Malachi 4 - De Beebaa Dabu

De laangi o Tagi Maolunga

¹ “Gai tilo, e dae mai naa de laangi o de ahi ula, bei de ahi i lo te mommee dao mee. Gai de gau hagamaolunga ma dangada alodahi e haia de baubau, e dudu naa i de ahi, bei denga lau manu mmasa, go Tagi o denga hagabuulinga hebagi e hagadaba, gai e deai naa donu se aga aabe se laa daudahi e doe.

² Aagai dagodo o oodou dangada e hagadubu ina laa dogu ingoo: de laa o de heohi e sobo age naa ma ono gavegave e hagaieiangi ina laa dangada. Gai goodou e ssao naa ga hulo i de malangilangi, bei denga kaau gauligi gu hagassao mai laa i lo te buibui.

³ Gai goodou e dagadagahi naa gi lalo de gau baubau. Gilaadeu e bei naa denga lehu i lalo oodou vae, i de laangi aagu e hai ai agu hegau, go Tagi o denga hagabuulinga hebagi e hagadaba.

⁴ Goodou manadua de hainga a dogu dangada hai hegau go Moses, ma muna gu hagasauaa aama agu hagamodu ne gaavange gi de ia i Horeb gi daalaa ange gi Israel alodahi.

⁵ Tilo, au e hai gi hanadu de pelaabisi go Elijah gi oodou daha, i mua de dae mai o de laangi maolunga, ma de hagamaatagu o Tagi Maolunga.

⁶ Gai ia e hagadanuaa naa magavaa o denga maadua ma alaadeu dama, ma magavaa o denga dama ma olaadeu maadua; kana hanadu au ga oha de henua ga hagamalaia.”