Matthew 18 - De Beebaa Dabu

Goai e maolunga?

¹ De masavaa laa gai denga dangada agoago ne loomai ga ssili ange gi Iesu, “Goai hugadoo e maolunga i de nohoanga hodooligi o de langi?”

² Gai Iesu ne hagahi dahi gauligi, ga hagaduu i olaadeu magavaa,

³ ga hai ange gi gilaadeu, “Ni muna abodonu aagu e hai adu nei gi goodou, noo goodou e dee daahuli bei dagodo o denga gauligi vaaligi, gai goodou e dee maua i de ulu i de nohoanga hodooligi o de langi.

⁴ Deenei ai, be goai e lodo maolalo bei dagodo o tamaa gauligi nei, gai go ia e maolunga i de nohoanga hodooligi o de langi.

⁵ Be goai e abodonu ange gi dahi gauligi damaa mee bee nei i hiidinga dogu ingoo, gai ia e abodonu mai donu gi de au.

⁶ Aagai be goai e haia ga haisala dahi dangada maolalo bee nei gi hagadonusia laa, gai e danuaa donu de nnoa ange dahi hadu mmili laumalie gi dono ua, ga tili ia gi lo te moana gelo.

Denga hagatale e haia ga haisala dangada

⁷ “E vakaa naa henua i lalo, i hiidinga o alaadeu mee e hai ga hagahaisala ai dangada! Mee nei e hai naa donu, aagai e vakaa naa tangada e haia mee nei!

⁸ Gai noo doo lima be go doo vae e hai goe ga haisala, gai koe duudia dilia. E danuaa ange doo ulu i de mouli ma doo balagelage aabe go doo baagia, i doo tili ange gi lo te ahi e dee ngado mai ma luoo lima ma luoo vae ngaadahi.

⁹ Gai noo doo ganomada ne hai goe ga haisala, gai koe laoa mai dilia. E danuaa ange doo ulu i de mouli ma dahi ganomada, i doo tili ange gi lo te ahi ma luoo ganomada ngaadahi.

De mee hagasengasenga o ssiibi gu dee maleva laa

¹⁰ “Goodou dagidiiloo gi dee hagangadi mee ina e goodou dahi dangada maolalo bee nei. Go hiidinga au e hai adu gi goodou, bolo olaadeu dangada de langi e gidee luu mada o dogu Damana i de langi i masavaa alodahi.

¹¹ [Go hiidinga Tama a Tangada ne humai e hagamouli gilaadeu gu dee maaleva.]

¹² Gai dee hee doodou maanadu? Noo dahi dangada e lau ana ssiibi, gai dahi gu dee maleva, gai ia e dee dugu naa de massiva ma siva ssiibi i honga de mounga, gai ia ga hano ga ssala ssiibi gu dee maleva laa?

¹³ Ni muna abodonu aagu e hai adu nei gi goodou, noo ia gu gidee dana ssiibi, gai ia e malangilangi ange i ssiibi nei, i dono malangilangi i denga ssiibi e massiva ma siva goi nnoho laa i lo te buibui.

¹⁴ E bei ai hogi lodo o doodou Damana i de langi laa, ia e dee lodo donu gi magau dahi dangada maolalo bee nei.

De haisala adu o doo daina gi de goe

¹⁵ “Noo doo daina gu haisala adu gi de goe, aagai koe hannoo hagaagona ange ono haisala gi de ia i de masavaa e deai ai dangada i ooluu daha. Aagai noo ia gu hagallongo adu gi de goe, gai koe gu maua i de hagaahe mai doo daina.

¹⁶ Aagai noo ia e dee lodo e hagallongo adu gi de goe, gai koe gaavee e dahi aabe e dogolua dangada hagadonu madali goe, gai mee alodahi e hagadonu i muna a e dogolua aabe e dogodolu dangada hagadonu.

¹⁷ Gai noo ia e dee e hagallongo ange gi gilaadeu, gai daalaa ange gi de nohoanga dabu alodahi. Gai noo ia e dee hagallongo ange hogi gi de nohoanga dabu, aagai goodou haia ia bei dahi dangada tua de mee ma tangada e hagabudulia taagisese.

¹⁸ Ni muna abodonu aagu e hai adu nei gi goodou, be se aha naa huu oodou e pono i henua i lalo, gai e pono hogi i de langi. Gai be se aha naa huu oodou e dugu ange i henua i lalo, gai e dugu ange hogi i de langi.

¹⁹ Au e hai adu hogi gi goodou, noo e dogolua i henua i lalo e buni i de mee olaau e dangidangi ai, gai dogu Damana i de langi e hai donu gi bei.

²⁰ Gai be go hee naa huu e buni ai e dogolua aabe dogodolu i dogu ingoo, gai au e noho hogi i olaadeu daha.”

De mee hagasengasenga o tangada hai hegau tee degi

²¹ Aagai Peter ne humai ga ssili ange gi Iesu, “Tagi Maolunga, e hia hanonga oogu e degi ange ai gi dogu daina, noo ia gu haisala mai gi de au, e hidu hanonga?”

²² Iesu ne hai ange gi de ia, “Au e dee hai adu bolo e hidu donu huu hanonga, aagai e madahidu e hagalagolago i de hidu.

²³ Deenei ai, de nohoanga hodooligi o de langi e hagadagodo ange gi dahi hodooligi e lodo laa e hagaheohi muli a ono dangada hai hegau.

²⁴ Gai de masavaa huu aana ne daamada ai de hagaheohi alaadeu muli, gai gu gaamai gi ono daha dahi daane e muli ange i e dahisemada talent.

²⁵ Gai ia gu dee maua i de hagao ana muli, gai dono dangada aamua ga hagadaba bolo gi hagao ina ia gi daha madali dono bodu ma ana dama, aama ana mee alodahi, e hagao ai ana muli.

²⁶ Gai taane hai hegau laa ne duuduli ga dangidangi ange, ga hai ange, ‘Daalia mai, gai au e hagao adu naa donu gi odi agu muli alodahi.’

²⁷ Gai tangada aamua laa ne lodo aloha i de ia, ga dugu ia gi hano ma de degi ange gi ana muli alodahi.

²⁸ Aagai ga sao huu taane hai hegau laa ga hano, gai ia gu hedae ange gi dahi dangada hai hegau, e muli ange laa gi de ia i e lau denarius, gai ia ga poo ia ga kumi dono ua, ga hai ange, ‘Hagao ina mai au muli.’

²⁹ Gai tangada hai hegau laa ne ino gi lalo ga dangidangi ange, ‘Golomagi ina oo lodo i ogu hiidinga, gai au e hagao adu naa donu agu muli.’

³⁰ Gai ia tee lodo e degi ange gi taane laa, gai ne kave ia ga hhao gi lo te hale pono, ga dae ai gi dana hagao ana muli.

³¹ De masavaa huu a de gau hai hegau ange laa ne gidee ai mee gu hai laa, gai gu daemaha olaadeu lodo. Gai gilaadeu ga hulo ga tala ange gi delaadeu dangada aamua mee alodahi gu hai laa.

³² Aagai dono dangada aamua ga hagahi taane laa, ga hai ange gi de ia, ‘Koe se dangada donu hai hegau baubau! Au ne degi adu gi de goe i au muli alodahi, go hiidinga koe ne dangidangi mai gi de au;

³³ gai tee danuaa hogi doo degi ange gi doo soa hai hegau, bei dagu hai ne degi adu ai laa gi de goe?’

³⁴ Gai dono dangada aamua gu lili mmao, gai ia ga gaavange taane laa gi de gau hai hegau o de hale pono, ga dae ai gi de odi ana muli alodahi i dana hagao.

³⁵ Aanei hogi hegau a dogu Damana i de langi e hai adu gi goodou, noo goodou e dee degi ange gi haisala o oodou daina i oodou lodo.”