Matthew 14 - De Beebaa Dabu

De magau o John taane Babudaisi

¹ Laangi laa Herod, de tetrarch o Galilee, ne langona e ia longo o Iesu,

² gai ia ga hai ange gi ono dangada hai hegau, “Deenei donu taane babudaisi go John; ia gu mouli age! Aanei hiidinga gu hai ai nei denga sauaa hagalele mouli i ono daha.”

³ Go hiidinga Herod ne poo John ga tili ange gi lo te hale pono i hiidinga o Herodias, de bodu o dono daina daane go Philip,

⁴ i hiidinga John ne hai ange gi Herod, “E dee heohi doo hai bodu ange gi de hine naa.”

⁵ Gai Herod ne lodo e daa John gi magau, gai ia ne madagu i dangada, go hiidinga gilaadeu e hagataba bolo John se pelaabisi.

⁶ Gai de boo huu o Herod, gai tamaa hine a Herodias ga anu i madamada o dangada e gaimee laa i taonga, gai Herod gu malangilangi mmao,

⁷ gai ia ne hai dahi hagatoo donu soe, bolo ia e gaavange gi de ia mee alodahi oona e dangidangi ange ai.

⁸ Gai tamaa hine laa ne hagabasa ina e dono dinana, gai ia ga hai ange, “Gaamai gi de au, de biho o John taane Babudaisi i honga de gumedi baabaa nei.”

⁹ Gai de hodooligi gu dee baba; go hiidinga ia gu hagatoo donu i madamada o dangada e gaimee laa i taonga, gai ia ga hagadaba bolo gi haia gi bei tangidangi a tamaa hine laa.

¹⁰ Gai Herod ga aalu ga tuu de ua o John i lo te hale pono.

¹¹ Gai dono biho gu gaamai i honga dahi gumedi baabaa ga gaavange gi tamaa hahine laa, gai ia ga kave ga gaavange gi dono dinana.

¹² Gai denga dangada agoago a John ga hulo ga kave de angaanga o John ga danu. Muli mai gai gilaadeu ga hulo ga tala ange gi Iesu.

De haangai o de limamano

¹³ Gai ga langona huu e Iesu mee laa, gai ia ga gage i de boose ga hano gee mai i kilaa, ga hano gi dahi mommee e deai dangada iai. Aagai dangada soa gu langona, gai gilaadeu ga seesee mai i denga aduhale ga loomai gi ono daha.

¹⁴ Gai ga dae huu Iesu gi de mommee laa ga hanage gi uda, gai ia gu gidee dangada soa mmao, aagai ia gu lodo aloha i gilaadeu ga hagaieiangi alaadeu magi.

¹⁵ Gai ga ahiahi huu de mee, aagai ana dangada agoago ga loomai, ga hai ange, “De mommee nei e deai dangada iai, gai gu dai boo hogi de mee. Haia gi hulo dangada gi denga aduhale gi hagao ina ai alaadeu gai.”

¹⁶ Iesu ne hai ange gi gilaadeu, “Gilaadeu e dee hulo; goodou hangaina ange gilaadeu!”

¹⁷ Gilaadeu ne hai ange, “E lima donu huu pelaoaa ma e lua mamu i omaadeu daha.”

¹⁸ Iesu ne hai ange gi gilaadeu, “Gaamai mee naa gi ogu daha i kinei.”

¹⁹ Aagai ia ga hai dangada gi nnoho i honga denga helii, gai ia ga poo mai pelaoaa e lima ma mamu e lua laa, gai ia ga galo age gi de langi ga dalodalo, ga dohidohi, ga gaavange gi ana dangada agoago, gai gilaadeu ga duha ange gi dangada.

²⁰ Gai dangada alodahi gu gaimee ga boobosu. Gai ana dangada agoago ga hagabudu mee ne doe ga hhao ai e madaangahulu ma lua gede.

²¹ Agu made ne limamano alodahi daane ne gaimee, gai e hanu hogi haahine ma gauligi.

De seesee o Iesu i honga de vai

²² De masavaa laa donu huu gai Iesu ga hai ana dangada agoago gi kage i de boose, gi hulo i ono mada i mua gi de baasi gee o de vai, gai ia ga hai dangada gi hulo.

²³ Gai ga lava huu i dana hai gi hulo dangada, gai ia ga hanage gi de mounga e dalodalo ai. Gai ga ahiahi huu de mee, gai go ia donu huu e doe i kilaa,

²⁴ gai de boose laa gu mmao gee mai i de henua, gai e hagailiilihia saele i denga beau, go hiidinga de madangi mmahi e humai i madaa moni.

²⁵ Gai daha de haa aoaa huu i masavaa dagitilo i boo taiao, aagai Iesu ne seesee ga hano gi daho ana dangada agoago i honga de vai.

²⁶ Gai ga gidee huu e ana dangada agoago Iesu e seesee i honga de vai, gai gilaadeu gu maatagu mmao ga hagataba, “Se eidu deenei!”, gai gilaadeu ga oo i hiidinga delaadeu maatagu.

²⁷ De masavaa laa donu huu gai Iesu ga basa ange, ga hai ange, “Goodou gi lodo mmahi; go au donu deenei. Goodou gi dee maatagu!”

²⁸ Gai Peter ga hai ange, “Tagi Maolunga, noo go koe donu deenaa, aagai koe hai mai au gi seesee adu gi oo daha i honga de vai.”

²⁹ Iesu ne hai ange, “Humai!” Gai Peter ga iho mai i de boose ga seesee i honga de vai e hano gi daho Iesu.

³⁰ Aagai ga gidee huu e ia de madangi mmahi, gai ia gu madagu ga daamada de abulu, gai ia ga oo ga hai ange, “Tagi Maolunga, hagaola ina mai au!”

³¹ De masavaa laa donu huu gai Iesu ga haalo ange dono lima ga poo Peter, ga hai ange gi de ia, “E damaa mee mmao doo gai. Gu aha gu lua lodo ai naa goe?”

³² Gai de masavaa huu olaau ne kage ai gi lo te boose, gai gu sili de madangi.

³³ Gai gilaadeu i lo te boose laa ne ino gi lalo ga daumaha ange gi Iesu, ga hai ange, “Ni muna abodonu, go koe donu Tama Daane a de Maadua.”

Iesu e hagaieiangi magi i Gennesaret

³⁴ Gai de masavaa olaadeu ne tae ai gi de baasi gee o de vai, gai gilaadeu ne tau age i Gennesaret.

³⁵ Gai dangada o de henua laa gu madea e gilaadeu Iesu, gai gilaadeu ga aalu gi gaamai denga magi i de henua laa alodahi. Gai dangada ga gaamai alaadeu magi alodahi gi de ia

³⁶ ga dangidangi ange ia gi dugua ange denga magi gi boogia ange de bido o dono malo laa daha. Gai dangada alodahi ne boogia ange ono malo gu ieiangi.