Matthew 13 - De Beebaa Dabu

De mee hagasengasenga o tangada doo golee

¹ De laangi mau gai Iesu ne sao mai i lo te hale ga hano ga noho i gaogao de vai.

² Gai dangada soa ga hagabuni mai gi ono daha, gai ia ga gage ga noho i honga dahi boose; gai dangada e tuu i gaogao de vai.

³ Gai ia ne tala ange gi gilaadeu mee lagolago i denga mee hagasengasenga, ga hai ange, “E dahi dangada hai veelenga ne hano e doo ana golee.

⁴ Gai de masavaa huu ne hagamalili ai ana golee, gai hanu ne too ange gi gaogao de haiava, gai denga manu llele ga loomai ga gai.

⁵ Hanu ne too ange gi honga de mommee haduhadua, se mommee e dee maadolu de gelegele iai. Gai golee laa ne moolau donu de ssomo age, go hiidinga e daballahi de gelegele i kilaa.

⁶ Gai de masavaa huu ne sula age ai de laa, gai manu laa gu mmae, go hiidinga tigi ai donu olaadeu aga.

⁷ Hanu ne too ange gi magavaa o denga manu daladala, gai manu daladala laa ga ssomo age ga hagakabi gilaadeu.

⁸ Gai hanu ne too ange gi honga de gelegele danuaa, aanei golee ne ssomo ga hhua: hanu e dagillau, hanu e dagimadaono, gai hanu e dagimatolu.

⁹ Be goai e hanu ono dalinga, gai ia gi hagalaangona.”

Hiidinga o denga mee hagasengasenga

¹⁰ Dangada agoago a Iesu ne loomai ga ssili ange gi de ia, “Gu aha gu agoago ange ai naa goe dangada i denga mee hagasengasenga?”

¹¹ Iesu ne hai ange gi gilaadeu, “Gu dugu adu gi maua e goodou i de tonu ange gi mee o de nohoanga hodooligi o de langi e dee iloo laa, aagai tigi dugu ange gi gilaadeu.

¹² Go hiidinga be goai e hanu ana mee, gai e gaavange donu gi kii ange de lagolago ana mee. Gai be goai e deai ana mee, aagai e kave gee donu momo mee e hanu i ono daha.

¹³ Deenei de hiidinga oogu e basa ange ai nei gi dangada i denga mee hagasengasenga: gilaadeu e gidee gai e dee madea, gilaadeu e langona gai e dee tonu ange aagena.

¹⁴ Gilaadeu gu hagassula donu muna a de pelaabisi go Isaiah e hai ange laa, ‘Goodou e langona gai e dee tonu ange aagena; goodou e gidee, aagai e dee madea.

¹⁵ Go hiidinga de huaadangada nei e makaga olaadeu lodo, gai olaadeu dalinga gu longoduli, gai gu pono olaadeu ganomada; kana gidee naa e gilaadeu i olaadeu ganomada ma de langona i olaadeu dalinga, ga tonu ange i olaadeu lodo, ga daahuli olaadeu lodo, gai au ga hagaieiangi gilaadeu.’

¹⁶ Gai goodou gu manuuia, go hiidinga oodou ganomada e gidee gai oodou dalinga e langona!

¹⁷ Ni muna abodonu aagu e hai adu nei gi goodou, e soa pelaabisi ma dangada heohi ne llodo gi gidee e gilaadeu oodou mee gu gide naa, aagai gilaadeu tee gidee. Gilaadeu ne llodo e hagallongo oodou mee gu langona, gai gilaadeu tee langona.

De hagadonu de mee hagasengasenga o tangada e dooa golee

¹⁸ “Goodou nnoho mai hagalaangona de hagadoonunga o de mee hagasengasenga o tangada e dooa golee.

¹⁹ De masavaa naa huu a tangada e langona e ia dagodo o de nohoanga hodooligi, gai ia e dee donu ange aagena, gai de ia baubau laa e humai ga kave gee mee gu doo ange laa gi ono lodo. Aanei golee e too ange laa gi gaogao de haiava.

²⁰ Gai golee e too ange laa gi lo te mommee haduhadua, go tangada e langona e ia muna laa, gai ne moolau donu dana kave i hiidinga dono malangilangi.

²¹ Aagai go hiidinga e deai donu ono aga, deelaa ai, ia e dee daulooloa donu. Gai de masavaa huu e dae mai ai de hai ngadaa ma de vaivai haia i hiidinga o muna laa, gai ia e moolau de ahe dua.

²² Gai golee ne too ange laa gi magavaa o denga manu daladala, go tangada e langona e ia muna laa; aagai mee hagamanavasaa o henua i lalo nei, ma de lava e hagasengalia laa dangada ga hagakabi muna laa, gai tee maua gi hhua.

²³ Gai golee ne too ange laa gi honga de bela danuaa, go tangada e langona e ia muna laa ga donu ange aagena. Deenei tangada e hua lagolago: hanu e dagillau, hanu e dagimadaono, aagai hanu e dagimatolu e kii ange ai i mee ne doo laa.”

De mee hagasengasenga o denga helii

²⁴ Iesu ne tala ange hogi gi dangada dahi mee hagasengasenga, ga hai ange: “De nohoanga hodooligi o de langi e bei dagodo o tangada hai veelenga e dooa laa golee danuaa i dana veelenga.

²⁵ Aagai ga sseni huu dangada, gai dono hagadaumee ga humai ga doo ange denga helii baubau i magavaa o denga grain, gai ia ga hano gee mai i kilaa.

²⁶ Gai de masavaa huu ne ssomo age ai denga grain, gai gu ssomo age hogi denga helii baubau laa.

²⁷ Aagai de gau hai hegau o tangada aamua laa ne loomai ga hai ange gi de ia, ‘Tangada aamua, koe ne doo denga golee danuaa i dau veelenga; gai go hee ne loomai ai nei denga helii baubau nei?’

²⁸ Tangada aamua laa ne hai ange gi gilaadeu, ‘Go dogu hagadaumee ne dooa mee naa.’ Gai ono dangada hai hegau ga ssili ange gi de ia, ‘Koe e lodo gimaadeu gi hulo gi unuunusia age denga helii laa?’

²⁹ Tangada aamua laa ne hai ange gi gilaadeu, ‘E deai, kana unuunusia age e goodou denga grain madali denga helii.

³⁰ Gai dugua gi ssomo age alodahi ga dae ai gi de masavaa e hagihagi ai, gai au ga hai de gau hagihagi gi hagabudulia denga helii gi noonoodia gi ni noodanga e dudu ai, gai ga hagabudulia denga grain gi moolia gi haoa gi lo tagu mommee doange gai.’ ”

De mee hagasengasenga o de golee o de mustard

³¹ Iesu ne tala ange hogi gi dangada dahi mee hagasengasenga, ga hai ange, “De nohoanga hodooligi o de langi e bei dagodo o de golee o de mustard, a dahi dangada ne kave laa ga doo i dana veelenga.

³² De golee laa e damaa mee ange i denga golee alodahi, aagai de masavaa huu ne somo age ai, gai gu laumalie ange i denga manu ssomo ange laa, gai denga manu llele ga loomai ga hai olaadeu hoohanga i honga ono laa.”

De mee hagasengasenga o mee hagahua

³³ Iesu ne tala ange hogi gi dangada dahi mee hagasengasenga, ga hai ange, “De nohoanga hodooligi o de langi e bei mee hagahua a dahi hahine e kave laa, ga hilo ange gi e dolu hagabaaunga pelaoaa mada, ga dae ai gi de hhua mee laa alodahi.”

De hagahai hegau a Iesu denga mee hagasengasenga

³⁴ Iesu ne tala ange mee nei alodahi gi dangada soa i denga mee hagasengasenga. Teai donu sana mee tee tala ange gi gilaadeu i de mee hagasengasenga.

³⁵ Ia ne hai mee nei e hagassula ai mee gu tala laa i daho de pelaabisi e hai ange, “Au e basa naa i denga mee hagasengasenga; au e tala naa mee e dee iloo laa mai i taamada age o henua i lalo.”

Hagadoonunga o de mee hagasengasenga o denga helii

³⁶ De masavaa o Iesu ne hano gee ai i daho dangada ga ahe gi de hale, gai ana dangada agoago ga loomai gi ono daha, ga hai ange, “Daalaa mai gi gimaadeu de hagadoonunga o de mee hagasengasenga o denga helii i lo te veelenga.”

³⁷ Ia ne hai ange gi gilaadeu, “Tangada ne dooa golee danuaa laa go Tama a Tangada.

³⁸ De veelenga go henua i lalo; denga golee danuaa go dangada o de nohoanga hodooligi. Gai denga helii baubau go dama a de ia baubau laa.

³⁹ De hagadaumee ne dooa denga helii, go de ia hagabaubau laa. Aagai de masavaa o de hagihagi go de hagaodi o henua i lalo, gai de gau hagihagi go de gau de langi.

⁴⁰ Dagodo o de hagabudu o denga helii ga dudu i de ahi, e bei hogi dagodo o mee e hai i de hagaodi o henua i lalo.

⁴¹ Tama a Tangada e hai naa gi hulo ana dangada de langi gi hagabudulia gi gaavee gee mai i dono nohoanga hodooligi mee alodahi e hidi mai ai de haisala, ma gilaadeu alodahi e haia de baubau.

⁴² Gai de gau de langi e tili ange naa gilaadeu gi lo te ahi mmahi, go de mommee o de tangi ma de hagaida ai gauvae.

⁴³ Aagai gilaadeu e heohi e maalama naa bei de laa i de nohoanga hodooligi o delaadeu Damana. Be goai e hanu ono dalinga, gai ia gi hagalaangona.

De mee hagasengasenga o de mee hagamogomogo

⁴⁴ “De nohoanga hodooligi o de langi e bei de mee hagamogomogo a dahi dangada ne gidee laa e danumia i lo te duu malaelae. Gai ia ga danu ange de mee laa, gai ia gu malangilangi ga hano ga hagao gi daha ana mee hugadoo ga hagao ai de mommee laa.

De mee hagasengasenga o de ango

⁴⁵ “De nohoanga hodooligi o de langi e bei tangada hagao mee e saalaa laa denga ango danuaa.

⁴⁶ Gai ia gu gidee dahi ango hagao ngadaa mmao, gai ia ga hano ga hagao gi daha ana mee hugadoo ga hagao ai de ango laa.

De mee hagasengasenga o de galauna

⁴⁷ “De nohoanga hodooligi o de langi e bei dagodo o de galauna e tili laa i de lodo, gai ne maua ai denga hagadaagangaa mamu alodahi.

⁴⁸ Gai de masavaa huu ne honu ai de galauna laa, gai dangada ga dada age gi honga de gelegele ga hili ai mamu danuaa ga hhao gi lodo gede, gai ga tili mamu baubau.

⁴⁹ Deenei hogi tagodo o de hagaodi o henua i lalo. De gau de langi e loomai naa ga vvae de gau baubau mai i gilaadeu e heohi,

⁵⁰ ga tili ange gilaadeu gi de mommee o de ahi mmahi, go de mommee o de tangi ma de hagaida ai gauvae.”

Mee hagamogomogo hoou ma mee duai

⁵¹ ⌊Iesu ne ssili ange,⌋ “Goodou gu tonu ange nei gi mee nei alodahi?” Dangada ne hai ange, “Uaa.”

⁵² Ia ne hai ange, “Deenei ai, de gau sisi alodahi gu agoago i dagodo o de nohoanga hodooligi o de langi, e bei tangada e dugua mai laa ono goloa hoou ma goloa duai i dono mommee doange.”

De gau Nazareth tee hagadubu Iesu

⁵³ Gai ga lava huu i de tala a Iesu denga mee hagasengasenga laa, gai ia ga hano gee mai i kilaa,

⁵⁴ ga ahe gi dono aduhale donu, ga agoago ange ai dangada i delaadeu synagogue. Gai dangada gu llele mouli ga hagataba, “Go hee a taane nei ne kave ai de heiangi ma ssauaa e hai ai nei hegau nnui nei?

⁵⁵ E aha, e dee go tama daane a de labagau deenei? Gai e dee go Mary de ingoo o dono dinana? Aagai e dee go James, ma Joseph, ma Simon, aama Judas ono daina daane?

⁵⁶ Gai ono daina haahine alodahi e dee nnoho nei hogi madali gidaadeu i kinei? Gai go hee aana ne kave ai nei mee nei alodahi?”

⁵⁷ Gai gilaadeu tee hagadonusia ia. Gai Iesu ga hai ange gi gilaadeu, “De pelaabisi go dono aduhale donu huu ma dono hale oona e dee hagadubulia ai.”

⁵⁸ Gai ia tee hai hanu sauaa lagolago i kilaa, i hiidinga delaadeu dee hagadonusia.