Mark 14 - De Beebaa Dabu

De hagasaele ange de hai e daa ai Iesu gi magau

¹ De masavaa ne lua ai laangi i mua o Taonga Hagasili ma Taonga o Pelaoaa Dee Hagahua. Gai de gau haimeedabu maolunga ma de gau sisi ne ssala delaadeu hai e poo hagammuni ai Iesu e daa gi magau.

² Aagai gilaadeu ne hagataba, “Gidaadeu e dee poo ia i de masavaa o taonga kana hellumi dangada.”

De hagasulu o Iesu i de lolo i Bethany

³ De masavaa o Iesu e hakaogao ai ma e gaimee i teebele i de hale o Simon i Bethany, go taane nogo magi lebelaa i mua, gai dahi hahine ne humai ma dahi manu alabaster iai vai hagamanongi e hai i nard gai e hagao ngadaa mmao, gai ia ga hhoa de manu laa ga llingi ange gi honga dono biho.

⁴ Aagai hanu dangada i kilaa ne llili ga hagataba, “Gu aha gu moumou ai nei de vai nei?

⁵ De vai nei ne maua donu i de hagao gi daha gi maua ai e dolulau denarius e gaavange gi de gau hagaau aloha!” Gai gilaadeu ga hagasee ia.

⁶ Aagai Iesu ga hai ange gi gilaadeu, “Goodou aude pasa ange gi de ia. Gu aha goodou gu hakoso ai naa ia? Ia gu hai mai dahi hegau mahamaha gi de au.

⁷ De gau hagaau aloha e nnoho i oodou daha i masavaa alodahi, goodou e maua i de bale ange gilaadeu noo goodou e llodo. Aagai au gu dai hano gee naa donu i oodou daha.

⁸ De hine nei gu hai dana mee e mau i de hai; ia gu hagamanongi dogu angaanga i mua dogu magau ga danu.

⁹ Ni muna abodonu aagu e hai adu nei gi goodou, be go hee naa huu e tala ai de longo danuaa i henua i lalo, aagai e tala ai naa hogi hegau a de hine nei e hagamaanadu ai ia.”

De gaavange a Judas Iesu

¹⁰ Aagai Judas Iscariot, go dahi i magavaa o tinoangahulu ma dogolua, ne hano gi daho de gau haimeedabu maolunga e gaavange Iesu gi gilaadeu.

¹¹ Gai ga langona huu e gilaadeu, gai gilaadeu gu malangilangi, ga hagatoo donu ange bolo gilaadeu e hagao ange ia i hanu sseene. Gai ia ne ssala dana hai e gaavange ai Iesu.

Taonga Hagasili madali denga dangada agoago

¹² Gai tahi laangi huu o Taonga o Pelaoaa Dee Hagahua, go de laangi alaadeu e daa ai ssiibi o Taonga Hagasili, gai ana dangada agoago ga ssili ange gi de ia, “Go hee aau e lodo gimaadeu gi hagadabena ina ai Taonga Hagasili e gaimee ai goe?”

¹³ Gai ia ga hai gi hulo e dogolua ana dangada agoago, ga hai ange gi gilaau, “Gooluu hulo gi lo te aduhale, gai gooluu e gidee naa dahi daane e hagauda dahi ssaa hhao vai, gai gooluu ga daudali ange i de ia.

¹⁴ Gai go hee naa huu oona e hano ga ulu aagena, gai gooluu ga hai ange gi tangada aamua o de hale laa, ‘Tangada Agoago e ssili adu: I hee de aabi oogu e gaimee ai i Taonga Hagasili madali agu dangada agoago?’

¹⁵ Gai ia e hagaago adu naa dahi aabi laumalie i teege i lunga gu lava i de hagadabena, gai gooluu ga hagadabena ai Taonga Hagasili i kilaa.”

¹⁶ Gai luu dangada agoago laa ne hulo gi de aduhale ga gidee e gilaau bolo mee alodahi ne bei de hai a Iesu gu tala ange ai laa gi gilaau. Gai gilaau ga hagadabena Taonga Hagasili.

¹⁷ Gai ga ahiahi huu de mee, gai ia gu humai madali tinoangahulu ma dogolua.

¹⁸ Gai de masavaa olaadeu ne hakaogao ai i teebele e gaimee, gai Iesu ga hai ange gi gilaadeu, “Ni muna abodonu aagu e hai adu nei gi goodou, dahi goodou e gaavange naa donu au, go dahi dangada donu e gaimee nei madali au.”

¹⁹ Gai ana dangada agoago gu dee paba olaadeu lodo, gai dahi ma dahi ga ssili ange gi de ia, “Go au oou e basa ai naa?”

²⁰ Iesu ne hai ange gi gilaadeu, “Go dahi donu i magavaa o tinoangahulu ma dogolua, go tangada e hagasulu ina ange laa de pelaoaa gi lo te gumedi madali au.

²¹ Tama a Tangada e hano naa donu bei de hai gu sisi ai ono dagodo, aagai e vakaa naa tangada e gaavange ia! E danuaa ange noo ia tee haanau.”

Taonga Dabu a Tagi Maolunga

²² De masavaa olaadeu e gaimee ai, gai Iesu ga poo mai dahi duudangaa pelaoaa ga dalodalo ga dohidohi ga gaavange gi gilaadeu, ga hai ange, “Gaavee, go dogu angaanga deenei.”

²³ Gai ia ne poo mai hogi de ubu ga dalodalo, gai ia ga gaavange gi gilaadeu; gai gilaadeu alodahi ga unu ai.

²⁴ Gai ia ne hai ange gi gilaadeu, “Go ogu dodo aanei, go dodo o de hagatoo donu hagaheloongoi, ne hagassali laa i hiidinga o dangada soa.

²⁵ Ni muna abodonu aagu e hai adu nei gi goodou, au e dee unu ange naa donu hua o de grapevine, ga dae ai gi dagu unu uvaini hoou i de nohoanga hodooligi o de Maadua.”

²⁶ Gai ga lava huu i delaadeu hua dahi daahili, gai gilaadeu ga ssao ga hulo gi de Mounga o denga Olive.

De tala a Iesu de hagadee iloo a Peter ia

²⁷ Gai Iesu ne hai ange gi ana dangada agoago, “Goodou alodahi e odi naa donu i de tili au, go hiidinga gu sisi e hai ange, ‘Au e daa naa tangada hagaloosi, gai denga ssiibi e mavaevae saele naa.’

²⁸ Aagai dua naa huu dogu mouli age, gai au ga hano i oodou mada i mua gi Galilee.”

²⁹ Peter ne hai ange gi de ia, “Ga odi naa donu gilaadeu alodahi i de tili goe, gai au e dee tili donu goe!”

³⁰ Iesu ne hai ange gi de ia, “Ni muna abodonu aagu e hai adu nei gi de goe, aaboo nei, i mua de goo o de gaagoo daane i e lua hanonga, gai koe e hagadee iloo naa donu au i e dolu hanonga.”

³¹ Aagai Peter ne hagammahi huu ga hai ange, “Ga magau naa donu au madali goe, gai au e dee hagadee iloo donu goe!” Gai denga dangada agoago ange laa ne hai ange hogi muna nei gi de ia.

De dalodalo o Iesu i Gethsemane

³² Gai gilaadeu ne hulo gi de mommee e hagaingoo ange laa go Gethsemane. Gai Iesu ga hai ange gi ana dangada agoago, “Goodou nnoho i kinei, gai au ga hano e dalodalo.”

³³ Gai ia ne kave Peter, ma James, aama John madali ia, gai ia gu kona mmao de daemaha ma tee baba ono lodo.

³⁴ Gai ia ga hai ange gi gilaadeu, “Au gu daemaha mmao ogu lodo, gai gu baa ange donu gi de magau; goodou nnoho i kinei dagidiiloo ai.”

³⁵ Gai ia ne damaa hanadu ange, ga hagabaguu gi honga de gelegele ga dalodalo be e maua, gai gi haia ga ui gee de aoaa laa i de ia.

³⁶ Gai ia ne hai ange, “Abba, dogu Damana! Koe e maua i de hai mee alodahi. Gaavee gee de ubu nei mai i ogu daha; gai e dee go ogu lodo e hai, aagai go oo lodo.”

³⁷ Gai ia ga ahe mai gu gidee bolo ana dangada agoago e sseni, gai ia ga hai ange gi Peter, “Simon, koe goi seni naa huu? Koe e dee maua naa donu i de dagitilo i e dahi aoaa?

³⁸ Goodou dagitilo ma de dalodalo, gi dee tuu ange ai goodou gi de hagatale. De hagasaalunga e lodo mmao, aagai de angaanga gu baageaa.”

³⁹ Gai ia ne ahe ange hogi ga dalodalo, ga tala ana muna mau.

⁴⁰ Ia ne ahe mai ange hogi gu gidee gilaadeu gu sseni, go hiidinga gilaadeu gu daia ange donu de sseni. Gai gilaadeu gu dee iloo be aahee alaadeu muna e pasa ange ai gi de ia.

⁴¹ Ia ne ahe mai ange hogi i tolu hanonga ga hai ange gi gilaadeu, “Goodou goi sseni naa huu ma e hagammabu? Gu lava; gu dae mai de aoaa! Tilo, Tama a Tangada e gaavange naa gi de gau haisala.

⁴² Goodou hiihidi age, gidaadeu ga hulo. Tilo, gu dae mai tangada e gaavange au!”

De boogia o Iesu

⁴³ De masavaa aana e tala ai ana muna, gai Judas, dahi daane i magavaa o tinoangahulu ma dogolua gu humai, madali hanu dangada soa ma alaadeu gadilaasa ma laagau hebagi; gilaadeu ne loomai i daho de gau haimeedabu maolunga ma de gau sisi aama denga dagi.

⁴⁴ Gai taane ne gaavange laa Iesu ne gaavange dahi hagailonga gi denga daane madali ia, ga hai ange, “Tangada naa huu aagu e oso, gai go ia oodou e poo ga kave ga hagaloosi ange.”

⁴⁵ De masavaa o Judas ne dae mai ai, gai ia ne humai ga hagabaa ange gi de ia, ga hai ange, “Tangada Agoago!” gai ia ga oso Iesu.

⁴⁶ Gai denga daane laa ga poo Iesu ga kave.

⁴⁷ Aagai dahi daane e duu laa madali Iesu ga unusi dana gadilaasa, ga tuu ai gu doo talinga o tangada hai hegau o tangada haimeedabu maolunga.

⁴⁸ Gai Iesu ga hai ange gi gilaadeu, “Goodou ne loomai naa ma denga gadilaasa ma laagau hebagi e poo au, bei dagodo o dahi dangada gaiaa ma de daa dangada?

⁴⁹ Laangi alodahi gai au ne noho madali goodou i lo te temple ma e agoago ai, gai goodou tee poo au. Aagai mee nei e hai e hagassula ai muna a de Beebaa Dabu.”

⁵⁰ Gai ana dangada agoago alodahi ga tili ia gai ga saavini ga hulo gee.

⁵¹ Gai dahi dama daane ne daudali ange i Iesu, gai e deai donu ono malo, e saabini donu huu i dahi malo linen. Gai denga daane laa ne hagatale de poo ia;

⁵² gai ia ga tili ange ono malo gi gilaadeu gai ga gilisau ga savini ai ga hano.

Iesu i mada i mua o de hagabuulinga hagasaele

⁵³ Gai denga daane laa ne kave ia gi de hale o tangada haimeedabu; gai de gau haimeedabu maolunga ma denga dagi, aama de gau sisi gu hagabuni i kilaa.

⁵⁴ Gai Peter ne daudali adu i dua o Iesu i de mommee mmao, ga hano ga ulu gi lo te buibui o de hale o tangada haimeedabu maolunga, ga noho madali de gau hagaloosi ga hagamahanahana ai i de ahi.

⁵⁵ Gai de gau haimeedabu maolunga ma de hagabuulinga hagasaele alodahi, ne ssala hanu mee e hagabaubau ai Iesu e daa gi magau; aagai gilaadeu tee gidee dahi mee daudahi.

⁵⁶ Gai ne soa dangada ne loomai ga hagabaubau Iesu i hanu muna hhadu, gai alaadeu muna e dee dagodo daudahi.

⁵⁷ Gai hanu dangada ne tuu age ga hagabaubau Iesu, ga hagataba,

⁵⁸ “Gimaadeu ne langona taane nei e hagadaba, ‘Au e oha naa de temple a dangada ne hagaduu laa, gai au ga hagaduu age naa dahi temple i e dolu donu huu laangi, gai e dee go dangada e hagaduulia,’ ”

⁵⁹ Gai tee maua hogi gi dagodo daudahi alaadeu muna.

⁶⁰ Gai tangada haimeedabu maolunga ne duu age ga ssili ange gi Iesu, “E hanu au muna e basa ange ai gi alaadeu muna e hagabaubau ai nei goe?”

⁶¹ Aagai Iesu tee muu ange aabe ne basa ange. Gai tangada haimeedabu maolunga ne ssili ange hogi, “Go koe de Klisdo, Tama Daane a de Ia Maolunga laa?”

⁶² Iesu ne hai ange, “Go au donu. Gai goodou e gidee naa Tama a Tangada e noho i de baasi madau o de Ia Mmahi Mmao laa, ma de humai i honga giliiga o de langi.”

⁶³ Gai tangada haimeedabu maolunga ga ssae ono malo, ga hagadaba, “Ni dangada tala hagadonu aha ange odaadeu e llodo ai?

⁶⁴ Goodou gu langona dana hagangadi mee de Maadua. Dee hee doodou mee gu hagamodu?” Gai gilaadeu alodahi ne hagamodu e daa ia gi magau.

⁶⁵ Gai hanu gilaadeu ne daamada de savasavale ange gi Iesu, ga nnoa luoono mada i de malo ga dugidugi ia i olaadeu lima, gai gilaadeu ga hai ange gi de ia, “Daalaa mai be goai ne duugia laa goe!” Gai de gau hagaloosi ne kave hogi ia ga hagailiili.

De hagadee iloo a Peter Iesu

⁶⁶ De masavaa o Peter e noho ai i lalo i lo te buibui o de hale laa, gai dahi damaa hine hai hegau o tangada haimeedabu maolunga ne humai,

⁶⁷ gai ia gu gidee Peter e hagamahanahana i gaogao de ahi, gai ia ga haaina ia, ga hai ange, “Koe go dahi daane donu e daudali ange laa i Iesu taane Nazareth.”

⁶⁸ Aagai Peter ga hagadee iloo ana muna, ga hai ange, “Au e dee iloo donu aabe e donu adu gi aau mee e tala mai naa.” Gai ia ga sao ga hano gi honga de velanda. Gai de gaagoo daane gu goo.

⁶⁹ Gai tamaa hine hai hegau laa ne gidee ange hogi Peter i kilaa, gai ia ga hai ange gi dangada e tuu saele, “Taane nei se daane donu madali gilaadeu!”

⁷⁰ Aagai Peter ga hagadee iloo hogi ana muna. Muli mai gai dangada e tuu laa i kilaa ne hai ange gi Peter, “Ni muna abodonu, koe se daane donu madali gilaadeu, i hiidinga koe se dangada Galilee hogi.”

⁷¹ Aagai Peter ga daamada de hagamalaia donu huu ia ma de hagatoo donu, ga hagadaba, “Au e dee iloo donu taane oodou e pasa mai ai naa!”

⁷² De masavaa laa donu huu gai gu goo de gaagoo daane i de lua hanonga. Gai Peter gu manadua e ia muna a Iesu ne hai ange gi de ia, “I mua de goo o de gaagoo daane i de lua hanonga, gai koe e hagadee iloo naa donu au i e dolu hanonga.” Gai ia gu dangi mmao.