Matthew 12 - De Beebaa Dabu

Iesu go de Ia Aamua o Sabbath

¹ Laangi laa gai Iesu ma ana dangada agoago ne seesee i lodo hanu veelengaa grain i Sabbath. Gai ana dangada agoago gu saalohia, aagai gilaadeu ga hagihagi denga grain ga gai.

² Aagai de masavaa huu a denga Pharisee ne gidee ai, gai gilaadeu ga hai ange, “Galo ange diiloo au dangada agoago e hai mee e dee alaange de hai i Sabbath!”

³ Iesu ne hai ange gi gilaadeu, “Goodou tigi dau ange naa donu hegau a David ne hai i dono saalohia ma denga daane madali ia?

⁴ Ia ne ulu i de hale o de Maadua ga gai ai denga pelaoaa dabu, ni mee e dee alaange dana gai aabe go ono daane madali ia, aagai go de gau haimeedabu donu huu.

⁵ Gai goodou tigi dau ange naa hogi dagodo de oha a de gau haimeedabu de hainga o Sabbath i lo te temple, gai gilaadeu tee haisala?

⁶ Au e hai adu gi goodou, e dahi donu dangada i oodou magavaa i kinei, e maolunga ange i de temple.

⁷ Noo goodou e iloo de hagadoonunga o muna nei, ‘Au e lodo i de lodo aloha, e dee go ssigidaumaha,’  gai goodou tee hagabaubau tangada e dee haisala.

⁸ Go hiidinga Tama a Tangada go de Ia Aamua o Sabbath.”

De hagaieiangi a Iesu taane magau de lima

⁹ Iesu ne hano gee i de mommee laa ga hano gi dahi olaadeu synagogue.

¹⁰ Gai e dahi daane magau de lima i kilaa. Gai dangada i kilaa ne ssili ange gi Iesu, “E heohi de hagaieiangi magi i de laangi o Sabbath?” Gilaadeu ne ssili ange mee nei e hagabaubau ai ia.

¹¹ Aagai Iesu ne ssili ange gi gilaadeu, “Noo dahi goodou e dahi ana ssiibi, gai gu doo ange gi lo te geelinga i de laangi o Sabbath, gai e aha, ia e dee hano naa ga dada age dana ssiibi?

¹² Tangada e hagamogomogo ange mmao i dahi ssiibi! Deenei ai, e alaange donu de hai tanuaa i de laangi o Sabbath.”

¹³ Gai Iesu ga hai ange gi taane magau de lima, “Haalo doo lima.” Aagai taane laa ga haalo dono lima, gai gu ieiangi bei de lima ange laa.

¹⁴ Aagai denga Pharisee ne ssao ga hulo e hagasaele ange delaadeu hai e daa ai Iesu gi magau.

Tangada hai hegau a de Maadua ne hili

¹⁵ Iesu ne iloo e ia de mee nei, gai ia ga hano gee mai i kilaa, aagai ne soa dangada ne daudali ange i de ia. Aagai ia ga hagaieiangi denga magi alodahi.

¹⁶ Gai ia ne tala ange gilaadeu gi dee daalaa ange gi dangada be ia goai.

¹⁷ Mee nei ne hai e hagassula ai muna gu tala laa i daho de pelaabisi go Isaiah, e hai ange,

¹⁸ “Deenei dogu dangada hai hegau go au ne hilia ia, au e aloha i de ia ma de malangilangi i de ia. Au e gaavange naa gi de ia dogu Hagasaalunga, gai ia ga agoago ange ai denga Gentile dagodo o dagu hagamodu heohi.

¹⁹ Ia e dee hagadaumee, aabe e oo, gai e dee langona donu dono leo i honga denga haiava.

²⁰ Ia e dee hhadi donu de aalege gu dai hadi laa, be e diinei de wick gu dai made laa, ga dae ai gi dana hai gi sula de hagamodu heohi;

²¹ gai go ia de tali hagalodolodo a denga Gentile.”

Iesu ma Beelzebul

²² Dangada ne gaamai hogi gi Iesu dahi dangada dee gide ma de lau de alelo, go hiidinga de hagasaalunga baubau e noho i ono daha; gai Iesu ga hagaieiangi ia, gai taane laa gu basa ma de gidee.

²³ Gai dangada alodahi gu llele mouli, ga hagataba, “E dee deenei donu Tama a David?”

²⁴ Gai denga Pharisee gu langona e gilaadeu muna laa, gai gilaadeu ga hagataba, “Taane nei e hai gi hulo denga hagasaalunga baubau i ssauaa o Beelzebul, tagi o denga hagasaalunga baubau.”

²⁵ Gai Iesu gu iloo alaadeu maanadu, gai ia ga hai ange gi gilaadeu, “De nohoanga hodooligi e hagadau hai baasi e maoha donu, gai de hale aabe go de aduhale e hagadau hai baasi e dee maua donu i de duu gi makaga.

²⁶ Gai noo Satan e hai gi hano Satan, gai ia e hai baasi ange donu huu gi de ia, gai dee hee ai naa de hai e duu ai gi makaga dono nohoanga hodooligi?

²⁷ Gai noo au e hai gi hulo gee denga hagasaalunga baubau i ssauaa o Beelzebul, gai niioai ai ssauaa a oodou dangada agoago e hai ai laa gi hulo gee denga hagasaalunga baubau? Deenei ai, go oodou dangada agoago e hagamodu ina oodou muna.

²⁸ Aagai noo au e hai gi hulo gee denga hagasaalunga baubau i ssauaa o de Hagasaalunga o de Maadua, gai de nohoanga hodooligi o de Maadua gu dae mai donu gi oodou daha.

²⁹ Dee hee de hai a dahi e maua ai i de ulu i de hale o tangada mmahi e kave ai ono goloa, noo ia e dee nnoa i mua tangada mmahi laa? Gai ia ga maua i de gaiaa goloa i dono hale.

³⁰ Be goai e dee madali au e hai baasi mai donu gi de au; gai be goai e dee hagabudulia madali au, se dangada donu e hagassiia saele.

³¹ Deenei ai, au e hai adu gi goodou, de Maadua e degi ange gi haisala ma muna hagangadi mee alodahi a dangada; aagai be goai e basa hagangadi mee i de Hagasaalunga ⌊Dabu⌋, ia e dee tala donu ono haisala.

³² Be goai e daalaa dahi muna e hai baasi ange ai gi Tama a Tangada, gai e tala donu ono haisala, aagai be goai e daalaa hanu muna e hai baasi ange ai gi de Hagasaalunga Dabu, gai e dee tala donu ono haisala iainei, aabe go de masavaa e humai.

De manu somo ma ono hua

³³ “Noo e danuaa de manu somo, gai ono hua e danuaa hogi; gai noo e baubau de manu, gai ono hua e baubau hogi, go hiidinga dangada e madea de manu somo i ono hua.

³⁴ Goodou dama a denga labodo hagammau! Dee hee doodou hai e maua ai i de tala hanu mee danuaa, gai goodou ni dangada baubau? Muna a tangada e hagaago mai donu mee i ono lodo.

³⁵ Tangada danuaa e hai tanuaa, go hiidinga ono lodo iai tanuaa. Aagai tangada baubau e hai de baubau, go hiidinga ono lodo iai de baubau.

³⁶ Aagai au e hai adu gi goodou, de laangi naa huu e hagamodu ai muna, gai dangada alodahi e tala naa hiidinga o alaadeu ngadi muna gu tala.

³⁷ Gai au muna e hagaola aabe e hagahaisala goe.”

De hagailonga o Jonah

³⁸ Hanu dangada sisi ma Pharisee ne hai ange gi Iesu, “Tangada Agoago, gimaadeu e llodo e tilo dahi hagailonga mai i oo daha.”

³⁹ Iesu ne basa ange ga hai ange gi gilaadeu, “De atangada baubau ma tee hai hegau i de mee abodonu e ssala dahi hagailonga. Gai e deai ange donu se hagailonga e hagaago ange gi gilaadeu, go de hagailonga donu huu o de pelaabisi go Jonah.

⁴⁰ Jonah ne noho i lo te dinae o dahi mamu laumalie i e dolu laangi ma e dolu boo; gai e bei ai hogi, Tama a Tangada e dagodo naa i lalo de gelegele i e dolu laangi ma e dolu boo.

⁴¹ Dangada o Nineveh e hiihidi age naa ga hagabaubau de atangada nei i de laangi hagamodu muna, go hiidinga gilaadeu ne daahuli olaadeu lodo i agoago a Jonah; gai tilo, dahi e maolunga ange laa i Jonah gu i kinei!

⁴² De hine hodooligi mai i Ngaage e hidi age naa ga hagabaubau de atangada nei i de laangi hagamodu muna, go hiidinga ia ne humai i de bido laa o henua i lalo e hagallongo dagodo de heiangi o Solomon; gai tilo, dahi e maolunga ange i Solomon gu i kinei!

De aahe mai o denga hagasaalunga baubau

⁴³ “De masavaa naa huu o de hagasaalunga baubau e sao ai ga hano gee mai i daho tangada, gai ia ga hagadaga i mommee e deai vai iai e ssala ai dono mommee e hagamabu ai. Gai tee gidee e ia dahi mommee,

⁴⁴ gai ia ga hagadaba, ‘Au ga ahe nei gi de hale oogu ne humai ai nei.’ Gai de masavaa huu oona ne ahe mai ai, gai ia gu gidee bolo de mommee laa e ngadi dagodo, gai gu hagagilimalali ma de hagadanuaa.

⁴⁵ Gai ia ga hano ga ssala ange e dogohidu hagasaalunga e kii ange laa de baubau i de ia, gai gilaadeu ga ulu ga nnoho i kilaa. Gai dagodo o tangada laa gu kii ange de baubau i muli mai. Gai aanei naa hogi dagodo o de atangada baubau nei.”

Tinana ma daina o Iesu

⁴⁶ De masavaa o Iesu e basa ange ai gi dangada, gai dono dinana ma ono daina daane ne loomai ga tuu i duaahaho, gilaadeu ne llodo e pasa ange gi de ia.

⁴⁷ Gai dahi dangada ne hai ange gi de ia, “Tilo, doo dinana ma oo daina daane e tuu i duaahaho, gilaadeu e llodo e pasa adu gi de goe.”

⁴⁸ Gai Iesu ne ssili ange gi tangada ne basa ange laa gi de ia, “Goai dogu dinana? Aagai goai ogu daina daane?”

⁴⁹ Gai ia ne sisi ange ana dangada agoago, gai ia ga hai ange, “Deenei dogu dinana ma ogu daina.

⁵⁰ Be goai e haia lodo o dogu Damana i de langi laa, gai go ia donu dogu daina daane, ma dogu daina hahine, aama dogu dinana.”