Mark 11 - De Beebaa Dabu

De ulu o Iesu i Jerusalem

¹ De masavaa huu olaadeu ne dai paa ange ai gi Jerusalem, gai gilaadeu gu tae gi Bethphage ma Bethany i gaogao de Mounga o denga Olive, gai Iesu ne hai gi hulo e dogolua ana dangada agoago,

² ga hai ange gi gilaau: “Gooluu loadu gi de aduhale i ooluu mada i mua naa, gai de masavaa naa huu ooluu e ulu ai gi lo te aduhale, gai gooluu gu gidee e dahi donkey gauligi e nnoa i kilaa, gai tigi ai donu se dangada ne gage gi ono elunga. Gai gooluu ga tala ga dagi mai gi kinei.

³ Gai noo dahi dangada e ssili adu, ‘Gu aha gooluu gu hai ai naa de mee naa?’, gai gooluu ga hai ange gi de ia, ‘Tangada Aamua e lodo e hai hegau i de manu nei, gai ia e hagamoolau naa donu ga dugu gi humai de manu laa gi kinei.’ ”

⁴ Gai gilaau ne hulo ga gidee dahi donkey gauligi e nnoa ange gi dahi haitoga i gaogao de haiava; gai gilaau ga daamada de tala de manu laa.

⁵ Gai dangada e tuu laa i kilaa ga ssili ange gi gilaau, “Gu aha gooluu gu tala ai naa de manu naa?”

⁶ Gai gilaau ga tala ange muna a Iesu ne tala ange gi gilaau. Gai de gau laa ga dugu ange gilaau gi gaavee de manu laa.

⁷ Gai gilaau ga dagi mai de manu gauligi laa gi daho Iesu, gai gilaadeu ga hhola ange olaadeu malo gi honga de manu laa; gai Iesu ga gage ange ga noho i ono elunga.

⁸ Gai dangada soa ne doha ange olaadeu malo gi honga de haiava, gai hanu ne duuduu denga laa manu ga dugu ange gi honga de haiava.

⁹ Gai dangada e hulo i mada i mua ma gilaadeu e loadu i ono dua, ne hevaalogi ga hagataba, “Hosanna! E manuuia tangada e humai i de ingoo o Tagi Maolunga!

¹⁰ E manuuia de nohoanga hodooligi o taadeu damana go David gu dai humai laa! Hosanna i de mommee maolunga mmao!”

¹¹ Gai Iesu ne hano gi Jerusalem ga ulu i lo te buibui o de temple. Gai ia ga tilo mee alodahi i kilaa, gai go hiidinga gu ahiahi de mee, gai ia ga hano gi Bethany madali tinoangahulu ma dogolua.

De hagamalaia o de fig

¹² De laangi i ono dua, i de masavaa olaadeu ne loomai ai i Bethany, gai Iesu gu saalohia.

¹³ Gai ia gu gidee adu dahi fig gu hanu ono lau, gai ia ne hano e tilo be hanu ana hua e gide ai. Gai ga dae huu ia gi gaogao de manu laa, gai teai donu hua aana ne gide ai, ni lau manu donu huu, go hiidinga tigi dae de masavaa e hhua ai denga fig.

¹⁴ Gai ia ne basa ange gi de manu laa, ga hai ange, “E deai ange naa donu se dangada e gaina oo hua i muli mai.” Gai ana dangada agoago ne langona e gilaadeu dana tala muna laa.

De hagagilimalali o de temple

¹⁵ Gai ga tae huu gilaadeu gi Jerusalem, gai Iesu ga ulu gi lo te buibui o de temple ga alualu ai de gau hagao mee i kilaa, ga hagaabongi denga deebele o dangada e seenisi ai denga sseene, aama seaa o dangada e hagao ina gi daha denga manu kono.

¹⁶ Gai ia tee dugu ange dangada gi gaavee hanu goloa laa lo te buibui o de temple.

¹⁷ Gai ia ga agoago ange dangada, ga hai ange, “Gu sisi e hai ange, ‘Dogu hale e hagaingoo ange go de hale dalodalo o denga huaahenua alodahi.’ Aagai goodou gu hai gi se mommee niio de gau gaiaa.”

¹⁸ Gai ga langona huu e de gau haimeedabu maolunga ma de gau sisi muna laa, gai gilaadeu ga ssala delaadeu hai e daa ai Iesu gi magau; go hiidinga gilaadeu e maatagu i de ia, i hiidinga dangada soa gu llele mouli i ana agoago.

¹⁹ Gai de masavaa huu ne ahiahi ai de mee, gai Iesu ma ana dangada agoago ga ssao ga hulo gee mai i de aduhale.

Agoago i dagodo o de fig

²⁰ Gai de masavaa olaadeu ne loomai ai laa kilaa i taiao age, gai gilaadeu gu gidee bolo de fig laa gu mmae mai i denga aga ga hanage ai.

²¹ Gai Peter gu manadua e ia mee ne hai laa, gai ia ga hai ange gi Iesu, “Tangada agoago, galo ange diiloo! De fig aau ne hagamalaia laa gu made!”

²² Iesu ne hai ange gi gilaadeu, “Goodou kai ange gi de Maadua.

²³ Ni muna abodonu aagu e hai adu nei gi goodou, be goai e hai ange gi de mounga nei, ‘Ngalue gee mai i doo duulanga ma gi doo ange gi lo te lausedi,’ gai ia e dee lua lodo aagai e hagadonu bolo ana muna e hagassula naa donu, aagai e hai donu gi bei ana muna.

²⁴ Deenei ai, au e hai adu gi goodou, be se aha naa huu oodou e dangidangi ai i talodalo, ga hagadonu bolo e maua donu, aagai e gaavadu donu gi goodou.

²⁵ Gai de masavaa naa huu oodou e tuu ai ga dalodalo, gai goodou degi ange gi mee a dahi dangada gu haisala adu ai gi goodou, gai doodou Damana i de langi laa e degi adu naa hogi gi oodou haisala. [

²⁶ Gai noo goodou e dee degi ange gi haisala o dangada, gai doodou Damana i de langi laa e dee degi adu hogi gi oodou haisala.]”

De ssili a denga dagi dagodo ssauaa o Iesu

²⁷ Gai ga ahe huu gilaadeu gi Jerusalem, gai de gau haimeedabu maolunga ma de gau sisi aama denga dagi gu loomai gi daho Iesu i dono masavaa e seesee saele ai i lo te buibui o de temple,

²⁸ ga ssili ange gi de ia, “Niioai ssauaa aau e hai ai naa mee nei? Gai goai ne gaavadu gi de goe ssauaa e hai ai mee nei?”

²⁹ Iesu ne hai ange gi gilaadeu, “Au e ssili adu hogi gi goodou dahi mee; goodou pasa mai gi dagu muna ssili, gai au ga tala adu ai gi goodou be niioai ssauaa aagu e hai ai nei mee nei.

³⁰ Ssauaa o John e babudaisi ai laa, se mee mai i de langi aabe se mee mai i daho dangada?”

³¹ Gai gilaadeu ga pasa i olaadeu magavaa ga hagataba, “Noo gidaadeu e hai ange, ‘Se mee mai i de langi,’ gai ia e ssili mai naa, ‘Gai gu aha goodou gu dee hagadonusia ai laa ana muna?’

³² Aagai noo gidaadeu e hai ange, ‘Se mee mai i daho dangada’…” (Gai gilaadeu e maatagu i dangada, i hiidinga dangada alodahi e hagataba bolo a John se pelaabisi donu.)

³³ Deelaa ai, gilaadeu ne hai ange gi Iesu, “Gimaadeu e dee iloo.” Gai Iesu ga hai ange gi gilaadeu, “Au e dee tala adu hogi be go hee ne humai ai ssauaa aagu e hai ai nei mee nei.”