Matthew 23 - De Beebaa Dabu

De hagakana ange i dagodo o de gau sisi ma Pharisee

¹ Gai Iesu ne hai ange gi dangada aama ana dangada agoago,

² “De gau sisi ma denga Pharisee e nnoho i tuulanga o Moses;

³ deelaa ai, goodou haia ma de daohi mee alodahi alaadeu e tala adu gi goodou, aagai goodou gi dee ago ange i alaadeu dahulinga; go hiidinga gilaadeu e dee daudali i alaadeu mee e agoago ai.

⁴ Gilaadeu e noonooa ange mee hagauda daemaha gi honga o dangada, aagai gilaadeu e dee hai donu dahi olaadeu madannia daudahi e hagauda ai mee nei.

⁵ Gilaadeu e hai alaadeu hegau alodahi gi gidee ai e dangada. Gilaadeu e hai gi llaha olaadeu phylacteries, ma de hai gi lloa huga malo hagalaagii i bido i lalo o olaadeu malo lloa.

⁶ Gilaadeu e llodo i duulanga maolunga i denga daonga, ma duulanga danuaa i lodo synagogue;

⁷ gilaadeu e llodo dangada gi hagaboo ange gi gilaadeu i denga mommee hagao mee, ma de hagahi ange ‘tangada agoago’ gi gilaadeu.

⁸ Aagai e dee hai dangada gi hagaagahia adu ‘tangada agoago’ gi goodou, i hiidinga e dahi donu huu oodou dangada agoago, gai goodou alodahi ni hai daina.

⁹ Goodou aude hagahia ange hogi ‘tamana’ gi dahi dangada, go hiidinga e dahi donu huu oodou Damana, ia e noho i de langi.

¹⁰ Goodou gi dee hagabinga hogi bolo ni ‘dagi’, go hiidinga e dahi donu huu oodou dagi, go Klisdo.

¹¹ Tangada maolunga hugadoo i oodou magavaa gi se dangada hai hegau niiodou.

¹² Be goai e hagamaolunga e hai naa ga maolalo, gai be goai e hagamaolalo e hai naa ga maolunga.

De hagabaubau tee hai hegau i de mee abodonu

¹³ “E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e pono de nohoanga hodooligi o de langi i dangada. Goodou e dee ulu ai, aagai goodou e buibui hogi dangada e llodo laa e ulu ai! [

¹⁴ E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e gaiaa mee a denga haahine gu maakau olaadeu bodu, ma de hai gi lloa oodou dalodalo gi gidee ai e dangada. Deenei ai, goodou e kave naa de hagaduasala laumalie.]

¹⁵ E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e hulo gi mommee mmao i henua i lalo e hai ai dahi dangada gi daudali adu i goodou, gai goodou ga hai ia gi kii ange se dangada e baba ange gi de ahi i goodou.

¹⁶ E vakaa naa goodou, goodou ni dagi e dee kide, gai e hagataba, ‘Noo tangada e hagatoo donu i de temple, gai e deai donu mee e hai ai. Aagai noo tangada e hagatoo donu i denga goolo o de temple, gai ia gi hagasula ina donu dana hagatoo donu.’

¹⁷ Goodou ni dangada llodo ssenga ma tee kide! Dee hee de mee hagamogomogo, go goolo o de temple, aabe go de temple e haia laa ga dabu goolo laa?

¹⁸ Goodou e hagataba hogi, ‘Noo tangada e basa hagatoo donu i de mommee o ssigidaumaha, gai e deai donu mee e hai ai. Aagai noo tangada e hagatoo donu i mee ngadi gaavange i honga de mommee o ssigidaumaha, gai ia gi hagasula ina donu dana hagatoo donu.’

¹⁹ Goodou ni dangada donu dee kide! Dee hee de mee hagamogomogo, go de mee ngadi gaavange, aabe go de mommee o ssigidaumaha e haia laa ga dabu de mee ngadi gaavange?

²⁰ Deenei ai, be goai e hagatoo donu i de mommee o ssigidaumaha, gai ia e hagatoo donu i de mommee o ssigidaumaha aama mee alodahi i ono elunga.

²¹ Gai be goai e hagatoo donu i de temple, gai ia e hagatoo donu hogi i de Maadua e noho laa i kilaa.

²² Gai be goai e hagatoo donu i de langi, gai ia e hagatoo donu hogi i de nohoanga o de Maadua ma de ia e noho laa i ono elunga.

²³ E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e gaavange dahi diba i diba e madaangahulu o oodou mint ma dill aama cummin, gai goodou gu tili muna o de hainga e kii ange laa de hagamogomogo: go de hagamodu muna heohi, ma de abodonu ange gi dangada aama de gai. E heohi donu doodou hai mee nei, gai e dee tili mee ange laa.

²⁴ Goodou ni dagi e dee kide! Goodou e nonu de namu, gai e holo de gamelo!

²⁵ E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e hagagilimalali tua o de ubu ma de gumedi, gai ono lodo e honu i de nnoo hagamau mee ma de hai oodou mee e llodo ai.

²⁶ Koe se Pharisee dee gide! Hagagilimalali ina i mua lo te ubu ma lo te gumedi, gi gilimalali ai hogi tua.

²⁷ E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e bei donu dagodo o denga daanunga gu lebu laa gi tea ma de hagadanuaa, gai lodo e hoohonu i ivi o de gau maakau ma mee hakino gee alodahi.

²⁸ Aanei donu oodou dagodo, goodou e tilo danuaa i madamada o dangada, gai oodou lodo e hoohonu i de daahanga dangada ma de baubau.

²⁹ E vakaa naa goodou, de gau sisi ma denga Pharisee! Goodou ni dangada e daahangadia dangada! Goodou e hagatuu daanunga o denga pelaabisi, ma de hagalaagii daanunga o olaadeu e heohi;

³⁰ gai goodou e hagataba hogi, ‘Noo gimaadeu ne mouli i de masavaa o omaadeu dubuna madagidagi, gai gimaadeu tee hagabuni ange donu gi gilaadeu e daa ai gi maakau denga pelaabisi.’

³¹ Deenei ai, goodou e tala hagadonu donu bolo goodou go dama a dangada ne daia ga maakau denga pelaabisi!

³² Goodou hagalava ina hegau baubau a oodou damana ne daamada laa!

³³ Goodou e bei denga labodo, gai ni dama nii denga labodo hagammau, dee hee doodou hai e hagaola ai goodou i de hagaduasala o de ahi?

³⁴ Deenei ai, au e hai naa gi loomai denga pelaabisi ma de gau heiangi aama de gau sisi gi oodou daha. Gai goodou e daa naa hanu ga daudau i de laagau lui; aagai hanu e hagailiili i lodo oodou synagogue aama de vaivai hai gilaadeu i denga aduhale.

³⁵ Gai dodo o de gau heohi oodou gu daa ga maakau i henua i lalo alodahi, e dau adu naa gi goodou, mai i dodo o Abel ga dae ai gi dodo o Zechariah tama daane a Berekiah, go taane oodou ne daa ga magau i magavaa o de Aabi Dabu ma de mommee o ssigidaumaha.

³⁶ Ni muna abodonu aagu e hai adu nei gi goodou: mee nei alodahi e hai naa donu i de atangada nei!

De dangi o Iesu i hiidinga o Jerusalem

³⁷ “Jerusalem, Jerusalem! De aduhale ne daia ga maakau denga pelaabisi ma de maga i hadu, gilaadeu ne hai gi loomai gi oo daha! Gu dee modu donu dogu lodo e hagabudu mai au dama, bei de hai a de gaagoo hahine e hagabudu ai laa ana dama i lalo luoono bakau, aagai koe e dee lodo!

³⁸ Deenei ai, doodou temple gu tili gi se mommee e ngadi dagodo.

³⁹ Au e hai adu gi goodou, goodou gu dee gidee ange au ga dae ai gi doodou hagataba, ‘E manuuia tangada e humai i de ingoo o Tagi Maolunga.’ ”