Mark 1 - De Beebaa Dabu

De agoago o John taane Babudaisi

¹ Deenei taamada de longo danuaa o Iesu Klisdo, Tama Daane a de Maadua.

² Gu sisi i de beebaa a de pelaabisi go Isaiah, e hai ange: “Tilo, au e hai gi hano dogu dangada hagailoo i oo mada i mua, gi hagadabena ina ai doo haiava.”

³ “De leo o dahi e oo i de vao ma e hagadaba, ‘Hagadabena ina de haiava o Tagi Maolunga; hagassoea ono haiava!’ ”

⁴ Gai a John ne humai ga babudaisi i de vao ma de agoago dagodo o de babudaisi, ma de dahuli o de lodo gi maatala ai denga haisala.

⁵ Gai dangada alodahi i de henua go Judea ma Jerusalem, ne hulo ga babudaisi i ono daha i ssaalingaa vai go Jordan, ma de tala olaadeu haisala.

⁶ Gai malo o John e hai i huluhulu o de gamelo, dono beele ni gili kaau, gai ia e gai itebuubuu ma hooni lodo henua.

⁷ Gai ia ne agoago, ga hai ange, “Dahi dangada e maolunga ange i de au e humai naa i ogu dua, gai au e dee bau ange gi de ino iho e tala mee e noonooa ai ono mee vae.

⁸ Au e babudaisi goodou i de vai, aagai ia e babudaisi naa goodou i de Hagasaalunga Dabu.”

De babudaisi o Iesu ma dono hagatale

⁹ Laangi laa gai Iesu ne humai i Nazareth i Galilee ga babudaisi i daho John i lo te saalingaa vai go Jordan.

¹⁰ Gai de masavaa huu o Iesu ne ea age ai i lo te vai, gai ia gu gidee de langi gu mahuge, gai de Hagasaalunga ⌊Dabu⌋ gu hano iho gi ono elunga bei hoolinga o de manu kono.

¹¹ Gai dahi leo gu basa mai i de langi ga hagadaba, “Go koe dagu Dama Daane hagamogomogo, au e malangilangi i de goe.”

¹² De masavaa laa donu huu gai de Hagasaalunga ⌊Dabu⌋ ga kave ia gi de vao.

¹³ Gai ia ne noho i de vao i e madahaa laangi, ga hagatale ai i daho Satan, ma de noho madali denga manu aada; gai denga dangada de langi ne loomai ga bale ange ia.

De daamada hegau a Iesu

¹⁴ Gai dua huu de boogia o John ga hhao gi lo te hale pono, gai Iesu ga ahe gi Galilee ga agoago ai de longo danuaa a de Maadua,

¹⁵ ga hai ange, “De nohoanga hodooligi o de Maadua gu baa mai donu. Goodou daahuli oodou lodo ma gi hagadonusia de longo danuaa!”

De hagahi a Iesu denga dangada agoago i taamada

¹⁶ Iesu ne hano ga seesee i gaogao de Vai o Galilee, gai ia gu gidee Simon ma dono daina daane go Andrew e maga delaau galauna i lo te vai, go hiidinga gilaau ni daane haangoda.

¹⁷ Gai Iesu ga hai ange gi gilaau, “Gooluu daudali mai i de au, gai au ga hai gooluu gi ni daane e haangoda ina dangada.”

¹⁸ De masavaa laa donu huu, gai gilaau ga dugu alaau galauna ga daudali ange i de ia.

¹⁹ Gai Iesu ne damaa hanadu ange, gai ia gu gidee hogi a James tama daane a Zebedee, ma dono daina go John, gilaau e nnoho i lo te boose ma e bonobono ange ai alaau galauna.

²⁰ Gai de masavaa laa donu huu gai ia ga hagahi gilaau, gai gilaau ga dugu delaau damana go Zebedee i lo te boose madali de gau hai hegau hagao, gai gilaau ga daudali ange i de ia.

De hai a Iesu gi hano gee dahi hagasaalunga baubau

²¹ Gai gilaadeu ne hulo ga nnoho i Capernaum. Gai ga dae mai huu de laangi o Sabbath, gai Iesu ga hano gi lo te synagogue ga agoago ange ai dangada.

²² Gai dangada gu llele mouli i ana agoago, go hiidinga ia e agoago bei tangada e dahi ono sauaa, ia e dee agoago bei de gau sisi.

²³ De masavaa laa donu huu gai dahi daane i lo te synagogue iai laa dahi hagasaalunga baubau ga oo ga hai ange,

²⁴ “Ni aha oou e lodo ai i omaadeu daha, Iesu tangada Nazareth? Koe e humai naa e daa gimaadeu gi maakau? Au e iloo be go koe goai: koe go de Ia Dabu a de Maadua!”

²⁵ Aagai Iesu ga hagasee ia, ga hai ange, “Aude basa, gai sao mai i ono daha!”

²⁶ Gai de hagasaalunga baubau laa ga hai gu lele age taane laa ma de oo i de leo laumalie, gai ia ga sao mai i daho taane laa.

²⁷ Gai dangada alodahi gu llele mouli, ga hagadau pasa i olaadeu magavaa, ga hagataba, “Se aha deenei? Ni agoago hoou? Ia ne basa ange gi denga hagasaalunga baubau i ssauaa, gai gilaadeu ne hagallongo ange gi de ia.”

²⁸ Gai ne moolau de dele ono longo i de ungaamee alodahi o Galilee.

De hagaieiangi a Iesu dangada soa

²⁹ Gai ia ne hagamoolau ga hano gee mai i synagogue, ga hano gi de hale o Simon ma Andrew, madali James ma John.

³⁰ Gai ssaulaba o Simon gu vvela dono angaanga ma e dagodo ai. Gai gilaadeu ga hagamoolau ga tala ange gi Iesu ono dagodo.

³¹ Gai ia ga hano ga poo dono lima ga hagahidi age ia, gai dono angaanga gu dee vvela. Gai de hine laa ga hidi age ga hai ange hanu gai e gaimee ai gilaadeu.

³² De ahiahi laa, gai dangada ne gaamai gi Iesu denga hagadaagangaa magi alodahi ma dangada iai denga hagasaalunga baubau.

³³ Gai dangada alodahi i de aduhale laa gu hagabuni mai gi luu baasi de haitoga o hale laa.

³⁴ Gai Iesu ga hagaieiangi denga magi alodahi ma de hai gi hulo denga hagasaalunga baubau. Aagai ia tee dugu ange denga hagasaalunga baubau gi pasa, go hiidinga gilaadeu e iloo be go ia goai.

Iesu e agoago i denga synagogue

³⁵ Gai Iesu ne oho age i taiao ga hano gi de mommee e deai dangada iai, ga dalodalo ai.

³⁶ Gai Simon ma dangada madali ia ne loomai ga ssala ia,

³⁷ gai ga gidee huu e gilaadeu ia, gai gilaadeu ga hai ange, “Dangada alodahi e ssala goe.”

³⁸ Gai ia ga hai ange gi gilaadeu, “Gidaadeu ga hulo gi denga aduhale e paa mai nei, gai au ga agoago ai hogi i kilaa; go hiidinga deenei donu de hiidinga oogu ne humai ai nei.”

³⁹ Gai Iesu ne hagadaga i Galilee alodahi, ga agoago i denga synagogue ma de hai gi hulo denga hagasaalunga baubau.

De hagaieiangi a Iesu dahi daane lebelaa

⁴⁰ Gai dahi daane lebelaa ne humai gi daho Iesu ga duuduli ga dangidangi ange, ga hai ange, “Noo koe e lodo, gai koe e maua donu i de hagagilimalali au.”

⁴¹ Gai Iesu gu aloha i de ia, gai ia ga haalo dono lima ga poo ange ia, ga hai ange, “Au e lodo, koe gu gilimalali.”

⁴² De masavaa laa donu huu gai lebelaa o taane laa gu ieiangi, gai ia gu gilimalali.

⁴³ Gai Iesu ne hagakana ange ia, ga hai ia gi hano,

⁴⁴ ma de hai ange gi de ia, “Aude daalaa ange mee nei gi dahi dangada daudahi, gai koe hannoo hagaagona ange goe gi tangada haimeedabu, ma de hai ssigidaumaha o tangada gu gilimalali, bei dagodo muna a Moses, e hagadonu ai ⌊doo ieiangi⌋ i olaadeu daha.”

⁴⁵ Aagai taane laa ne hano ga hagadele de longo laa. Gai Iesu gu dee maua i de hano gi denga aduhale e hagasula ange gi dangada soa, ia gu noho donu huu i mommee e deai dangada iai. Aagai dangada ga loomai gi ono daha i mommee alodahi.