Mark 8 - De Beebaa Dabu

De haangai o de haamano

¹ Laangi laa gai ne soa dangada ne hagabuni mai gi kilaa, gai gu deai alaadeu mee gai, gai Iesu ga hagahi ana dangada agoago ga hai ange gi gilaadeu,

² “Au gu lodo aloha i dangada soa nei. Gu dolu olaadeu laangi ne nnoho ai madali au, gai gu deai hogi alaadeu gai.

³ Noo au e hai gilaadeu gi hulo gi olaadeu hale ma de saalohia, gai gilaadeu e ssili mada naa i honga de haiava; go hiidinga hanu gilaadeu ne loomai i de mommee mmao.”

⁴ Gai ana dangada agoago ga hai ange gi de ia, “Gai go hee adaadeu e hai ai hanu pelaoaa lagolago e haangai ai dangada soa nei, gai kinei se lodo henua?”

⁵ Iesu ne ssili ange gi gilaadeu, “E hia pelaoaa i oodou daha?” Gilaadeu ne hai ange, “E hidu.”

⁶ Gai ia ga hai dangada soa laa gi nnoho gi honga de gelegele. Gai ia ga poo mai pelaoaa e hidu laa ga dalodalo, ga dohidohi ga gaavange gi ana dangada agoago gi duuhaa ange gi dangada, gai gilaadeu ga duha ange gi dangada.

⁷ Gai e hia hogi mamu vaaligiligi. Gai Iesu ne hagamanuuia hogi mee laa, ga hagadaba bolo gi duuhaa ange gi dangada.

⁸ Gai dangada ne gaimee ga boobosu, gai ana dangada agoago ga hagabudu mee ne doe ga hhao ai e hidu gede.

⁹ Agu made se haamano dangada ne gaimee i mee laa. Aagai Iesu ga hai dangada gi hulo.

¹⁰ Gai ia ga hagamoolau ga gage i de boose madali ana dangada agoago ga hulo ai gilaadeu gi de ungaamee o Dalmanutha.

De usuusu ange Iesu gi haia dahi hagailonga

¹¹ Hanu Pharisee ne loomai hogi ga hagadaumee ange gi Iesu, gilaadeu ne llodo e tilo dahi hagailonga mai de langi, e hagatale ai ia.

¹² Gai Iesu ne manava i lunga i taemaha ono lodo, ga ssili ange, “Gu aha de atangada nei gu ssala ai nei dahi hagailonga? Ni muna abodonu aagu e hai adu nei gi goodou, e deai donu se hagailonga e hagaago ange gi de atangada nei!”

¹³ Gai ia ga hano gee mai i olaadeu daha, ga gage i de boose ga hano gi de baasi laa de vai.

De mee hagahua a denga Pharisee ma Herod

¹⁴ Gai dangada agoago a Iesu ne ngalo i de kave hanu pelaoaa madali gilaadeu, e dahi donu huu duudangaa pelaoaa i olaadeu daha i lo te boose.

¹⁵ Gai Iesu ga hai ange gi gilaadeu, “Goodou kana ange dagidiiloo goodou i de mee hagahua a denga Pharisee aama Herod.”

¹⁶ Gai ana dangada agoago ne pasa i olaadeu magavaa ga hagataba, “⌊Ia e basa mai bee nei⌋ i hiidinga gu deai adaadeu pelaoaa.”

¹⁷ Gai Iesu ne iloo e ia alaadeu muna, gai ia ga ssili ange gi gilaadeu, “Gu aha goodou gu pasa ai naa i teai oodou pelaoaa? E aha, goodou tigi gidee naa donu aabe gi tonu ange? E aha, oodou lodo e makaga naa donu huu?

¹⁸ E hanu oodou ganomada, gai goodou e dee gidee? E hanu oodou dalinga gai goodou e dee langona? Goodou gu ngalo naa donu,

¹⁹ dagu dohidohi de lima duudangaa pelaoaa ga gaavange gi e limamano dangada, gai ne hia laa gede oodou ne hhao ga hoohonu i mee ne doe?” Gilaadeu ne hai ange, “E madaangahulu ma lua.”

²⁰ “Ma de masavaa aagu ne dohidohi ai denga pelaoaa e hidu, ga haangai ai de haamano dangada, gai ne hia laa gede oodou ne hhao ga hoohonu i mee ne doe?” Gilaadeu ne hai ange gi de ia, “E hidu.”

²¹ Gai ia ga ssili ange gi gilaadeu, “Goodou tigi tonu ange naa donu?”

De hagaieiangi a Iesu taane dee gide i Bethsaida

²² Gilaadeu ne hulo ga tae gi Bethsaida, gai hanu dangada ne dagi mai dahi daane dee gide gi Iesu, ga dangidangi ange ia gi boogia ange luoono mada.

²³ Gai ia ga poo de lima o taane dee gide laa ga dagi ia gi tua de aduhale. Gai ia ga saavale ange gi luoono mada ma de dugu ange dono lima gi ono elunga, ga ssili ange gi de ia, “Gu hanu naa au mee ne gidee?”

²⁴ Gai taane laa ga galo age, ga hai ange, “Au gu gidee dangada, gai gilaadeu e dulagi be ni manu ssomo e seesee saele.”

²⁵ Aagai Iesu ga ahe ange ga dugu ange luoono lima gi honga luu mada o taane laa, gai ia ga galo age huu, gai ia gu ieiangi, ia gu gidee danuaa mee alodahi.

²⁶ Gai Iesu ga hai ia gi hano gi dono hale, ga hai ange, “Aude ahe donu gi lo te aduhale.”

De tala a Peter bolo Iesu go de Klisdo donu

²⁷ Iesu ma ana dangada agoago ne hulo hogi gi denga aduhale o Caesarea Philippi. Gai de masavaa olaadeu e seesee ai e hulo, gai ia ga ssili ange gi gilaadeu, “E hagataba dangada bolo au goai?”

²⁸ Gilaadeu ne hai ange, “Hanu bolo koe go John taane Babudaisi, hanu bolo go Elijah, aagai hanu bolo go dahi pelaabisi.”

²⁹ Gai ia ga ssili ange gi gilaadeu, “Gai goodou e hagataba bolo au goai?” Peter ne hai ange, “Go koe donu de Klisdo.”

³⁰ Gai Iesu ga tala hagasoe ange gilaadeu gi dee daalaa ange gi dahi be ia goai.

De tala a Iesu dono hagaduasala ma dono magau

³¹ Gai Iesu ne daamada de tala ange gi gilaadeu, bolo Tama a Tangada e hagaduasala naa donu i mee lagolago, ma de hagangadi mee ina i daho denga dagi, ma de gau haimeedabu maolunga ma de gau sisi, aama dono daa ga magau, gai dua naa huu e dolu laangi gai ia gu mouli age.

³² Gai ia ne tala donu gi tonu ange gilaadeu gi mee nei. Gai Peter ga kave ia ga daamada de hagasee ia.

³³ Aagai Iesu ga huli dua ga galo ange gi ana dangada agoago, gai ia ga hagasee Peter, ga hai ange, “Satan, hannoo gi ogu dua! Koe e dee maanadu mee a de Maadua, aagai go mee a dangada!”

³⁴ Gai Iesu ga hagahi dangada ma ana dangada agoago ga hai ange, “Be goai e lodo e daudali mai i de au, gai ia gi hagangadi mee ina dono mouli, ga saabai dono laagau lui, ga daudali mai ai i de au.

³⁵ Gai be goai e doange ina dono mouli, gai e tili donu; aagai be goai e hagangadi mee ina dono mouli, i ogu hiidinga ma hiidinga o de longo danuaa, e hagaola donu dono mouli.

³⁶ Ni haigamaiana aha noo tangada e maua henua i lalo alodahi, aagai dono mouli e tili?

³⁷ Gai se aha a tangada e maua i de gaavange e sui ai dono mouli?

³⁸ Be goai e dogaa i de au ma agu muna i magavaa o de atangada baubau ma de haisalasala nei, gai Tama a Tangada e dogaa naa hogi i de ia, i dono masavaa e ahe mai ai i de mahamaha o dono Damana madali de gau de langi dabu.”