Matthew 26 - De Beebaa Dabu

De hagasaele ange de hai e daa ai Iesu gi magau

¹ Gai ga lava huu i de tala a Iesu muna nei alodahi, gai ia ga hai ange gi ana dangada agoago,

² “Goodou e iloo bolo e lua ange donu huu laangi i mua Taonga Hagasili, gai Tama a Tangada e gaavange naa e daudau i de laagau lui.”

³ Gai de gau haimeedabu maolunga ma denga dagi ne hagabuni i de hale o tangada haimeedabu maolunga go Caiaphas

⁴ e hagasaele ange ai delaadeu hai e poo hagammuni ai Iesu e daa gi magau.

⁵ Aagai gilaadeu ne hagataba, “Gidaadeu e dee poo ia i laangi o taonga laa, ana vakaa ga hellumi dangada.”

De hagasulu o Iesu i de lolo i Bethany

⁶ De masavaa o Iesu e noho ai i de hale o Simon i Bethany, go taane nogo magi lebelaa i mua,

⁷ gai dahi hahine ne humai ma dahi manu alabaster iai vai hagamanongi hagao ngadaa mmao, gai ia ga llingi ange gi honga dono biho, i de masavaa oona e hakaogao ai ma e gaimee i teebele.

⁸ Aagai ga gidee huu e ana dangada agoago mee laa, gai gilaadeu gu llili, ga hagataba, “Gu aha gu moumou ai nei de vai nei?

⁹ De vai nei ne maua donu i de hagao gi daha e hai ai hanu sseene lagolago e gaavange gi de gau hagaau aloha!”

¹⁰ Gai Iesu gu iloo e ia alaadeu muna, ga hai ange gi gilaadeu, “Gu aha goodou gu hakoso ai naa de hine nei? Ia gu hai mai dahi hegau mahamaha gi de au.

¹¹ De gau hagaau aloha e nnoho i oodou daha i masavaa alodahi, aagai au e dee noho i oodou daha i masavaa alodahi.

¹² De hine nei ne llingi mai de vai nei gi dogu angaanga e hagadabena ange ai au gi de danu.

¹³ Ni muna abodonu aagu e hai adu nei gi goodou, be go hee naa huu e tala ai de longo danuaa nei i henua i lalo, aagai hegau a de hine nei e tala naa hogi, e hagamaanadu ai ia.”

De gaavange a Judas Iesu

¹⁴ Aagai dahi i magavaa o tinoangahulu ma dogolua, e hagaingoo ange laa go Judas Iscariot, ne hano gi daho de gau haimeedabu maolunga,

¹⁵ ga ssili ange, “Ni aha oodou e hagao mai ai au noo au e gaavadu Iesu gi goodou?” Gai gilaadeu ne hagao ange ia i e matolu dibaa selevaa.

¹⁶ Mai i de masavaa laa, gai Judas ne ssala dana hai e gaavange ai Iesu gi gilaadeu.

Taonga Hagasili madali denga dangada agoago

¹⁷ Gai tahi laangi huu o Taonga o Pelaoaa Dee Hagahua, gai dangada agoago a Iesu ne loomai ga ssili ange gi de ia, “Go hee aau e lodo gimaadeu gi hagadabena ina ai Taonga Hagasili e gaimee ai goe?”

¹⁸ Ia ne hai ange gi gilaadeu, “Goodou hulo gi daho dahi daane i de aduhale ga hai ange gi de ia, ‘Tangada Agoago e hagadaba: Gu dae mai de masavaa gu hagamodu mai gi de au. Au e hai naa Taonga Hagasili madali agu dangada agoago i doo hale.’ ”

¹⁹ Gai ana dangada agoago ne hulo ga hai gu bei ana muna ne tala ange gi gilaadeu, gai gilaadeu ga hagadabena Taonga Hagasili i kilaa.

²⁰ Gai ga ahiahi huu de mee, gai Iesu ga hakaogao i teebele e gaimee madali tinoangahulu ma dogolua.

²¹ De masavaa olaadeu e gaimee ai, gai ia ga hai ange gi gilaadeu, “Ni muna abodonu aagu e hai adu nei gi goodou, dahi goodou e gaavange naa donu au.”

²² Gai gilaadeu gu daemaha mmao olaadeu lodo, gai dahi ma dahi ne ssili ange gi de ia, “Tagi Maolunga, go au oou e basa ai naa?”

²³ Ia ne hai ange gi gilaadeu, “Tangada e hagasulu ina ange dono lima gi lo te gumedi madali au, go ia donu e gaavange au.

²⁴ Tama a Tangada e hano naa donu bei de hai gu sisi ai ono dagodo, aagai e vakaa naa tangada e gaavange Tama a Tangada! E danuaa ange noo ia tee haanau.”

²⁵ Gai Judas, de ia ne gaavange laa ia ga ssili ange, “Tangada Agoago, go au oou e basa ai naa?” Iesu ne hai ange gi de ia, “Deenaa aau e hagadaba ai naa.”

Taonga Dabu a Tagi Maolunga

²⁶ De masavaa olaadeu e gaimee ai, gai Iesu ga poo mai dahi duudangaa pelaoaa, ga dalodalo ga dohidohi ga gaavange gi denga dangada agoago, ga hai ange, “Gaavee, gaina; go dogu angaanga deenei.”

²⁷ Ia ne poo mai hogi de ubu, ga dalodalo, ga gaavange gi gilaadeu, ga hai ange, “Goodou alodahi unu ai;

²⁸ go hiidinga mee nei go ogu dodo, go dodo o de hagatoo donu hagaheloongoi, ne hagassali laa i hiidinga o dangada soa, e tala ai haisala.

²⁹ Au e hai adu gi goodou, au e dee ahe ange naa donu e unu hua o de grapevine, ga dae ai gi de laangi aagu e unu ai uvaini hoou madali goodou, i de nohoanga hodooligi o dogu Damana.”

³⁰ Gai ga lava huu i delaadeu hua dahi daahili, gai gilaadeu ga ssao ga hulo gi de Mounga o denga Olive.

De tala a Iesu de hagadee iloo a Peter ia

³¹ Iesu ne hai ange gi ana dangada agoago, “Aaboo nei gai goodou alodahi e odi naa donu i de tili au, go hiidinga gu sisi e hai ange, ‘Au e daa naa tangada hagaloosi, gai de hagabuulingaa ssiibi e mavaevae saele naa.’

³² Aagai dua naa huu dogu mouli age, gai au ga hano i oodou mada i mua gi Galilee.”

³³ Peter ne hai ange gi de ia, “Ga odi naa donu gilaadeu alodahi i de tili goe, aagai au e dee tili donu goe.”

³⁴ Iesu ne hai ange gi de ia, “Ni muna abodonu aagu e hai adu nei gi de goe, i mua de goo o de gaagoo daane aaboo nei, gai koe e hagadee iloo naa donu au i e dolu hanonga.”

³⁵ Peter ne hai ange gi de ia, “Ga magau naa donu au madali goe, gai au e dee hagadee iloo donu goe!” Gai denga dangada agoago ange laa alodahi ne tala ange hogi muna mau.

Talodalo o Iesu i Gethsemane

³⁶ Gai Iesu ne hano madali ana dangada agoago gi de mommee e hagaingoo ange laa go Gethsemane. Gai ia ga hai ange gi gilaadeu, “Goodou nnoho i kinei, gai au ga hano e dalodalo i kilaa.”

³⁷ Gai ia ne kave Peter ma luu dama daane a Zebedee madali ia, gai ia gu daemaha mmao ma tee baba ono lodo.

³⁸ Gai ia ga hai ange gi gilaadeu, “Au gu daemaha mmao ogu lodo, gai gu baa ange donu gi de magau; goodou nnoho i kinei dagitilo ai madali au.”

³⁹ Gai ia ne damaa hanadu ange ga hagabaguu gi lalo ga hagabaa luoono mada gi honga de gelegele ga dalodalo, ga hai ange, “Dogu Damana, noo e maua, gai gaavee gee de ubu nei mai i ogu daha; aagai e dee go ogu lodo e hai, gai go oo lodo.”

⁴⁰ Ia ne ahe mai ange gi daho ana dangada agoago ga gidee bolo gilaadeu e sseni. Gai ia ga hai ange gi Peter, “E aha, goodou e dee maua naa donu i de dagitilo madali au i e dahi aoaa?

⁴¹ Goodou dagitilo ma de dalodalo, gi dee tuu ange ai goodou gi de hagatale; de hagasaalunga e lodo mmao, aagai de angaanga gu baageaa.”

⁴² Gai ia ne ahe ange hogi ga dalodalo i de lua hanonga, ga hai ange, “Dogu Damana, noo e dee maua i de kave gee de ubu nei gai au e unu ai donu, gai haia gi bei oo lodo.”

⁴³ Ia ne ahe mai ange hogi ga gidee bolo gilaadeu gu sseni, go hiidinga gilaadeu gu daia ange donu de sseni.

⁴⁴ Deelaa ai, ia ne dugu gilaadeu gai ia ga ahe ga dalodalo i tolu hanonga, ga tala ana muna mau.

⁴⁵ Gai ia ga ahe mai gi daho ana dangada agoago ga hai ange gi gilaadeu, “Goodou goi sseni naa huu ma e hagammabu? Tilo, gu dae mai de aoaa e gaavange ai Tama a Tangada gi de gau haisala.

⁴⁶ Goodou hiihidi age, gidaadeu ga hulo. Tilo, gu dae mai tangada e gaavange au!”

De boogia o Iesu

⁴⁷ De masavaa a Iesu goi basa ai, gai gu dae mai Judas, dahi daane i magavaa o tinoangahulu ma dogolua, gai ia ne gaamai madali ia hanu dangada soa ma alaadeu gadilaasa ma laagau hebagi. Gai gilaadeu ne loomai i daho de gau haimeedabu maolunga ma denga dagi.

⁴⁸ Gai taane ne gaavange laa Iesu ne gaavange dahi hagailonga gi denga daane madali ia, ga hai ange, “Tangada naa huu aagu e oso, gai go ia oodou e poo!”

⁴⁹ Aagai ia ne humai gi Iesu ga hai ange, “Tangada Agoago, de ahiahi danuaa!”, gai ia ga oso Iesu.

⁵⁰ Iesu ne hai ange gi de ia, “Dogu soa, haia be ni aha aau ne humai naa e hai.” Gai denga daane madali ia ga loomai ga poo Iesu ga kave.

⁵¹ Gai tilo, dahi dangada agoago a Iesu ne unusi dana gadilaasa, ga tuu ai gu doo talinga o tangada hai hegau o tangada haimeedabu maolunga.

⁵² Gai Iesu ga hai ange gi de ia, “Hagaahe ange dau gadilaasa gi lo tono hale; go hiidinga dangada alodahi e hebagi i de gadilaasa e daia naa hogi ga maakau i de gadilaasa.

⁵³ Koe e hagadaba bolo au e dee maua i de dangidangi ange gi dogu Damana, gai ia ga hai gi loomai iainei donu, dahi hagabuulingaa dangada de langi, e soa ange laa i de madaangahulu ma lua hagabuulinga hebagi?

⁵⁴ Aagai dee hee ai naa de hai e hagassula ai muna a de Beebaa Dabu, gu tala laa bolo e hai donu?”

⁵⁵ De masavaa laa gai Iesu ne ssili ange gi de hagabuulingaa daane laa, “Goodou ne loomai naa ma denga gadilaasa ma laagau e poo ai au, bei dagodo o dahi dangada gaiaa? Laangi alodahi gai au ne noho i lo te temple ma e agoago ai, gai goodou tee poo au.

⁵⁶ Aagai mee nei alodahi ne hai e hagassula ai muna a denga pelaabisi gu sisi laa i de Beebaa Dabu.” Gai ana dangada agoago alodahi ga tili ia gai ga saavini ga hulo.

Iesu i mada i mua o de hagabuulinga hagasaele

⁵⁷ Gai denga daane ne boogia laa Iesu ne dagi ia ga kave gi de hale o tangada haimeedabu maolunga go Caiaphas, go de mommee o de gau sisi ma denga dagi e hagabuni ai.

⁵⁸ Aagai Peter ne daudali adu i dua o Iesu i de mommee mmao, ga dae ai gi de buibui o de hale o tangada haimeedabu maolunga, gai ia ne ulu gi lodo ga noho madali de gau hagaloosi, e tilo ai be se aha e modu.

⁵⁹ Gai de gau haimeedabu maolunga ma de hagabuulinga hagasaele alodahi, ne ssala hanu dangada hagadonu hadu muna gi hagabaubau ina Iesu, gi maua ai e gilaadeu i de daa ia gi magau.

⁶⁰ Aagai gilaadeu tee maua, e dee galemu donu de soa dangada ne loomai ga hagabaubau ina ia. Muli mai gai e dogolua dangada ne loomai,

⁶¹ ga hai ange, “Taane nei gu hagadaba, ‘Au e maua i de oha de temple o de Maadua, gai ga hagaduu age ange i e dolu donu huu laangi.’ ”

⁶² Gai tangada haimeedabu maolunga ne hidi age ga ssili ange, “E hanu au muna e basa ange ai? Ni muna aha a luu daane nei e tala nei ma e hagabaubau ai goe?”

⁶³ Aagai Iesu e dee muu ange donu. Gai tangada haimeedabu maolunga ga hai ange, “Au e hai adu gi de goe i de ingoo o de Maadua e mouli laa, daalaa mai gi gimaadeu be go koe de Klisdo, Tama Daane a de Maadua.”

⁶⁴ Iesu ne hai ange gi de ia, “Koe e hagadaba bolo go au go ia. Aagai au e hai adu gi goodou, dua iainei gai goodou e gidee naa Tama a Tangada e noho i de baasi madau o de Ia Mmahi laa, ma de humai i honga giliiga o de langi.”

⁶⁵ Gai tangada haimeedabu maolunga ga ssae dono malo laa daha, ga hagadaba, “Ia gu hagangadi mee de Maadua. Ni dangada tala hagadonu aha ange odaadeu e llodo ai? Goodou gu langona dana hagangadi mee de Maadua.

⁶⁶ Dee hee doodou mee gu hagamodu?” Gilaadeu ne hai ange, “E heohi donu dono daa gi magau.”

⁶⁷ Aagai gilaadeu ga savasavale ange gi luoono mada, ma de dugidugi ia i olaadeu lima. Gai hanu ne hagailiili ia,

⁶⁸ ga hai ange, “Klisdo, basa pelaabisi daalaa mai be goai ne hagailia goe!”

De hagadee iloo a Peter Iesu

⁶⁹ De masavaa laa gai Peter e noho i tua de hale i lo te buibui. Gai dahi damaa hine hai hegau ne hai ange gi de ia, “Koe go dahi daane donu nogo hano saele madali Iesu o Galilee.”

⁷⁰ Aagai Peter ne hagadee iloo muna laa i madamada o dangada alodahi i kilaa, ga hai ange, “Au e dee iloo donu au muna e tala mai naa.”

⁷¹ Gai de masavaa oona ne sao ai ga hano gi honga de velanda, gai dahi damaa hine hai hegau ange laa ne gidee ia, gai ia ga hai ange gi dangada e tuu i kilaa, “Taane nei se daane donu madali Iesu taane Nazareth.”

⁷² Gai Peter ga hagadee iloo muna laa ma de hai dahi hagatoo donu soe, ga hai ange, “Au e dee iloo donu taane naa!”

⁷³ Muli mai gai hanu dangada e tuu laa i kilaa, ne loomai ga hai ange gi de ia, “Ni muna abodonu, koe se daane donu madali gilaadeu, go hiidinga doo hai e basa ai e hagaago mai doo mommee ne humai ai!”

⁷⁴ Aagai ia ga daamada de hagamalaia donu huu ia ma de hagatoo donu, ga hai ange, “Au e dee iloo donu taane naa!” De masavaa laa donu huu gai gu goo de gaagoo daane.

⁷⁵ Gai Peter gu manadua e ia muna a Iesu ne hai ange, “I mua de goo o de gaagoo daane, gai koe e hagadee iloo naa donu au i e dolu hanonga.” Aagai ia ga sao ga hano gu dangi mmao.