Mark 13 - De Beebaa Dabu

De tala a Iesu de oha o de temple

¹ Gai ga sao huu Iesu e hano gee i de temple, gai dahi ana dangada agoago ga hai ange gi de ia, “Tangada Agoago, galo ange diiloo dagodo de mahamaha o denga hadu aama denga hale nei!”

² Iesu ne hai ange gi de ia, “Denga hale mahamaha aau e gide nei, e odi naa donu i de oha iho ga deai se hadu e dagodo i honga dahi hadu.”

Denga hai ngadaa ma vaivai haia

³ De masavaa o Iesu ne hano ai ga noho i honga de Mounga o denga Olive, i de baasi ange gi de temple, gai Peter, ma James, ma John aama Andrew ne ssili ange gi de ia, i de masavaa e deai ai dangada,

⁴ “Daalaa mai, dee hee de masavaa e hai ai mee nei? Gai dee hee de hagailonga e hagaago mai ai bolo gu dai hai mee nei alodahi?”

⁵ Iesu ne hai ange gi gilaadeu, “Goodou dagidiiloo gi deai se dangada e hagasengalia goodou.

⁶ E soa naa dangada e loomai i dogu ingoo ga hai adu, ‘Go au go ia!’, gai gilaadeu ga hagasenga ai naa dangada soa.

⁷ Gai de masavaa naa huu oodou e langona ai de hai denga hebagi ma longo o denga hebagi, gai goodou gi dee manavasaa oodou lodo. Mee nei e hai naa donu, gai tigi dae mai de hagaodi.

⁸ Denga huaahenua e hagadau hebagi naa, gai denga nohoanga hodooligi e hagadau hai baasi naa. Denga mommee o henua i lalo e ngalungalue naa, ma de hai ai denga onge. Gai mee nei e bei naa donu taamada de hai hagalangona o de hine gu dai haanau.

⁹ Aagai goodou kana ange dagidiiloo iho goodou. Dangada e gaavange naa goodou gi de hagabuulinga hagasaele, gai goodou e gaavee naa ga hagailiilia i lodo synagogue. Goodou e hai naa gi tuu i mada i mua o denga goobenaa aama denga hodooligi i ogu hiidinga, gai goodou ga tala hagadonu ange ai au gi gilaadeu.

¹⁰ Aagai de longo danuaa e agoago ange naa gi denga huaahenua alodahi i mua de hai mee nei.

¹¹ Gai de masavaa naa huu alaadeu e poo ai goodou e hagamodu oodou muna, gai goodou aude manavasaa i oodou muna e pasa ange ai. Goodou daalaa donu huu muna e gaavadu gi oodou lodo i de masavaa laa, go hiidinga e dee go goodou e pasa ange, aagai go de Hagasaalunga Dabu.

¹² Dahi daane e gaavange naa dono daina e daa gi magau, gai tamana e gaavange naa dana dama. Denga dama e hai baasi ange naa gi olaadeu maadua, ga daa gilaadeu gu maakau.

¹³ Gai dangada alodahi e kino naa i goodou i hiidinga o dogu ingoo. Aagai be goai e lodo mmahi ga dae ai gi de hagaodi e hagamouli donu.

De mee hakino gee laumalie

¹⁴ “Aagai de masavaa naa huu oodou e gidee ai de mee hakino gee e haia laa ga ngadi dagodo de mommee, gu duu i de mommee e dee alaange de duu ai,” (gai tangada e daulia muna nei gi donu ange,) “gai dangada i Judea gi saavini gi hulo gi denga mounga.

¹⁵ Tangada i tua de hale gi dee iho, aabe gi ulu i dono hale gi gaavee ai dahi mee daudahi.

¹⁶ Tangada i lo te veelenga gi dee ahe mai hogi gi gaavee dono malo laa daha.

¹⁷ Gai e vakaa naa denga haahine hai tama, ma gilaadeu e haau alaadeu gaagaa i laangi laa!

¹⁸ Gai goodou dalodalo gi dee hai mee nei i de masavaa hagamagalili.

¹⁹ Go hiidinga e kona naa de hagaduasala o dangada i laangi laa, gai tigi ai ange se masavaa bee nei, mai i taamada de hai a de Maadua henua i lalo ga dae mai ai gi iainei, gai e deai ange naa hogi se masavaa bee nei i muli mai.

²⁰ Gai noo Tagi Maolunga e dee hai gi podo denga laangi laa, gai e deai naa donu se dangada e ola. Aagai ia e hai naa gi podo laangi laa, i hiidinga o dangada gu lava laa i dana hili.

²¹ Gai noo dahi dangada e hai adu gi goodou, ‘Tilo, deenei de Klisdo!’, be e hai adu, ‘Tilo, deelaa ia!’, gai goodou aude hagadonusia ana muna.

²² Go hiidinga denga klisdo ma pelaabisi hadu muna, e loomai naa ga hai denga hagailonga ma mee hagalele mouli ga daahanga ai dangada, gai noo e maua, gai gilaadeu e daahanga naa hogi gilaadeu gu lava i de hili.

²³ Aagai goodou dagidiiloo iho goodou; au gu tala adu mee nei alodahi i mua de hai.

De ahe mai o Tama a Tangada

²⁴ “Aagai dua naa huu denga laangi hai ngadaa laa, gai de laa gu hagagohu, gai de maasina gu deai sono maalama;

²⁵ denga heduu i lo te langi e too iho naa, gai denga mee mmahi i lo te langi e hagangaalue naa.

²⁶ De masavaa laa gai dangada e gidee naa Tama a Tangada e humai i honga denga giliiga i de mmahi ma de mahamaha.

²⁷ Gai ia e hai naa ana dangada de langi gi hulo, gi hagabuni ina mai ana dangada gu hili i denga madangi e haa, aama mai i luu bido o henua i lalo ma luu bido o de langi.

Agoago mai i dagodo o de fig

²⁸ “Goodou tonu ange gi dagodo o de fig: de masavaa naa huu e balabala ai ono laa gai gu matili age ono lau manu, gai goodou gu iloo bolo gu baa mai de masavaa mahanahana.

²⁹ Gai e bei ai hogi, de masavaa naa huu oodou e gidee ai de hai mee nei, gai goodou gu iloo bolo ia gu dai humai donu, gai gu duu donu i gaogao haitoga o de buibui.

³⁰ Ni muna abodonu aagu e hai adu nei gi goodou, de atangada nei e dee lilo naa donu gai gu hai mee nei alodahi.

³¹ De langi ma henua i lalo e llilo naa donu, aagai agu muna e dee llilo donu.

E deai donu e iloo de laangi aabe go de aoaa laa

³² “Gai e deai donu se dangada e iloo de laangi aabe go de aoaa laa, e deai hogi dangada de langi e iloo, Tama e dee iloo hogi e ia, aagai go Tamana donu huu.

³³ Goodou gi mada ala, ma de dagitilo; go hiidinga goodou e dee iloo donu de laangi e dae mai ai de masavaa laa.

³⁴ Gai e bei tangada gu baba ange laa e sailago: ia ne hano gee i dono hale, gai ga dugu ange gi ono dangada hai hegau gi diiloo ange. Gai ia ga gaavange gi dahi ma dahi ana hegau e hai, ga tala ange gi tangada hagaloosi ia gi noho gi dagitilo.

³⁵ Deenei ai, goodou dagitilo, go hiidinga goodou e dee iloo de masavaa o tangada aamua o de hale e humai ai — go de ahiahi, be go lo te boo, be go de koo o denga gaagoo, aabe go boo taiao —

³⁶ kana daa hagalele dono humai gai ia gu gidee goodou e sseni.

³⁷ Agu muna gu tala adu gi goodou e tala ange hogi gi dangada alodahi: goodou dagitilo!”