Matthew 16 - De Beebaa Dabu

De usuusu ange Iesu gi haia dahi hagailonga

¹ Hanu Pharisee ma Sadducee ne loomai e hagatale Iesu, gai gilaadeu ga hai ange, “Gimaadeu e llodo e tilo dahi hagailonga mai i de langi.”

² Iesu ne hai ange gi gilaadeu, “Goodou e hagataba i de masavaa e ahiahi ai, ‘E laohie naa de mee; i hiidinga e mmea lo te langi.’

³ Gai goodou e hagataba i taiao, ‘E baubau naa de mee ailaa nei, go hiidinga gu mmea lo te langi ma de hagauliuli age.’ Goodou ni dangada e daahangadia dangada, goodou e iloo de tilo dagodo o lo te langi, aagai e dee tonu ange gi denga hagailonga e hai i de masavaa nei.

⁴ De atangada baubau ma tee hai hegau i de mee abodonu e ssala dahi hagailonga, gai e deai ange donu se hagailonga e hagaago ange gi gilaadeu, go de hagailonga donu huu o Jonah.”  Gai ia ga hano gee mai i olaadeu daha.

Mee hagahua a denga Pharisee ma Sadducee

⁵ De masavaa o denga dangada agoago ne tae ai gi de baasi gee de vai, gai gilaadeu ne ngalo de kave hanu pelaoaa.

⁶ Iesu ne hai ange gi gilaadeu, “Goodou kana ange dagidiiloo goodou i mee hagahua a denga Pharisee ma denga Sadducee.”

⁷ Gai gilaadeu ne pasa i olaadeu magavaa ga hagataba, “Go hiidinga gidaadeu ne ngalo i de gaamai hanu pelaoaa.”

⁸ Aagai Iesu gu iloo e ia alaadeu maanadu, gai ia ga hai ange, “Goodou ni dangada e vaaligiligi oodou kai, gu aha gu pasa ai naa goodou i teai oodou pelaoaa?

⁹ Goodou tigi tonu ange naa donu? Goodou gu ngalo naa pelaoaa e lima ne haangai ai laa de limamano, gai ne hia laa gede ne hhao ga hoohonu i mee ne doe?

¹⁰ Aabe go pelaoaa e hidu ne haangai ai laa de haamano, gai e hia laa gede oodou ne hhao ai mee ne doe?

¹¹ E aha, goodou tigi tonu ange naa donu bolo au tee basa adu i denga pelaoaa? Gai au e hai adu goodou gi kana ange i mee hagahua a denga Pharisee ma Sadducee.”

¹² Aagai gilaadeu gu tonu ange bolo ia e dee hai ange gilaadeu gi kana ange i mee e hagahua ai laa pelaoaa, gai gilaadeu gi kana ange i agoago a denga Pharisee ma Sadducee.

De tala a Peter bolo Iesu go de Klisdo

¹³ De masavaa o Iesu ne hano ai gi de vaaenga o Caesarea Philippi, gai ia ga ssili ange gi ana dangada agoago, “Dangada e hagataba laa bolo goai Tama a Tangada?”

¹⁴ Ana dangada agoago ne hai ange, “Hanu bolo koe go John taane Babudaisi, gai hanu bolo go Elijah, aagai hanu bolo go Jeremiah aabe go dahi pelaabisi ange laa.”

¹⁵ Gai ia ga ssili ange gi gilaadeu, “Aagai goodou e hagataba bolo au goai?”

¹⁶ Gai Simon Peter ga hai ange gi de ia, “Go koe donu de Klisdo, Tama Daane a de Maadua e mouli laa!”

¹⁷ Iesu ne hai ange gi de ia, “Simon tama daane a Jonah, koe gu manuuia! Go hiidinga e dee go dangada ne hagaagona adu mee nei gi de goe, aagai go dogu Damana i de langi laa.

¹⁸ Au e hai adu, go koe go Peter; go honga de baba nei aagu e hagaduu ai dogu nohoanga dabu, gai ssauaa o Hades e dee maua donu i de hagadee kii.

¹⁹ Gai au e gaavadu naa gi de goe de gii o de nohoanga hodooligi o de langi; gai be se aha naa huu aau e pono i henua i lalo, gai e pono hogi i de langi; gai be se aha naa huu aau e dugu ange gi hai i henua i lalo, gai e dugu ange hogi gi hai i de langi.”

²⁰ Aagai Iesu ga hai ange gi ana dangada agoago gilaadeu gi dee daalaa ange gi dangada bolo go ia de Klisdo donu.

De tala a Iesu dono hagaduasala ma dono magau

²¹ Dua de masavaa laa, gai Iesu ne daamada de tala ange gi ana dangada agoago bolo ia e hano naa gi Jerusalem e hagaduasala ai i daho denga dagi, ma de gau haimeedabu maolunga, aama de gau sisi, gai ia e daa naa gi magau, aagai de hagadolu laangi naa huu gai ia gu mouli age.

²² Gai Peter ne kave Iesu ga hagasee, ga hai ange, “Tagi Maolunga, de Maadua e dee dugu ange donu gi hai mee nei! Mee nei e dee hai adu donu gi de goe!”

²³ Iesu ne huli dua ga hai ange gi Peter, “Satan, hannoo gi ogu dua! Koe se dangada e buibuia ngau. Go hiidinga au maanadu e dee bei lodo o de Maadua, aagai e bei lodo o dangada.”

²⁴ Iesu ne hai ange hogi gi ana dangada agoago, “Be goai e lodo e daudali mai i de au, gai ia gi hagangadi mee ina ia, ga saabai dono laagau lui ga daudali mai ai i de au.

²⁵ Be goai e hagaola ina dono mouli e tili donu; aagai be goai e tili dono mouli i ogu hiidinga e hagaola donu dono mouli.

²⁶ Ni haigamaiana aha de maua e tangada henua i lalo alodahi, aagai dono mouli e tili? Aabe se aha a tangada e gaavange e sui ai dono mouli?

²⁷ Gai Tama a Tangada e humai naa i de mahamaha o dono Damana, madali ono dangada de langi, gai ia ga hagao ange ai gi bei dagodo hegau a dahi ma dahi.

²⁸ Ni muna abodonu aagu e hai adu nei gi goodou: e hanu donu dangada e tuu i kinei e dee maakau ga dae ai gi delaadeu gidee Tama a Tangada e humai i dono nohoanga hodooligi.”