Matthew 25 - De Beebaa Dabu

De mee hagasengasenga o tinoangahulu bua mmoe

¹ “De masavaa laa gai de nohoanga hodooligi o de langi e bei naa dagodo o tinoangahulu bua mmoe, e kave laa alaadeu laama e hulo ai e hedae ange gi taane gu dai hagahai bodu.

² E dogolima gilaadeu ni haahine llodo ssenga, gai e dogolima e heiangi.

³ Gai de masavaa a denga haahine llodo ssenga ne kave ai alaadeu laama, aagai gilaadeu tee kave hanu lolo,

⁴ aagai gilaadeu e heiangi ne kave hanu manu lolo madali alaadeu laama.

⁵ Gai ga mmule mai huu taane gu dai hagahai bodu laa, gai denga bua mmoe laa gu dai sseni, gai gilaadeu gu sseni.

⁶ Aagai lo te boo huu gai gu hevaalogi dangada ga hagataba, ‘Tilo, gu humai taane gu dai hagahai bodu! Goodou loomai hedae ange gi de ia.’

⁷ Aagai denga bua mmoe laa ga aalahage e hagadabena alaadeu laama.

⁸ Gai denga haahine llodo ssenga laa ne hai ange gi gilaadeu e heiangi, ‘Gaamai hanu oodou lolo maamaadeu, go hiidinga amaadeu laama ga maamade nei.’

⁹ Aagai denga bua moe heiangi laa ne hai ange, ‘Amaadeu lolo e dee dohu ai gidaadeu alodahi. Gai goodou hulo hagao ina mai oodou lolo i daho de gau hagao mee.’

¹⁰ Gai de masavaa olaadeu ne hulo ai e hagao alaadeu lolo, gai gu dae mai taane gu dai hagahai bodu, aagai gilaadeu gu paba laa gu hulo madali ia gi taonga hagahai bodu; gai gu pono de haitoga.

¹¹ Muli mai gai denga bua mmoe ange laa ne loomai hogi, ga hai ange, ‘Tangada aamua, tangada aamua, huugea mai de haitoga e ulu adu ai gimaadeu.’

¹² Aagai tangada aamua laa ga hai ange gi gilaadeu, ‘Ni muna abodonu, au e dee iloo donu goodou.’

¹³ Deenei ai, goodou dagitilo, go hiidinga goodou e dee iloo donu de laangi aabe go de aoaa laa.

De mee hagasengasenga o denga talent

¹⁴ “Gai e bei hogi tangada gu baba ange laa e sailago, gai ia ne hagahi ono dangada hai hegau ga dugu ange ana mee alodahi gi gilaadeu.

¹⁵ Ia ne gaavange gi dahi e lima talent, gai dahi e lua talent, gai de ia ange laa e dahi talent, bei dagodo olaadeu hina. Aagai ia ga hano ai loo.

¹⁶ Gai tangada ne gaavee laa e lima talent ne hagamoolau ga hano ga hagao mee i talent laa, gai ia gu maua ange e lima talent.

¹⁷ E bei ai hogi tangada ne gaavee laa e lua talent, ia ne maua ange e lua talent.

¹⁸ Aagai tangada ne gaavee laa e dahi talent ne hano ga geli dahi geelinga ga danu ai sseene a dono dangada aamua.

¹⁹ Gai dua huu dahi masavaa daulooloa, gai tangada aamua o de gau hai hegau laa gu ahe mai e tilo ana sseene i olaadeu daha.

²⁰ Gai tangada ne gaavee laa e lima talent ne humai, ga gaamai e lima ange talent, gai ia ga hai ange, ‘Tangada aamua, koe ne gaamai e lima talent, gai au gu maua ange e lima.’

²¹ Dono dangada aamua ne hai ange gi de ia, ‘E danuaa, koe se dangada hai hegau danuaa ma de hai hegau i de mee abodonu. Koe ne kana ange i de mee damaa mee; au e gaavadu gi de goe ssauaa e huahua ai i mee lagolago. Humai malangilangi madali doo dangada aamua!’

²² Tangada ne gaavee laa e lua talent ne humai hogi ga hai ange, ‘Tangada aamua, koe ne gaamai e lua talent, gai au gu maua ange e lua.’

²³ Dono dangada aamua ne hai ange gi de ia, ‘E danuaa, koe se dangada hai hegau danuaa ma de hai hegau i de mee abodonu. Koe ne kana ange i de mee damaa mee; au e gaavadu gi de goe ssauaa e huahua ai i mee lagolago. Humai malangilangi madali doo dangada aamua!’

²⁴ Gai tangada ne gaavee laa e dahi talent ne humai ga hai ange, ‘Tangada aamua, au e iloo bolo koe se dangada e ssoe au hainga; koe e hagihagi i de mommee aau tee doo, gai koe e hagabudu i de mommee aau tee hagamalili ai.

²⁵ Deelaa ai, au ne madagu, gai au ga kave dau talent ga danu i lalo de gelegele. Gai deenei dau sseene aagu gu hagaahe mai nei.’

²⁶ Aagai dono dangada aamua ga hai ange, ‘Koe se dangada hai hegau baubau ma de vaiduu! Koe e iloo bolo au e hagihagi i de mommee aagu tee doo, ma de hagabudu i de mommee aagu tee hagamalili ai?

²⁷ Ne danuaa ange noo koe ne hhao ange dagu sseene gi lo te banga, gai au ga kave ai dagu sseene aama tama ne somo ange laa lunga, i dogu ahe mai ai.

²⁸ Deenei ai, goodou gaavee talent i ono daha naa ga gaavange gi tangada e madaangahulu laa ana talent.

²⁹ Go hiidinga tangada e hanu ana mee e gaavange gi kii ange de lagolago ana mee; gai tangada e deai ana mee, e kave gee donu momo mee e hanu i ono daha.

³⁰ Goodou gaavee tangada hai hegau deai naa ono haigamaiana magaa gi duaahaho, go de mommee o de tangi ma de hagaida ai gauvae.’

De hagamodu muna o denga huaahenua alodahi

³¹ “De masavaa naa huu o Tama a Tangada e humai ai i dono mahamaha madali ono dangada de langi alodahi, gai ia e noho naa i honga dono nohoanga hodooligi mahamaha.

³² Gai denga huaahenua alodahi e hagabuni mai naa gi mada luoono mada, gai ia ga vaevae ai dangada naa bei de vvae a tangada hagaloosi ssiibi denga ssiibi mai i denga guudi,

³³ gai ia e dugu naa denga ssiibi i dono baasi maadau, aagai denga guudi i dono baasi masui.

³⁴ Gai de Hodooligi e hai ange naa gi dangada i dono baasi madau, ‘Loomai, goodou gu lava i de hagamanuuia i daho dogu Damana. Goodou gaavee de nohoanga hodooligi gu hagadabena adu laa gi goodou, mai i taamada age de hai o henua i lalo.

³⁵ Go hiidinga au ne saalohia gai goodou ne haangai mai au; au ne hieunu gai goodou ne hagaunu mai au; au se dangada henua gee gai goodou ne abodonu mai gi de au.

³⁶ Au teai ogu malo gai goodou ne hakahu au; au ne magi gai goodou ne loomai ga tilo mai au; au ne noho i lo te hale pono, gai goodou ne loomai gi ogu daha.’

³⁷ Aagai gilaadeu e heohi e ssili ange naa gi de ia, ‘Tagi Maolunga, go ana hee amaadeu ne gidee ai bolo koe gu hiigai, gai gimaadeu ga haangai adu goe, aabe koe gu hieunu gai gimaadeu ga gaavadu hanu mee e unu goe?

³⁸ Gai go ana hee amaadeu ne gidee ai bolo koe gu se dangada henua gee, gai gimaadeu ga abodonu adu gi de goe, aabe e deai oo malo, gai gimaadeu ga hakahu adu goe?

³⁹ Gai go ana hee amaadeu ne gidee ai bolo koe gu magi, be koe gu noho i lo te hale pono, gai gimaadeu ga loadu gi oo daha?’

⁴⁰ Gai de Hodooligi e hai ange naa gi gilaadeu, ‘Ni muna abodonu aagu e hai adu nei gi goodou, mee alodahi oodou ne hai ange gi dahi ogu daina maolalo nei, gai goodou ne hai mai donu gi de au!’

⁴¹ Aagai ia e hai ange naa gi dangada i dono masui, ‘Goodou hulo gee mai i ogu daha, goodou gu hagamalaia, e tili ange gi lo te ahi e deai laa se ngado mai, gu hagadabena ange laa gi de ia hagabaubau laa ma ono dangada de langi!

⁴² Go hiidinga au ne saalohia gai goodou tee haangai mai au; au ne hieunu gai goodou tee haaunu au;

⁴³ au se dangada henua gee gai goodou tee abodonu mai gi de au, au teai ogu malo gai goodou tee hakahu au; au ne magi ma de noho i lo te hale pono gai goodou tee loomai gi ogu daha.’

⁴⁴ Gai gilaadeu e ssili ange naa, ga hai ange, ‘Tagi Maolunga, go ana hee amaadeu ne gidee ai bolo koe gu saalohia be gu hieunu, be gu se dangada henua gee, be gu deai oo malo, be gu magi, aabe gu noho i lo te hale pono, gai gimaadeu tee abodonu adu gi de goe?’

⁴⁵ Aagai ia e basa ange naa ga hai ange gi gilaadeu, ‘Ni muna abodonu aagu e hai adu nei gi goodou, mee alodahi oodou tee hai ange gi dahi gilaadeu e maolalo nei, gai goodou tee hai mai donu gi de au.’

⁴⁶ Gai gilaadeu nei e hulo gee naa ga kave de hagaduasala e deai laa se ngado mai. Aagai gilaadeu e heohi e kave naa de mouli e dee ngado mai.”