Mark 12 - De Beebaa Dabu

De gau e diiloo ange de veelengaa grape

¹ Gai Iesu ne agoago ange dangada i denga mee hagasengasenga, ga hai ange, “E dahi daane ne doo dahi veelengaa grape ga buibui luu baasi, ga geli dahi mommee e kumi ai grape, aama de hagaduu dahi hale dagitilo i kilaa. Gai ia ga dugu ange gi hanu dangada hai veelenga, gai ia ga hano gi dahi henua gee.

² Gai de masavaa huu o de hagihagi, gai ia ga hai dahi ono dangada hai hegau gi hano gi daho dangada e diiloo ange de veelenga, gi gaavee ai dana diba mai i denga huamanu o de veelenga laa.

³ Gai de gau laa ga poo taane hai hegau laa ga hagailiili ga hai ia gi ahe, teai donu mee ne gaavange gi de ia.

⁴ Gai taane laa ne hai ange hogi dahi ono dangada hai hegau gi hano gi daho de gau laa, gai gilaadeu ga hagalagohia dono biho ma de vaivai hai ia.

⁵ Taane laa ne kave ange hogi dahi dangada gi hano gi olaadeu daha, gai gilaadeu ga daa ia gu magau. E soa ange dangada a taane laa ne hai gi hulo gi olaadeu daha, gai de gau hai hegau laa ne hagailiili hanu, gai ne daa hanu ga maakau.

⁶ Gai e dahi ange donu huu dangada aana e maua i de hai gi hano: go tama daane oona e aloha ai laa. Muli mai gai ia ne hai ia gi hano gi daho de gau laa, ga hagadaba, ‘Gilaadeu e hagadubu naa donu dagu dama daane.’

⁷ Aagai de gau hai hegau laa ga hagataba i olaadeu magavaa, ‘Deenei tama e bolo ange aagena de mommee nei. Loomai, gidaadeu ga daa ia gi magau, gai gidaadeu ga kave dono boolonga!’

⁸ Gai gilaadeu ga poo ia ga daa gu magau ga tili ia gi tua de veelenga laa.

⁹ Gai ni aha ai naa a tangada niiana de veelengaa grape e hai? Ia e humai naa ga daa gi maakau de gau hai hegau laa, gai ga gaavange de veelenga laa gi hanu dangada gee.

¹⁰ E aha, goodou tigi daulia ange naa donu muna nei i de Beebaa Dabu? ‘De hadu a de gau hagatuu hale ne hagangadi mee gu hai go de hadu i tege;

¹¹ de mee nei go Tagi Maolunga ne haia, gai e hagalele mouli i taadeu tilo!’ ”

¹² Gai dagi o de gau Ssuu ne hagatale de poo Iesu, go hiidinga gilaadeu gu iloo bolo ia ne tala de mee hagasengasenga laa e hai baasi ange ai gi gilaadeu; gai gilaadeu e maatagu i dangada, gai gilaadeu ga hulo gee mai i ono daha.

De hagao ange taagisese gi Caesar

¹³ Gai gilaadeu ne hai hanu Pharisee ma hanu dangada e daudali ange laa i Herod, gi hulo gi hagalaangona muna a Iesu e hagabaubau ai ia.

¹⁴ Gilaadeu ne loomai ga hai ange gi de ia, “Tangada Agoago, gimaadeu e iloo bolo koe e hai hegau i de mee abodonu, gai koe e dee dagi i daho dangada. Koe e dee vae dangada, aagai e agoago lodo o de Maadua i de mee abodonu. E alaange de hagao ange taagisese gi Caesar aabe deai? E hagao gimaadeu taagisese be deai?”

¹⁵ Aagai Iesu gu iloo e ia alaadeu hegau e daahanga ai dangada, gai ia ga hai ange gi gilaadeu, “Gu aha gu llodo ai naa goodou e hagatale au? Gaamai dahi denarius e tilo au.”

¹⁶ Gai gilaadeu ga gaavange dahi gi de ia. Gai Iesu ga ssili ange gi gilaadeu, “Niioai de ada ma de hagailonga iainei?” Gilaadeu ne hai ange gi de ia, “Niio Caesar.”

¹⁷ Gai Iesu ga hai ange gi gilaadeu, “Gaavange gi Caesar mee a Caesar, gai gaavange gi de Maadua mee a de Maadua.” Gai gilaadeu gu llele mouli i ana muna.

De ssili dagodo o de mouli age ange

¹⁸ Denga Sadducee ne loomai hogi gi ono daha; aanei gilaadeu e hagataba laa bolo e deai donu se mouli age ange. Gai gilaadeu ga ssili ange gi de ia,

¹⁹ “Tangada Agoago, Moses ne sisi ga hai mai bolo noo taina daane o tangada gu magau, gai teai selaau dama ma dono bodu, gai dono daina daane gi hai bodu ange gi de hine laa, e hai ai dahi dama maa dono daina daane.

²⁰ E dogohidu hai daina daane; tama madua ne hai bodu ange gi dahi hahine, gai ia ne magau teai donu sana dama daane.

²¹ Gai tama e mua ange ne hai bodu ange hogi gi de hine laa, gai ia ne magau hogi teai sana dama; gai e bei ai hogi dagodo o tama i ono dua.

²² Denga hai daina e dogohidu laa alodahi ne odi i de maakau, gai teai donu alaadeu dama ne hagadili. Muli mai gai de hine laa gu magau hogi.

²³ Niioai ai naa de bodu go de hine laa i de masavaa o de mouli age ange? Go hiidinga gilaadeu alodahi ne hai bodu ange gi de ia.”

²⁴ Iesu ne hai ange gi gilaadeu, “Goodou e dee heohi donu, go hiidinga goodou e dee iloo muna a de Beebaa Dabu aabe go mahi o de Maadua.

²⁵ De masavaa naa huu olaadeu e mouli age ai, gai gilaadeu e dee hai bodu aabe gaavange gi hai bodu; gilaadeu gu bei dagodo o denga dangada de langi i de langi.

²⁶ Gai dagodo o de mouli age ange o de gau maakau: e aha, goodou tigi dau ange naa donu de beebaa a Moses, i de mommee e sisi ai laa dagodo o de manu somo e ula ai laa de ahi? De Maadua ne hai ange gi Moses, ‘Go au de Maadua o Abraham, ma de Maadua o Isaac, aama de Maadua o Jacob.’

²⁷ Ia e dee se Maadua niio de gau maakau, aagai se Maadua niiolaadeu e mouli. Goodou e dee heohi donu!”

De hainga hagamogomogo hugadoo

²⁸ Dahi dangada sisi ne humai ga langona e ia delaadeu hagadaumee, gai ia ne langona hogi bolo ne heohi de hai a Iesu ne basa ange ai gi gilaadeu, gai ia ga ssili ange gi de ia, “Dee hee hugadoo de hainga hagamogomogo?”

²⁹ Iesu ne hai ange gi de ia, “Deenei de hainga hagamogomogo hugadoo, ‘Israel, goodou hagalaangona: Tagi Maolunga taadeu Maadua, go ia donu huu Tagi Maolunga.

³⁰ Gai koe gi aloha i Tagi Maolunga doo Maadua i oo lodo alodahi, ma doo hagasaalunga alodahi, ma au maanadu alodahi, aama oo mahi alodahi.’

³¹ Gai de lua hainga deenei: ‘Koe gi aloha i tangada e baa adu gi de goe bei doo aloha donu i de goe.’  Gai e deai ange donu se hainga e maolunga ange i luu hainga nei.”

³² Gai tangada sisi laa ne hai ange gi de ia, “Tangada Agoago, koe e heohi, i dau hagadaba bolo ia e dahi donu huu, e deai ange donu.

³³ Gai gi aaloha i de ia i oo lodo alodahi, ma au maanadu alodahi, aama oo mahi alodahi, gai gi aloha i tangada e baa adu gi de goe bei doo aloha donu i de goe, e hagamogomogo ange i denga sigidaumaha dudu ma sigidaumaha ange laa.”

³⁴ Gai ga gidee huu e Iesu bolo ne heohi dana hai ne basa ange ai, gai ia ga hai ange gi taane sisi laa, “Koe gu baa ange donu gi de nohoanga hodooligi o de Maadua.” Gai teai ange dangada ne loomai e siilia ange gi de ia dahi mee.

De ssili be niiai tama daane go de Klisdo

³⁵ De masavaa o Iesu e agoago ai i lo te buibui o de temple, gai ia ne ssili, “Gu aha gu hagataba ai laa de gau sisi bolo de Klisdo go tama daane a David?

³⁶ Gai David ne hagadaba hogi, i ssauaa o de Hagasaalunga Dabu, ‘Tagi Maolunga ne hai ange gi dogu Ia Aamua: Noho i dogu baasi madau ga dae ai gi dagu hai oo hagadaumee gi nnoho i oo lalo.’

³⁷ David ne hagahi ange ia go ‘de Ia Aamua’; gai dee hee dono hai se dama daane ai niiana?” Gai dangada soa ne malangilangi i de hagallongo ana muna.

De hagakana ange i dagodo o de gau sisi

³⁸ De masavaa o Iesu e agoago ai, gai ia ne hai ange, “Goodou diiloo dagodo o de gau sisi. Gilaadeu e llodo e kahu i malo lloa e hulo saele ai, ma de llodo gi hagaboo ange dangada gi gilaadeu i denga mommee hagao mee,

³⁹ ma de llodo i duulanga maolunga i lodo synagogue aama duulanga hagadubu i denga daonga.

⁴⁰ Gilaadeu e gaiaa mee a denga haahine gu maakau olaadeu bodu, ma de hai gi lloa alaadeu dalodalo gi gidee ai e dangada. De gau bee nei e kona naa donu delaadeu hagaduasala.”

Ssigidaumaha a de hine gu magau dono bodu

⁴¹ Iesu ne hano ga noho i de baasi gee o de ngavesi e hhao ange laa aagena sseene a dangada, ga tilo ai de hai a dangada e haoa ange ai alaadeu sseene gi lo te ngavesi laa. Gai ne soa dangada lava ne haoa ange sseene lagolago.

⁴² Aagai dahi hahine hagaau aloha gu magau dono bodu, ne humai ga hhao ange e lua dibaa sseene copper vaaligiligi; e bei se lua dibaa sseene mmea.

⁴³ Gai ia ga hagahi ana dangada agoago ga hai ange gi gilaadeu, “Ni muna abodonu aagu e hai adu nei gi goodou, de hine hagaau aloha laa ne lagolago ange ana mee ne hhao gi lo te ngavesi i de gau ange laa alodahi.

⁴⁴ Go hiidinga de gau ange laa alodahi ne hhao ange alaadeu mee mai i alaadeu mee lagolago; aagai de hine hagaau aloha laa ne hhao ange mee alodahi oona e mouli ai.”