Matthew 10 - De Beebaa Dabu

De hili o de gau tala

¹ Gai Iesu ne hagahi ana dangada agoago e dinoangahulu ma dogolua ga gaavange gi gilaadeu ssauaa e hai ai gi hulo gee hagasaalunga baubau, ma de hagaieiangi denga hagadaagangaa magi ma baageaa alodahi.

² Aanei ingoo o de gau tala e dinoangahulu ma dogolua: de ingoo i mua go Simon, e hagaingoo ange laa hogi go Peter, ma dono daina daane go Andrew, ma James tama daane a Zebedee ma dono daina daane go John;

³ Philip ma Bartholomew, Thomas ma Matthew taane hagabudu taagisese, ma James tama daane a Alphaeus ma Thaddaeus;

⁴ ma Simon taane Canan, aama Judas Iscariot ne gaavange laa Iesu.

De hai gi hulo o tinoangahulu ma dogolua

⁵ Iesu ne hai gi hulo tinoangahulu ma dogolua nei, ga hai ange gi gilaadeu, “Goodou e dee hulo gi denga Gentile, aabe go aduhale o de gau Samaria.

⁶ Gai goodou hulo donu huu gi denga ssiibi i magavaa o dangada o Israel gu dee maaleva laa.

⁷ Gai goodou ga agoago ange gilaadeu, ga hai ange, ‘Gu baa mai de nohoanga hodooligi o de langi!’

⁸ Gai goodou ga hagaieiangi magi, ga hagamouli age gilaadeu gu maakau, ma de hagaieiangi denga lebelaa, ma de hai gi hulo denga hagasaalunga baubau. Goodou tee hagao mee gu gaavadu naa gi goodou, deenei ai, goodou ngadi gaavange hogi gi dangada.

⁹ Goodou aude gaavee hanu goolo be ni selevaa, aabe go hanu copper i lodo oodou beele.

¹⁰ Goodou e dee kave hogi hanu beagi e hulo ai, be e lua malo gahugahu, be e lua mee vae, aabe se dogo; go hiidinga e heohi donu de kave a tangada hai hegau ono mee e gaimee ai.

¹¹ Gai dee hee naa huu de aduhale laumalie be se aduhale damaa mee oodou e ulu ai, gai goodou ga ssala tangada e malangilangi i de abodonu adu gi goodou, gai goodou ga nnoho i ono daha ga dae ai gi doodou hulo gee mai i kilaa.

¹² Gai noo gu ulu goodou i dahi hale, gai goodou ga hagaboo, ⌊ga hai ange, ‘De baba gi dagodo i oodou daha!’⌋

¹³ Aagai noo dangada i kilaa e heohi ange aagena, aagai de baba i oodou daha gi dagodo i kilaa; aagai noo gilaadeu e deai, gai de baba i oodou naa gi ahe adu gi goodou.

¹⁴ Gai noo e deai dangada e abodonu adu gi goodou, aabe hagalaangona oodou agoago, gai goodou luuluuia gelegele i oodou vae, i de masavaa oodou e ssao ai e hulo gee i de hale aabe go de aduhale laa.

¹⁵ Ni muna abodonu aagu e hai adu nei gi goodou, Sodom ma Gomorrah e danuaa ange i de aduhale laa i de laangi hagamodu muna.

De tae mai o denga hagaduasala

¹⁶ “Tilo, au e hai goodou gi hulo bei dagodo o denga ssiibi i magavaa o denga wolf. Deenei ai, goodou gi heiangi bei denga labodo, gai gi daudonu bei dagodo o denga manu kono.

¹⁷ Goodou dagidiiloo iho goodou, go hiidinga dangada e gaavange naa goodou gi de hagabuulinga hagasaele, ma de hagailiili goodou i lodo olaadeu synagogue.

¹⁸ Gai goodou e gaavee naa gi mada i mua o denga goobenaa ma hodooligi i ogu hiidinga, gai goodou ga tala hagadonu ange ai au gi gilaadeu aama denga Gentile.

¹⁹ Gai de masavaa naa huu alaadeu e gaavange ai goodou gi de hainga, gai goodou gi dee manavasaa i doodou hai e pasa ange ai, aabe go oodou muna e pasa ange ai, go hiidinga e gaavadu naa donu gi goodou oodou muna e pasa ange ai i de aoaa laa.

²⁰ Go hiidinga e dee go goodou e pasa ange, gai go de Hagasaalunga o doodou Damana e basa i oodou daha.

²¹ Dahi dangada e gaavange naa dono daina daane e daa gi magau, gai tamana e gaavange naa dana dama. Denga dama e hai baasi ange naa gi olaadeu maadua ga daa gilaadeu gu maakau.

²² Gai dangada alodahi e kino naa i goodou i hiidinga o dogu ingoo. Gai be goai e lodo mmahi ga dae ai gi de hagaodi, gai ia e hagamouli.

²³ De masavaa naa huu oodou e vaivai haia ai i dahi aduhale, gai goodou saavini hulo gi de aduhale e mua ange. Ni muna abodonu aagu e hai adu nei gi goodou, Tama a Tangada e dae mai naa i mua doodou hulo gi aduhale hugadoo o Israel.

²⁴ Gai tangada e agoago i daho dahi e dee maolunga ange i dono dangada agoago. Gai tangada hai hegau e dee maolunga ange i dono dangada aamua.

²⁵ Gai tangada e agoago i daho dahi gi malangilangi noo ia gu bei dagodo o dono dangada agoago, gai tangada hai hegau gi malangilangi noo ia gu bei dagodo o dono dangada aamua. Noo dangada e hagahi ange Beelzebul gi tangada aamua o de hale, gai e kii ange naa donu de baubau mee alaadeu e hagahi ange gi dangada i dono hale.

De ia e heohi taadeu maatagu ai

²⁶ “Deenei ai, goodou gi dee maatagu i dangada, go hiidinga mee alodahi e hagammuni e hagaago mai naa donu, aagai mee alodahi e dee iloo e hai naa donu ga iloo.

²⁷ Agu mee e tala adu gi goodou i lo te gohu, gai goodou daalaa i de maalama; agu mee ne musumusu adu gi oodou dalinga, gai goodou hagailoo ina i tua denga hale.

²⁸ Goodou gi dee maatagu i gilaadeu e daia ga magau de angaanga nei, aagai e dee maua e gilaadeu i de daa gi magau de hagasaalunga. Gai goodou gi maatagu i de Maadua, go de ia e maua i de daa ngaadahi de hagasaalunga ma de angaanga i de ahi.

²⁹ E aha, e dee se dahi sseene donu huu e hagao ai e lua sparrow? Gai e deai donu se gilaadeu e doo iho gi honga de gelegele, gai doodou Damana e dee iloo.

³⁰ Aagai denga ngaangaaulu i oodou biho e odi i de dau.

³¹ Deenei ai, goodou gi dee maatagu, i hiidinga goodou e hagamogomogo ange i denga sparrow lagolago.

De tala hagadonu Klisdo i madamada o dangada

³² “Be goai e daalaa bolo ia se dangada niiogu i madamada o dangada, gai au e tala naa hogi bolo ia se dangada niiogu i mada luu mada o dogu Damana i de langi.

³³ Aagai be goai e hagadee iloo ina au i madamada o dangada, gai au e hagadee iloo naa hogi ia i mada luu mada o dogu Damana i de langi.

E dee go de nnoho paba, aagai go de gadilaasa

³⁴ “Goodou aude maanadu bolo au ne humai e gaamai de baba gi henua i lalo. Au tee humai e gaamai de baba, aagai go de gadilaasa.

³⁵ Au ne humai e hai gi hai baasi ange taane gi dono damana, gai tamaa hine ange gi dono dinana, de bodu o tama daane ange gi dono saulaba.

³⁶ Gai hagadaumee o tangada go dangada donu i dono huaabodu.

³⁷ Be goai e kii dono damana be go dono dinana i dono aloha ai i de au, e dee bau ange gi de hagabinga bolo se dangada agoago niiagu; gai be goai e kii dana dama daane be go dana damaa hine i dono aloha ai i de au, gai ia e dee bau ange i de hagabinga bolo se dangada agoago niiagu.

³⁸ Be goai e dee hagauda ina dono laagau lui e daudali mai ai i de au, gai ia e dee bau ange gi de hagabinga bolo se dangada niiogu.

³⁹ Be goai e gidee dono mouli e tili donu; gai be goai e tili dono mouli i ogu hiidinga e kave donu de mouli.

⁴⁰ Be goai e abodonu adu gi goodou, e abodonu mai donu gi de au; gai be goai e abodonu mai gi de au, e abodonu ange donu gi de ia ne haia nei au gi humai.

⁴¹ Be goai e abodonu ange gi de pelaabisi i hiidinga ia se pelaabisi, e kave naa hogi de hagaoanga o de pelaabisi; gai be goai e abodonu ange gi tangada heohi i hiidinga ia se dangada heohi, e kave naa hogi de hagaoanga o tangada heohi.

⁴² Gai be goai e gaavange dahi ubu vai maluulu gi dahi gilaadeu e maolalo nei, i hiidinga ia se dangada agoago niiagu, ni muna abodonu aagu e hai adu nei gi goodou, ia e kave naa donu dono hagaoanga.”