Mark 2 - De Beebaa Dabu

De hagaieiangi a Iesu taane balagelage

¹ Dua hanu laangi, gai Iesu ne ahe ange hogi gi Capernaum. Gai dangada gu langona bolo ia gu i dono hale.

² Gai dangada soa gu hagabuni mai gi kilaa, gai gu dee oo dangada i lo te hale ma duaahaho, gai ia ga agoago ange gilaadeu i muna a de Maadua.

³ Gai e dogohaa daane ne loomai ga saabai mai dahi daane balagelage gi ono daha.

⁴ Gai ga dee maua huu e gilaadeu i de hulo gi paa ange gi Iesu i hiidinga de soa dangada, gai gilaadeu ga langa tua de hale i honga de mommee oona iai laa, ga hagasege iho taane balagelage laa i honga dono moenga.

⁵ Gai ga gidee huu e Iesu dagodo o olaadeu kai, gai ia ga hai ange gi taane balagelage laa, “Dagu dama, gu maatala oo haisala.”

⁶ Gai e hanu dangada sisi e nnoho laa i kilaa ne hagataba i olaadeu lodo,

⁷ “Gu aha taane nei gu basa ai nei bee nei? Ia e hagangadi mee de Maadua! Goai e maua i de degi ange gi haisala, e dee go de Maadua donu huu?”

⁸ De masavaa laa donu huu gai Iesu gu iloo e ia alaadeu maanadu, gai ia ga hai ange gi gilaadeu, “Gu aha goodou gu maanadu ai naa mee naa i oodou lodo?

⁹ Dee hee de mee e hai ngaohie: go de hai ange gi taane balagelage nei, ‘Gu maatala oo haisala,’ aabe go de hai ange, ‘Hidi age sabaia doo moenga ga seesee ai ga hano’?

¹⁰ Aagai mee nei ne hai gi iloo ai e goodou, bolo Tama a Tangada e dahi ono sauaa i henua i lalo e degi ange ai gi haisala.” Gai ia ga hai ange gi taane balagelage laa,

¹¹ “Au e hai adu gi de goe, hidi age, sabaia doo moenga hannoo gi doo hale!”

¹² Gai taane laa ga hidi age i de masavaa laa donu huu ga saabai dono moenga, ga sao ga hano i madamada o dangada alodahi. Gai dangada alodahi gu llele mouli, ga tuhi de Maadua ga hagataba, “Gidaadeu tigi gidee donu dahi hegau bee nei!”

De hagahi a Iesu Levi

¹³ Iesu ne hano hogi gi gaogao de vai, gai dangada soa laa alodahi ga loomai gi ono daha, gai ia ga agoago ange gilaadeu.

¹⁴ Gai ga hano gee huu Iesu i kilaa, gai ia gu gidee Levi tama daane a Alphaeus, ia e noho i de mommee hagabudu taagisese. Gai ia ga hai ange gi de ia, “Daudali mai i de au!” Gai ia ga hidi age ga daudali ange i Iesu.

¹⁵ De masavaa o Iesu ne hakaogao ai ga gaimee i de hale o Levi, gai ne soa hogi dangada hagabudu taagisese, ma de gau haisala ne hakaogao ga gaimee madali gilaadeu ma ana dangada agoago; go hiidinga ne soa dangada ne daudali ange i de ia.

¹⁶ Gai ga gidee huu e de gau sisi ma denga Pharisee, bolo Iesu e gaimee madali dangada e hagabudulia taagisese ma de gau haisala, gai gilaadeu ga ssili ange gi ana dangada agoago, “Gu aha gu gaimee ai naa doodou dangada agoago madali dangada e hagabudulia taagisese aama de gau baubau?”

¹⁷ Gai ga langona huu e Iesu muna laa, gai ia ga hai ange gi gilaadeu, “Gilaadeu e mmahi e dee ssala tangada hai magi, gai go gilaadeu e mmagi e saalaa ia. Au tee humai e hagahi gilaadeu e heohi, aagai go gilaadeu e haisala.”

De ssili dagodo o de hagahiigai

¹⁸ Dangada agoago a John ma denga Pharisee ne hagahiikai i de masavaa laa. Gai hanu dangada ne loomai ga ssili ange gi Iesu, “Gu aha dangada agoago a John ma dangada agoago a denga Pharisee e hagahiikai ai laa, aagai au dangada agoago e deai?”

¹⁹ Iesu ne ssili ange gi gilaadeu, “E maua e dangada ne saalaa i taonga hagahai bodu i de hagahiikai, i de masavaa oona e noho ai i olaadeu daha? E dee maua donu, gilaadeu e dee hagahiikai i de masavaa oona e noho ai madali gilaadeu.

²⁰ Aagai e tae mai naa donu laangi e kave gee ai taane gu dai hagahai bodu i olaadeu daha, gai gilaadeu ga hagahiikai ai naa i laangi laa.

²¹ E deai donu dangada e bonodia ange de malo duai i dahi hono hoou. Noo gu hai de mee nei, gai de hono hoou laa e ssae naa de malo duai laa, ga hai gu kii ange de laumalie de mommee e masae.

²² E deai hogi dangada e hagasahulia ange uvaini hoou gi lodo gili manu duai. Noo e hai de mee nei, gai denga uvaini hoou laa ga oha denga gili manu laa, gai gu moumou denga uvaini, gai denga gili manu laa gu maoha. Aagai denga uvaini hoou e hhao ange gi lodo gili manu hoou.”

Iesu go de Ia Aamua o Sabbath

²³ Dahi laangi huu o Sabbath, gai Iesu ma ana dangada agoago ne seesee laa lodo hanu veelengaa grain, gai gilaadeu ga hagihagi denga grain i kilaa.

²⁴ Gai denga Pharisee ga ssili ange gi de ia, “Gu aha au dangada agoago gu hai ai naa mee e dee alaange de hai i de laangi o Sabbath?”

²⁵ Iesu ne hai ange gi gilaadeu, “Goodou tigi daulia ange naa donu mee a David ne hai laa, i de masavaa olaadeu ma denga daane madali ia ne hiikai ai?

²⁶ Ia ne ulu i de hale o de Maadua i de masavaa o tangada haimeedabu maolunga go Abiathar, ga gai ai denga pelaoaa dabu, gai ni mee e dee alaange i de gai a dangada, go de gau haimeedabu donu huu, gai ia ne gaavange hogi hanu ga gai ono daane.”

²⁷ Gai ia ga hai ange gi gilaadeu, “Sabbath ne hai i hiidinga o tangada, gai tee hai tangada i hiidinga o Sabbath.

²⁸ Deenei ai, Tama a Tangada go de Ia Aamua donu o Sabbath.”