Luke 7 - De Beebaa Dabu

De ieiangi o tangada hai hegau o tagi o de lau

¹ Gai ga lava huu i de tala ange a Iesu ana muna alodahi gi dangada, gai ia ga hano gi Capernaum.

² Gai e dahi dangada hai hegau o tagi o de lau gu magi ma gu dai magau, gai se daane hagamogomogo i daho dono dangada aamua.

³ Aagai ga langona huu e tagi o de lau laa dagodo hegau a Iesu, gai ia ga hai gi hulo hanu dagi o de gau Ssuu, gi dangidangi ange gi Iesu, ia gi humai gi hagaieiangi ina dono dangada hai hegau.

⁴ De masavaa olaadeu ne loomai ai gi daho Iesu, gai gilaadeu ne dangidangi hagammahi ange ga hai ange, “Ia se daane e heohi dau bale ange,

⁵ go hiidinga ia e aloha i taadeu huaahenua, gai go ia ne hagaduulia demaadeu synagogue.”

⁶ Gai Iesu ga hano madali gilaadeu. Gai dono masavaa huu ne dai baa ange ai gi de hale o tagi o de lau laa, gai taane laa ga hai gi loomai hanu ono soa gi hai ange gi Iesu, “Tagi Maolunga, aude hagadee saohia ina goe, go hiidinga au e dee bau ange gi doo humai gi dogu hale.

⁷ Aanei hiidinga oogu tee hanadu ai nei gi oo daha. Aagai koe basa donu huu gi ieiangi ai dogu dangada hai hegau.

⁸ Go hiidinga au se dangada hogi e noho i lalo ssauaa o dahi, gai e soa daane hebagi i ogu lalo. Gai noo au e hai ange gi dahi, ‘Hannoo!’, gai ia ga hano; be au e hai ange gi dahi, ‘Humai!’, gai ia ga humai; aabe au e hai ange gi dogu dangada hai hegau, ‘Haia de mee nei!’, gai ia ga hai.”

⁹ De masavaa huu a Iesu ne langona ai muna nei, gai ia gu lele ono mouli i taane laa, gai ia ga huli dua ga hai ange gi dangada e daudali ange laa i de ia, “Au e hai adu gi goodou, au tigi gidee dahi gai laumalie bee nei i daho de gau Israel.”

¹⁰ Gai ga ahe huu dangada hai hegau o taane laa gi de hale o delaadeu dagi laa, gai gilaadeu gu gidee tangada hai hegau e magi laa gu ieiangi.

De hagamouli age o tama a de hine gu magau dono bodu

¹¹ De laangi i ono dua, gai Iesu ne hano gi de aduhale go Nain. Gai ana dangada agoago ma dangada soa ne hulo hogi madali ia.

¹² Gai ga dae huu Iesu gi de haitoga o de aduhale laa, gai ia gu gidee dangada soa e saabai dahi daane magau e kave e danu, gai se dama dagidahi nii dahi hahine gu magau dono bodu. Gai e soa hogi dangada mai i de aduhale ne loomai madali de hine laa.

¹³ Gai de masavaa huu a Tagi Maolunga ne gidee ai de hine laa, gai ia gu lodo aloha i de ia, gai ia ga hai ange gi de ia, “Aude dangi.”

¹⁴ Gai Iesu ga hano ga poo ange de ngavesi, gai dangada e sabaia ga tuu. Gai ia ga hai ange gi taane magau laa, “Tama daane, au e hai adu gi de goe, hidi age!”

¹⁵ Gai tama daane laa gu noho age ga basa. Gai Iesu ga gaavange ia gi dono dinana.

¹⁶ Aagai dangada alodahi i kilaa gu maatagu mmao, gai gilaadeu ga tuhi de Maadua ga hagataba, “Dahi pelaabisi maolunga gu humai gi odaadeu daha, gai de Maadua gu humai gi daho ono dangada!”

¹⁷ Gai gu dele longo o mee laa i Judea ma henua alodahi e paa ange gi kilaa.

Iesu ma John taane Babudaisi

¹⁸ Gai de masavaa huu a denga dangada agoago a John ne tala ange ai gi de ia mee laa alodahi, gai ia ga hagahi e dogolua ana dangada agoago,

¹⁹ ga hai gilaau gi hulo gi siilia ange gi Iesu, gi hai ange, “Go koe de ia gu tala laa bolo e humai, aabe gimaadeu e tali ange dahi dangada gee?”

²⁰ Luu dangada laa ne hulo ga hai ange gi Iesu, “John taane Babudaisi ne hai gimaau gi loomai gi siilia adu be go koe de ia e humai laa aabe gimaadeu e tali ange dahi dangada gee.”

²¹ De masavaa laa gai Iesu e hagaieiangi dangada soa ma de hai gi hulo gee hagasaalunga baubau, gai e soa hogi dangada dee kide gu kide.

²² Gai Iesu ga hai ange gi luu dangada agoago laa, “Gooluu hulo daalaa ange gi a John ooluu mee gu langona ma de gidee: de gau dee kide gu gidee, de gau balagelage gu seesee, de gau mmagi lebelaa gu gilimalali, de gau longoduli gu langona, de gau maakau gu mouli age, gai de longo danuaa gu tala ange gi de gau hagaau aloha.

²³ Gai e manuuia tangada e dee ahe dua i ogu hiidinga!”

²⁴ Gai ga hulo huu luu dangada agoago a John, gai Iesu ga tala ange gi dangada i dagodo o John, “Se aha oodou e hulo laa e tilo i de vao? Se madila e iliilihia saele i de madangi?

²⁵ Gai se aha donu oodou e hulo laa e tilo? Se dangada e gahu i malo danuaa? Tilo, dangada e kahu i malo danuaa e nnoho i lodo hale o denga hodooligi.

²⁶ Gai se aha ai oodou e hulo laa e tilo? Se pelaabisi? Uaa, au e hai adu gi goodou, ia e maolunga ange donu i de pelaabisi.

²⁷ Deenei taane gu sisi laa ono dagodo ma e hai ange, ‘Tilo, au e hai gi hano dogu dangada hagailoo i oo mada i mua, gi hagadabena ina de haiava i oo mada i mua.’

²⁸ Au e hai adu gi goodou, e deai ange donu se dangada ne haanau i daho denga haahine e maolunga ange i John. Aagai de ia e maolalo i de nohoanga hodooligi o de Maadua e maolunga ange i de ia.”

²⁹ Gai de masavaa a dangada ma de gau hagabudu taagisese ne langona ai muna nei, gai gilaadeu ga hagataba bolo de Maadua e heohi donu, go hiidinga gilaadeu gu lava i de babudaisi i de babudaisi a John.

³⁰ Aagai denga Pharisee aama de gau agoago o de hainga ne hagangadi mee de hagatau a de Maadua, gilaadeu tee babudaisi i daho John.

³¹ ⌊Gai Iesu ga hai ange gi gilaadeu,⌋ “Se aha aagu e hagadagodo ange aagena de atangada nei? Gai aahee olaadeu hagadagodo?

³² Gilaadeu e bei dagodo o denga gauligi e nnoho laa i de mommee hagao mee, ma de hagadau pasa i olaadeu magavaa, ‘Gimaadeu e hagadangidangi i denga flute, gai goodou e dee aanu! Gimaadeu e daahili i taahili o de magau, gai goodou e dee tangi!’

³³ Go hiidinga John taane Babudaisi ne humai, gai ia tee gai pelaoaa aabe ne unu uvaini, gai goodou ne hagataba, ‘De hagasaalunga baubau e noho i ono daha.’

³⁴ Aagai Tama a Tangada ne humai ga gaimee ma de unu, gai goodou ne hagataba, ‘Ia se dangada aagai ma de lodo e unu mee vii, gai se soa niio de gau hagabudu taagisese ma de gau baubau!’

³⁵ Gai de heiangi o de Maadua gu hagaago mai bolo e heohi i daho ana dama alodahi.”

Iesu i de hale o Simon, de Pharisee

³⁶ Dahi Pharisee ne ssala ange Iesu gi humai e gaimee i dono hale. Gai ia ne hano gi de hale o de Pharisee laa ga noho i teebele ga gaimee ai.

³⁷ Gai tilo, dahi hahine haisalasala i de aduhale laa, gu iloo e ia bolo Iesu gu noho ma e gaimee i de hale o de Pharisee laa. Gai ia ga gaamai dahi manu alabaster iai vai hagamanongi,

³⁸ gai ia ne humai ga duu i ono dua i gaogao luoono vae ga dangi ai, gai ia ga daamada de hhui luoono vae i ono loimada, ga hagammasa i ono ngaangaaulu, aama de osooso luoono vae ga hagamanongi i de vai laa.

³⁹ Gai de masavaa huu a de Pharisee laa ne gidee ai mee gu hai laa, gai ia ga maanadu i ono lodo ga hagadaba, “Noo se pelaabisi abodonu taane nei, gai ia e iloo donu dagodo o de hine e boogia ange nei ia. Ia se hine haisala!”

⁴⁰ Gai Iesu ga hai ange gi de Pharisee laa, “Simon, e hanu agu muna e lodo e tala adu gi de goe.” Simon ne hai ange, “Tangada Agoago, daalaa mai au muna.”

⁴¹ Iesu ne hai ange, “E dahi daane e dogolua dangada e muli ange gi de ia. Dahi e muli ange i e limalau denarius, gai dahi e madalima.

⁴² Gai gilaau tee maua i de hagao alaau muli, gai ia ga degi ange gi alaau muli. Gai goai naa i olaau magavaa e kii ange dono aloha i taane laa?”

⁴³ Simon ne hai ange, “Au e hagadaba bolo go taane e lagolago laa ana muli.” Iesu ne hai ange gi de ia, “E heohi donu au muna.”

⁴⁴ Gai Iesu ne huli ange gi de hine laa, gai ia ga hai ange gi Simon, “Galo ange diiloo de hine nei. Au ne humai gi doo hale, gai koe tee gaamai hanu vai e hhui ai luoogu vae, aagai de hine nei gu hhui luoogu vae i ono loimada ma de hagammasa i ono ngaangaaulu.

⁴⁵ Koe tee oso au, gai de hine nei tigi helui donu dana osooso luoogu vae mai i taamada dogu ulu i doo hale ga dae mai ai gi iainei.

⁴⁶ Koe tee hagasulu dogu biho i de lolo, aagai de hine nei gu hagasulu luoogu vae i de vai manongi.

⁴⁷ Deenei ai, au e hai adu gi de goe, dono aloha e laumalie, i hiidinga ono haisala e lagolago gai gu degi ange aagena. Aagai tangada ne damaa mee de mee ne degi ange ai gi de ia, e damaa mee hogi dono aloha.”

⁴⁸ Iesu ne hai ange gi de hine laa, “Au gu degi adu gi oo haisala!”

⁴⁹ Gai gilaadeu e nnoho laa ma e gaimee madali ia ne hagataba i olaadeu lodo, “Goai taane e maua nei e ia i de degi ange gi denga haisala?”

⁵⁰ Iesu ne hai ange gi de hine laa, “Doo gai gu hagaola goe, hannoo i de baba.”