale de buibui ia, ga hai ange, “Go au e heohi de babudaisi i oo daha, gai koe e humai au gi babudaisi ina goe?”

¹⁵ Aagai Iesu ne basa ange ga hai ange, “Hagasula ina de mee nei, e heohi taau hagasula de heohi alodahi.” Aagai a John gu buni ange.

¹⁶ Dua huu de babudaisi o Iesu ga ea age i lo te vai, gai tilo, gu mahuge ange de langi gi de ia, gai ia gu gidee de Hagasaalunga o de Maadua e hano iho, bei dahi manu kono ga doga ange gi ono elunga.

¹⁷ Gai tilo, de leo mai i de langi ne hagadaba, “Deenei dagu Dama Daane hagamogomogo, au e malangilangi i de ia.”