Mark 16 - De Beebaa Dabu

De mouli age

¹ Gai ga ui huu de laangi o Sabbath, gai Mary Magdalene ma Mary tinana o James, aama Salome ga hagao hanu mee hagamanongi e hulo ai e hagasulu de angaanga o Iesu.

² Gai boo taiao huu o tahi laangi o de uvigi, i dua de sula age o de laa, gai gilaadeu ne hulo gi taanunga.

³ Gai gilaadeu ne hagadau ssili, ga hagataba, “Goai e hagadigelia gee de hadu i ma te haitoga o taanunga?”

⁴ Gai de masavaa olaadeu ne tae ai gi kilaa, gai gilaadeu gu gidee bolo de hadu laumalie laa gu lava i de hagadige gee.

⁵ Gai gilaadeu ga hulo ga ulu gi lo te daanunga laa, gai gilaadeu gu gidee dahi dama daane e gahu i de malo tea lloa, ma e noho i de baasi madau; gai gilaadeu gu maatagu.

⁶ Gai ia ga hai ange gi gilaadeu, “Goodou aude maatagu. Goodou e ssala Iesu taane Nazareth, ne daudau laa i de laagau lui. Ia gu mouli age! Ia e dee maleva i kinei. Goodou kalo ange diiloo de mommee oona ne hagadagodo ai.

⁷ Gai goodou hulo daalaa ange gi ana dangada agoago aama Peter: ‘Ia gu hano i oodou mada i mua gi Galilee. Go kilaa oodou e gidee ai ia, bei dana hai gu tala adu ai gi goodou.’ ”

⁸ Gai denga haahine laa ga ssao ga hulo gee mai i taanunga laa, go hiidinga gilaadeu gu maatagu ma de llele olaadeu mouli. Gai gilaadeu tee tala ange mee laa gi dahi dangada, i hiidinga delaadeu maatagu.

De hakide ange o Iesu gi Mary Magdalene

⁹ [Dua de mouli age o Iesu i taiao o tahi laangi o de uvigi, gai ia ne hakide ange gi Mary Magdalene i mua. Deenei de hine aana ne hai laa ga hulo gee e hidu hagasaalunga baubau mai i ono daha.

¹⁰ Gai Mary ne hano ga tala ange gi gilaadeu nogo hulo saele madali Iesu, i de masavaa e hinangalosaa ai olaadeu lodo ma de tangi.

¹¹ Aagai de masavaa alaadeu ne langona ai bolo Iesu gu mouli age, gai Mary gu gidee ia, gai gilaadeu tee hagadonusia ana muna.

De hakide ange o Iesu gi e dogolua dangada agoago

¹² Dua mee laa gai Iesu ne hakide ange hogi gi e dogolua i olaadeu magavaa, i de masavaa olaau e seesee ai i tua de aduhale, gai ia ne hagadagodo gee ia.

¹³ Gai gilaau ne aahe ga hulo ga tala ange gi olaau soa ange laa, aagai gilaadeu tee hagadonusia hogi alaau muna.

De hagasauaa a Iesu tinoangahulu ma dogodahi

¹⁴ Muli mai gai Iesu ne hakide ange gi tinoangahulu ma dogodahi, i de masavaa olaadeu e gaimee ai. Gai ia ga hagasee gilaadeu i delaadeu dee hagadonusia, ma de makaga olaadeu lodo, go hiidinga gilaadeu tee hagadonusia muna a dangada ne gidee ia i dua dono mouli age.

¹⁵ Gai ia ga hai ange gi gilaadeu, “Goodou hulo gi henua i lalo alodahi ga agoago ange ai de longo danuaa gi dangada alodahi.

¹⁶ Gai be goai e hagadonusia ga babudaisi gai ia e hagamouli. Aagai be goai e dee hagadonusia, gai ia e hagaduasala donu.

¹⁷ Gai denga hagailonga nei e hai i daho olaadeu e hagadonusia: gilaadeu e hai naa ga hulo denga hagasaalunga baubau i dogu ingoo; gilaadeu e pasa naa i muna henua gee;

¹⁸ gilaadeu e booboo naa denga labodo hagammau, ma de unu mee hagammau, gai mee nei e dee maua donu i de hagammae gilaadeu; gilaadeu e dugu ange naa olaadeu lima gi honga o denga magi, gai gilaadeu e ieiangi donu.”

De gaavage o Iesu gi de langi

¹⁹ Gai ga lava huu muna a Tagi Maolunga go Iesu, ange gi ana dangada agoago, gai ia gu gaavage gi de langi, ga noho i de baasi madau o de Maadua.

²⁰ Gai ana dangada agoago ne hulo ga agoago i mommee alodahi. Aagai Tagi Maolunga ne hai hegau madali gilaadeu aama de hagadonu alaadeu muna i denga hagailonga alaadeu e hai.]