Matthew 1 - De Beebaa Dabu

Denga dubuna madagidagi o Iesu Klisdo

¹ De beebaa e sisi ai ingoo o dubuna madagidagi o Iesu Klisdo, de hagadiilinga o David, de mogobuna o Abraham:

² Abraham ne hagadili Isaac, Isaac ne hagadili Jacob, gai Jacob ne hagadili Judah ma ono daina.

³ Judah ne hagadili Perez ma Zerah i daho Tamar, Perez ne hagadili Hezron, gai Hezron ne hagaili Ram.

⁴ Ram ne hagadili Amminadab, Amminadab ne hagadili Nahshon, gai Nahshon ne hagadili Salmon.

⁵ Salmon ne hagadili Boaz i daho Rahab, Boaz ne hagadili Obed i daho Ruth, gai Obed ne hagadili Jesse.

⁶ Gai Jesse ne hagadili de hodooligi go David. David ne hagadili Solomon i daho de bodu o Uriah.

⁷ Solomon ne hagadili Rehoboam, Rehoboam ne hagadili Abijah, gai Abijah ne hagadili Asa.

⁸ Asa ne hagadili Jehoshaphat, Jehoshaphat ne hagadili Joram, gai Joram ne hagadili Uzziah.

⁹ Uzziah ne hagadili Jotham, Jotham ne hagadili Ahaz, gai Ahaz ne hagadili Hezekiah.

¹⁰ Hezekiah ne hagadili Manasseh, Manasseh ne hagadili Ammon, gai Ammon ne hagadili Josiah.

¹¹ Josiah ne hagadili Jeconiah ma ono daina, i de masavaa o delaadeu gaavee gi Babylon.

¹² Gai dua delaadeu gaavee gi Babylon, gai Jeconiah ne hagadili Shealtiel, Shealtiel ne hagadili Zerubbabel.

¹³ Zerubbabel ne hagadili Abiud, Abiud ne hagadili Eliakim, gai Eliakim ne hagadili Azor.

¹⁴ Azor ne hagadili Zadok, Zadok ne hagadili Akim, gai Akim ne hagadili Eliud.

¹⁵ Eliud ne hagadili Eleazar, Eleazar ne hagadili Matthan, gai Matthan ne hagadili Jacob.

¹⁶ Jacob ne hagadili Joseph, de bodu o Mary tinana o Iesu, e hagaingoo ange laa hogi go de Klisdo.

¹⁷ E madaangahulu ma haa atangada mai i Abraham ga dae mai ai gi David; gai mai i David ga dae mai ai gi de gaavee o dangada gi Babylon e madaangahulu ma haa hogi atangada. Gai mai i de gaavee gi Babylon ga dae mai ai gi Klisdo e haa hogi atangada.

De haanau o Iesu

¹⁸ Gai deenei tagodo de haanau o Iesu Klisdo: dono dinana go Mary ne hagababa ange gi Joseph, gai i mua delaau hagahebaa, gai gu gidee mai bolo Mary gu hai dama i daho de Hagasaalunga Dabu.

¹⁹ Gai dono bodu go Joseph se daane e hai hegau i de mee abodonu. Ia tee lodo e hagadogaa Mary, gai ia ne lodo e hagammuni dono maavae ange gi Mary.

²⁰ Aagai dana masavaa ne maanadu ai de hai de mee nei, gai tangada de langi o Tagi Maolunga ne hakide ange gi de ia i de midi, ga hai ange, “Joseph, de mogobuna o David, aude madagu i de hai bodu ange gi Mary, go hiidinga tama i ono lodo naa ne hagadili i daho de Hagasaalunga Dabu.

²¹ Ia e haanau naa dahi dama daane, gai koe ga hagaingoo ange ia go Iesu, go hiidinga ia e hagaola naa ono dangada mai i olaadeu haisala.”

²² Mee nei alodahi ne hai e hagassula ai muna a Tagi Maolunga gu tala laa i daho de pelaabisi,

²³ “Tilo, de bua moe e hai dama naa ga haanau dahi dama daane, gai gilaadeu e hagaingoo ange naa ia go Emmanuel,” e bei, “De Maadua madali gidaadeu.”

²⁴ Gai de masavaa huu o Joseph ne alahage ai, gai ia ga hai gu bei muna a tangada de langi o Tagi Maolunga gu tala ange laa gi de ia; ia ne hai bodu ange gi Mary,

²⁵ aagai Joseph tee hagahebaa ma Mary ga dae ai gi de haanau o dana dama daane, gai Joseph ga hagaingoo ange ia go Iesu.