Matthew 11 - De Beebaa Dabu

Iesu ma John taane Babudaisi

¹ Gai ga lava huu i de tala ange a Iesu gi ana dangada agoago e dinoangahulu ma dogolua alaadeu mee e hai, gai ia ga hano gee i de mommee laa ga hagadaga i olaadeu aduhale ga agoago ai.

² Gai ga langona huu e John dagodo hegau a Klisdo, i dono masavaa e noho ai i lo te hale pono, gai ia ga hai gi hulo e dogolua ana dangada agoago

³ gi siilia ange, “Go koe de ia gu tala laa bolo e humai, aabe gimaadeu e tali ange dahi dangada gee?”

⁴ Iesu ne hai ange gi gilaau, “Gooluu hulo daalaa ange gi John ooluu mee gu langona ma de gidee:

⁵ de gau dee kide gu gidee, de gau balagelage gu seesee, de gau mmagi lebelaa gu gilimalali, de gau longoduli gu langona, de gau maakau gu mouli age, gai de longo danuaa gu tala ange gi de gau hagaau aloha.

⁶ Gai e manuuia tangada e dee ahe dua i ogu hiidinga.”

⁷ Gai ga hulo gee huu luu agoago laa, gai Iesu ga basa ange gi dangada i dagodo o John, “Se aha oodou e hulo laa e tilo i de vao? Se madila e ilihia saele i de madangi?

⁸ Gai se aha donu oodou e hulo laa e tilo? Se dangada e gahu i malo danuaa? Tilo, dangada e kahu i malo danuaa e nnoho i lodo hale o denga hodooligi.

⁹ Gai se aha ai oodou e hulo laa e tilo? Se pelaabisi? Uaa, au e hai adu gi goodou, ia e maolunga ange donu i de pelaabisi.

¹⁰ Deenei taane gu sisi laa ono dagodo e hai ange, ‘Tilo, au e hai gi hano dogu dangada hagailoo i oo mada i mua, gi hagadabena ai de haiava i oo mada i mua.’

¹¹ Ni muna abodonu aagu e hai adu nei gi goodou, tigi ai ange donu se dangada ne haanau i daho denga haahine e maolunga ange i a John taane Babudaisi. Aagai tangada e maolalo i de nohoanga hodooligi o de langi, e maolunga ange i de ia.

¹² Mai i de masavaa o John taane Babudaisi ga dae mai ai gi iainei, aagai de nohoanga hodooligi o de langi e vaivai haia, aama de haia gi de mahi i daho olaadeu e mmahi.

¹³ Denga pelaabisi alodahi ma de hainga ne pasa pelaabisi ga dae mai ai gi a John;

¹⁴ gai noo goodou e llodo e hagadonu, gai deenei donu Elijah gu tala laa bolo e humai.

¹⁵ Be goai e hanu ono dalinga, gai ia gi hagalaangona.

¹⁶ Gai se aha aagu e hagadagodo ange aagena de atangada nei? Gilaadeu e bei dagodo o denga gauligi e nnoho laa i de mommee hagao mee, ma e hagaagahi ai olaadeu soa ma e hai ange,

¹⁷ ‘Gimaadeu e hagadangidangi i denga flute, gai goodou e dee aanu! Gimaadeu e hua taahili o de magau, gai goodou e dee hinangalosaa!’

¹⁸ Go hiidinga John ne humai gai ia tee gaimee aabe ne unu uvaini, aagai gilaadeu ne hagataba, ‘De hagasaalunga baubau e noho i ono daha’.

¹⁹ Gai Tama a Tangada ne humai ga gaimee ma de unu, gai gilaadeu ne hagataba, ‘Ia se dangada aagai ma de lodo e unu mee vii, gai se soa niio de gau e hagabudulia taagisese ma de gau baubau.’ Aagai de heiangi ⌊o de Maadua⌋ gu hagaago mai bolo e heohi i ana hegau.”

E vakaa naa denga aduhale tee daahuli

²⁰ Gai Iesu ne daamada de hagasee aduhale aana ne hai ai sauaa lagolago, go hiidinga gilaadeu tee daahuli olaadeu lodo.

²¹ “E vakaa naa goe, Korazin! E vakaa naa goe, Bethsaida! Go hiidinga noo denga mee hagalele mouli ne hai i ooluu daha ne hai i Tyre ma Sidon, gai dangada i kilaa ne daahuli olaadeu lodo madagidagi, ga kahu i malo daladala ma de hulu i lehu.

²² Aagai au e hai adu gi goodou, de hagaduasala o Tyre ma Sidon e maamaane ange i de laangi hagamodu muna.

²³ Gai koe, Capernaum, koe e hai naa gi maolunga goe bei de maolunga o de langi? Gai koe e tili iho naa donu gi Hades! Go hiidinga noo denga sauaa ne hai i oo daha ne hai i Sodom, gai goi duu donu huu ga dae mai ai gi anailaa nei.

²⁴ Aagai au e hai adu gi de goe, de hagaduasala o Sodom e maamaane ange i doo hagaduasala i de laangi hagamodu muna.”

Loomai hagammabu i ogu daha

²⁵ Gai Iesu ne hagadaba i de masavaa laa, “Au e tuhi goe, Tamana, Tagi Maolunga o de langi ma henua i lalo, go hiidinga koe gu hagammuni mee nei i gilaadeu e heiangi ma de iloo mee, gai gu hagaago ange gi denga gauligi vaaligiligi.

²⁶ Uaa, Tamana, aanei donu oo lodo.

²⁷ Dogu Damana gu gaamai gi de au mee alodahi. Gai e deai donu e iloo Tama, go Tamana donu huu; e deai hogi e iloo Tamana, go Tama donu huu, aama gilaadeu a Tama e lodo e hagaago Tamana aagena.

²⁸ Loomai gi de au, goodou alodahi e daalea ma de daemaha, gai au ga hagammabu goodou.

²⁹ Hagauda ina dagu mee hagauda, ma de agoago i ogu daha, go hiidinga au e daudonu ma de lodo maolalo; gai goodou ga maua de hagammabu oodou hagasaalunga.

³⁰ Go hiidinga de laagau aagu e hagauda adu e hai ngaohie, gai dagu mee saabai e gaavadu gi goodou e maamaane.”