Mark 9 - De Beebaa Dabu

¹ Iesu ne hai ange hogi gi dangada, “Ni muna abodonu aagu e hai adu nei gi goodou, hanu dangada e tuu nei i kinei e dee maakau naa donu ga dae ai gi delaadeu gidee de nohoanga hodooligi o de Maadua e humai i de mmahi.”

De hagadagodo gee o Iesu

² Dua e ono laangi, gai Iesu ne hagahi Peter ma James aama John, ga hulo ai gilaadeu gi dahi mounga maolunga e deai dangada iai. Gai ia gu hagadagodo gee i olaadeu madamada;

³ ono malo gu malamalama ma de tea mmao, tigi ai se dangada i henua i lalo ne maua i de hai gi tea hanu malo, bei dagodo de tea o ono malo.

⁴ Gai Elijah ma Moses gu hagassula mai ga pasa ange gi Iesu.

⁵ Gai Peter ne hai ange gi Iesu, “Tangada agoago, e danuaa taadeu nnoho i kinei! Gidaadeu ga hagatuu e dolu baasi hale; e dahi oou, e dahi o Moses, gai e dahi o Elijah.”

⁶ (Gai ia tee iloo donu ana muna ne tala, go hiidinga gilaadeu gu maatagu mmao.)

⁷ Gai dahi giliiga gu hano iho ga haoli gilaadeu, gai dahi leo mai i lo te giliiga laa ga hagadaba, “Deenei dagu Dama Daane hagamogomogo; goodou hagalaangona ana muna!”

⁸ De masavaa laa donu huu, gai gilaadeu ga kalo age gu dee gidee ange e gilaadeu hanu dangada, go Iesu donu huu.

⁹ Gai de masavaa huu olaadeu ne iho mai ai i honga de mounga, gai Iesu ga hai ange gilaadeu gi dee daalaa ange gi dangada mee alaadeu gu gidee laa, ga dae ai gi de mouli age o Tama a Tangada mai i de magau.

¹⁰ Gai ana dangada agoago ne daohi mee laa i olaadeu lodo, ma de hagadau ssili be dee hee de hagadoonunga o de mouli age mai i de magau.

¹¹ Gai gilaadeu ne ssili ange hogi gi Iesu, “Gu aha gu hagataba ai laa de gau sisi bolo Elijah e humai naa i mua?”

¹² Ia ne hai ange gi gilaadeu, “Elijah e humai naa donu i mua, ga hagadabena mee alodahi. Gai gu aha gu sisi ai laa, bolo Tama a Tangada e kona naa donu dono hagaduasala ina, ma dono hagangadi mee ina?

¹³ Aagai au e hai adu gi goodou, bolo Elijah gu humai donu, gai dangada gu hai ange gi de ia mee alodahi alaadeu e llodo e hai ange gi de ia, bei de hai gu sisi ai.”

De hagaieiangi o tama iai de hagasaalunga baubau

¹⁴ Gai de masavaa huu olaadeu ne aahe mai ai gi daho denga dangada agoago ange laa, gai gilaadeu gu gidee dangada soa gu hagabuni mai gi kilaa. Gai de gau sisi e hagadaumee ange gi denga dangada agoago.

¹⁵ Aagai ga gidee huu e dangada Iesu, gai gilaadeu gu llele mouli, gai gilaadeu ga saavini ga hedae ange gi de ia.

¹⁶ Gai Iesu ga ssili ange gi gilaadeu, “Ni aha oodou e hagadaumee ai naa?”

¹⁷ Gai dahi daane i magavaa o dangada ga hai ange gi Iesu, “Tangada Agoago, au ne gaamai dagu dama daane gi de goe, i hiidinga dahi hagasaalunga baubau gu noho i ono daha, gai gu hai ia gi dee maua i de basa.

¹⁸ Gai de masavaa naa huu a de hagasaalunga e hagaduasala ai ia, gai ia ga hagabaguu gi honga de gelegele, ga hagasali dono saavale ma de kadi ono gauvae, aama de hagamakaga dono angaanga. Gai au ne dangidangi ange gi au dangada agoago, gilaadeu gi haia gi hano gee de hagasaalunga laa, gai gilaadeu tee maua.”

¹⁹ Aagai Iesu ne basa ange ga hai ange gi gilaadeu, “Goodou se atangada e dee hagadonusia! Dee hee maa taulooloa dogu noho i oodou daha? Dee hee maa taulooloa de golomagi ogu lodo i goodou? Gaamai ia gi ogu daha!”

²⁰ Gai gilaadeu ga dagi mai tama daane laa gi ono daha. Gai de masavaa huu a de hagasaalunga baubau laa ne gidee ai Iesu, gai ia ga hai gu lele age tama laa i de masavaa laa donu huu, ma de hagabaguu ia gi honga de gelegele, ga hai ia gi dige saele ma de hagasali dono saavale.

²¹ Gai Iesu ga ssili ange gi tamana o tama daane laa, “Dee hee maa taulooloa dono dagodo bee nei?” Gai tamana ga hai ange, “Mai loo i dono gauligi.

²² Gai gu dee modu dana hagabaguu ange dagu dama gi lo te ahi ma lo te vai e daa ai ia gi magau. Gai noo koe e maua, gai koe lodo aloha mai gi gimaau!”

²³ Iesu ne hai ange gi de ia, “ ‘Noo koe e maua,’ — mee alodahi e maua donu i de hai ange gi tangada e hagadonusia.”

²⁴ De masavaa laa gai tamana o tama daane laa ga hagaleo laumalie, ga hai ange, “Au e hagadonusia, gai balea mai au i tee dohu dogu gai!”

²⁵ Gai ga gidee huu e Iesu dangada soa gu saavini mai gi kilaa, aagai ia ga hagasee de hagasaalunga baubau laa, ga hai ange gi de ia, “De hagasaalunga e noodia laa dono alelo ma de pono luoono dalinga, au e hai adu gi de goe, sao mai i ono daha, gai koe aude ahe ange donu gi ulu gi ono lodo!”

²⁶ Aagai de hagasaalunga laa ga oo ma de hai gi lele age tama daane laa, gai ia ga sao ga hano gee mai i ono daha. Gai tama daane laa gu bei dagodo o tangada magau, gai dangada ga hagataba, “Ia gu magau!”

²⁷ Aagai Iesu ga poo dono lima ga hagahidi age ia, gai ia gu hidi ga duu gi lunga.

²⁸ Gai de masavaa huu o Iesu ne ulu ai gi lo te hale, gai ana dangada agoago ga ssili ange gi de ia, “Gu aha tee maua ai laa e gimaadeu i de hai gi hano gee de hagasaalunga baubau laa?”

²⁹ Ia ne hai ange gi gilaadeu, “Mee bee nei e maua donu huu i de hai gi hulo gee i talodalo.”

De ahe ange a Iesu ga tala dono magau

³⁰ Gai Iesu ma ana dangada agoago ne loomai i kilaa ga hulo ga hagadaga i Galilee. Gai ia tee hai gi iloo e dangada delaadeu mommee iai,

³¹ go hiidinga ia e agoago ange ana dangada agoago i de masavaa laa. Gai ia ne hai ange gi gilaadeu: “Tama a Tangada gu dai gaavange naa gi ssauaa o dangada, gai gilaadeu e daa naa ia gi magau. Aagai dua naa huu e dolu laangi gai ia gu mouli age.”

³² Aagai gilaadeu tee tonu ange gi ana muna, gai ne maatagu i de ssili ange gi de ia.

Goai e maolunga?

³³ Gai gilaadeu gu tae gi Capernaum. Gai de masavaa o Iesu gu noho ai i lo te hale, gai ia ga ssili ange gi gilaadeu, “Ni aha oodou e hagadaumee ai laa i honga de haiava?”

³⁴ Gai gilaadeu gu dee mmuu, go hiidinga de masavaa olaadeu ne seesee mai ai i honga de haiava, gai gilaadeu ne hagadaumee i olaadeu magavaa, be goai e maolunga.

³⁵ Gai ia ne hano ga noho gi lalo ga hagahi tinoangahulu ma dogolua, ga hai ange gi gilaadeu, “Be goai e lodo go ia i mua, gai ia gi haia go ia e hagaodia mai, ma de hai gi se dangada hai hegau niio dangada alodahi.”

³⁶ Gai Iesu ga gaamai dahi gauligi ga hagaduu i olaadeu magavaa, ga buuludi ange ia, gai ia ga hai ange gi gilaadeu,

³⁷ “Be goai e abodonu ange gi dahi gauligi bei tamaa gauligi nei i hiidinga o dogu ingoo, gai ia e abodonu mai donu gi de au. Gai be goai e abodonu mai gi de au, gai ia e abodonu ange donu gi de ia ne haia nei au gi humai.”

Tangada e dee hai baasi mai se soa donu niiodaadeu

³⁸ John ne hai ange gi de ia, “Tangada Agoago, gimaadeu ne gidee dahi daane e hai gi hulo denga hagasaalunga baubau i doo ingoo, gai gimaadeu ga hai ia gi dee haia, go hiidinga ia e dee hano saele madali gidaadeu.”

³⁹ Aagai Iesu ne hai ange, “Goodou aude buibuia ia; go hiidinga e deai donu se dangada e haia dahi sauaa i dogu ingoo, gai muli mai ga tala hanu muna e hai baasi mai ai gi de au.

⁴⁰ Be goai e dee hai baasi mai gi gidaadeu, gai ia se soa donu niiodaadeu.

⁴¹ Ni muna abodonu aagu e hai adu nei gi goodou, be goai e gaavadu gi goodou dahi ubu vai i dogu ingoo, i hiidinga goodou nii de Klisdo, gai ia e dee tili donu dono hagaoanga.

Denga hagatale e haia ga haisala dangada

⁴² “Gai be goai e haia ga haisala dahi dangada maolalo bee nei gu hagadonusia au, gai e danuaa ange donu de nnoa ange dahi hadu mmili laumalie gi dono ua, ga tili ai ia gi lo te moana gelo.

⁴³ Noo doo lima e hai ga haisala goe, gai koe duudia dilia. E danuaa ange doo ulu i de mouli ma doo angaanga e dee odi ange, i doo hano gi lo te ahi ma luoo lima ngaadahi, go de mommee e deai se magau ai de ahi. [

⁴⁴ Go de mommee e dee maakau ai denga ilo, gai de ahi e dee magau donu.]

⁴⁵ Gai noo doo vae gu hagahaisala goe, gai koe duudia dilia. E danuaa ange doo ulu i de mouli ma dahi vae, i doo tili ange gi lo te ahi ma luoo vae ngaadahi. [

⁴⁶ Go de mommee e dee maakau ai denga ilo, gai de ahi e dee magau donu.]

⁴⁷ Gai noo doo ganomada e hagahaisala goe, gai koe laoa mai dilia. E danuaa ange doo ulu i de nohoanga hodooligi o de Maadua ma dahi ganomada, i doo tili ange gi lo te ahi ma luoo ganomada ngaadahi,

⁴⁸ go de mommee e dee maakau ai denga ilo, gai de ahi e dee magau donu.

⁴⁹ Dangada alodahi e hagagilimalali naa i de ahi.

⁵⁰ Soolo se mee danuaa; aagai noo gu dee mami soolo, gai dee hee ai de hai e hagaahe ange ai e hai gi mami soolo? Haia gi dagodo soolo i oodou lodo, gi maua ai e goodou i de nnoho hagabuni i de baba.”