Luke 3 - De Beebaa Dabu

De agoago o John taane Babudaisi

¹ Gai de madaangahulu ma lima huu ngadau o Tiberius Caesar ne hodooligi ai — go de masavaa o Pontius Pilate e goobenaa ai i Judea, Herod go de tetrarch o Galilee, dono daina daane go Philip go de tetrarch Ituraea ma Traconitis, gai Lysanias go de tetrarch o Abilene —

² de masavaa laa gai go Annas ma Caiaphas luu dangada haimeedabu maolunga, gai de Maadua ne hagaago ange ana muna gi a John, tama daane a Zechariah i de vao.

³ Gai ia ne hano gi mommee alodahi i luu baasi o Jordan ga agoago ai dagodo o de babudaisi, ma de dahuli o de lodo gi maatala ai denga haisala.

⁴ Bei de hai gu sisi ai i de beebaa iai muna a de pelaabisi go Isaiah: “De leo o dahi e oo i de vao ma e hagadaba, ‘Hagadabena ina de haiava o Tagi Maolunga; hagassoea ono haiava.

⁵ Haaoa age denga geelonga alodahi, gai uluhia denga mounga ma duuduu alodahi. Gai hagassoea denga mommee pigo, gai haia gi baba denga mommee haduhadua.

⁶ Gai dangada alodahi e gidee naa de hagaola a de Maadua!’ ”

⁷ Gai ia ne hai ange gi dangada soa ne loomai laa e babudaisi i ono daha, “Goodou dama a denga labodo hagammau! Goai ne hai adu goodou gi hagaola ina goodou mai i de bole gu dai humai laa?

⁸ Goodou hagaagona mai i oodou hegau bolo goodou gu daahuli abodonu oodou lodo. Gai goodou aude hagataba, ‘Gimaadeu ni dama nii Abraham.’ Au e hai adu gi goodou, de Maadua e maua i de hai hadu nei e hai ai dama a Abraham!

⁹ Iainei gai de hagadaguu gu dagodo donu i daahido o denga manu ssomo. Deenei ai, manu ssomo alodahi e deai hua danuaa iai e sele iho naa donu ga tili ange gi lo te ahi.”

¹⁰ Gai dangada soa ne ssili ange gi de ia, “Ni aha amaadeu e hai?”

¹¹ John ne hai ange gi gilaadeu, “Be goai e lua ono malo gahu gai ia gi gaavange dahi gi tangada e deai sono malo. Gai be goai e hanu ana gai, gai ia gi gaavange hogi hanu gi tangada e deai ana gai.”

¹² De gau e hagabudulia taagisese ne loomai hogi e babudaisi i daho John, gai gilaadeu ga ssili ange gi de ia, “Tangada Agoago, ni aha amaadeu e hai?”

¹³ John ne hai ange gi gilaadeu, “Goodou aude haia gi dubu ange sseene oodou e kave mai i daho dangada, i mee gu hagamodu adu gi goodou.”

¹⁴ Denga daane hebagi ne ssili ange hogi gi de ia, “Gai gimaadeu, ni aha amaadeu e hai?” Ia ne hai ange gi gilaadeu, “Goodou e dee hai gi de mahi sseene a dangada, aabe gi hagabuuia ange ssala gi gilaadeu i de muna hadu; gai goodou gi malangilangi i oodou hagaoanga.”

¹⁵ De masavaa laa gai dangada alodahi gu tali, ma de ssili i olaadeu lodo dagodo o John, be ia go de Klisdo.

¹⁶ Gai a John ne hai ange gi gilaadeu alodahi, “Au e babudaisi goodou i de vai, gai e dahi naa dangada e humai i ogu dua; ia e maolunga ange i de au, gai au e dee bau ange i de tala mee e noonooa ai ono mee vae. Ia e babudaisi naa goodou i de Hagasaalunga Dabu ma de ahi.

¹⁷ Ia e poo i dono lima dana laagau nonu grain, gai ia ga hagamalaelae ai dana mommee hili huamanu, gai ga hagabudu denga grain i lo tana mommee doange grain, aagai ia ga dudu denga gili i de ahi e dee maua laa i de diinei.”

¹⁸ E lagolago muna a John ne hagammahi ange ai lodo o dangada aama de agoago ange gilaadeu i de longo danuaa.

¹⁹ Aagai a John ne hagasee Herod, de tetrarch i hiidinga ia gu hai bodu ange gi Herodias, de bodu o dono daina daane, aama mee baubau alodahi a Herod gu hai,

²⁰ gai Herod ne hagapuni ange hogi de mee nei gi mee alodahi ange laa: ia ne hhao a John gi lo te hale pono.

De babudaisi o Iesu

²¹ Gai de masavaa huu ne odi ai dangada i de babudaisi, gai Iesu gu babudaisi hogi, gai de masavaa oona e dalodalo ai gai gu hhuge de langi,

²² gai de Hagasaalunga Dabu gu hano iho gi ono elunga e hagadulagi ange gi de manu kono. Gai gu basa iho hogi de leo i de langi ga hai ange, “Go koe dagu Dama Daane hagamogomogo; au e malangilangi i de goe.”

Denga dubuna madagidagi o Iesu

²³ Gai Iesu gu dai matolu ono ngadau i de masavaa aana ne daamada ai dana duuhanga hegau. Gai dangada e maanadu bolo ia se dama daane nii Joseph, Joseph go tama daane a Heli,

²⁴ Heli go tama daane a Matthat, Matthat go tama daane a Levi, Levi go tama daane a Melki, Melki go tama daane a Jannai, Jannai go tama daane a Joseph,

²⁵ Joseph go tama daane a Mattathias, Mattathias go tama daane a Amos, Amos go tama daane a Nahum, Nahum go tama daane a Esli, Esli go tama daane a Naggai,

²⁶ Naggai go tama daane a Maath, Maath go tama daane a Mattathias, Mattathias go tama daane a Semein, Semein go tama daane a Josek, Josek go tama daane a Joda,

²⁷ Joda go tama daane a Joanan, Joanan go tama daane a Rhesa, Rhesa go tama daane a Zerubbabel, Zerubbabel go tama daane a Shealtiel, Shealtiel go tama daane a Neri,

²⁸ Neri go tama daane a Melki, Melki go tama daane a Addi, Addi go tama daane a Cosam, Cosam go tama daane a Elmadam, Elmadam go tama daane a Er,

²⁹ Er go tama daane a Joshua, Joshua go tama daane a Eliezer, Eliezer go tama daane a Jorim, Jorim go tama daane a Matthat, Matthat go tama daane a Levi,

³⁰ Levi go tama daane a Simeon, Simeon go tama daane a Judah, Judah go tama daane a Joseph, Joseph go tama daane a Jonam, Jonam go tama daane a Eliakim,

³¹ Eliakim go tama daane a Melea, Melea go tama daane a Menna, Menna go tama daane a Mattatha, Mattatha go tama daane a Nathan, Nathan go tama daane a David,

³² David go tama daane a Jesse, Jesse go tama daane a Obed, Obed go tama daane a Boaz, Boaz go tama daane a Salmon, Salmon go tama daane a Nahshon,

³³ Nahshon go tama daane a Amminadab, Amminadab go tama daane a Admin, Admin go tama daane a Arni, Arni go tama daane a Hezron, Hezron go tama daane a Perez, Perez go tama daane a Judah,

³⁴ Judah go tama daane a Jacob, Jacob go tama daane a Isaac, Isaac go tama daane a Abraham, Abraham go tama daane a Terah, Terah go tama daane a Nahor,

³⁵ Nahor go tama daane a Serug, Serug go tama daane a Reu, Reu go tama daane a Peleg, Peleg go tama daane a Eber, Eber go tama daane a Shelah,

³⁶ Shelah go tama daane a Cainan, Cainan go tama daane a Arphaxad, Arphaxad go tama daane a Shem, Shem go tama daane a Noah, Noah go tama daane a Lamek,

³⁷ Lamek go tama daane a Methuselah, Methuselah go tama daane a Enoch, Enoch go tama daane a Jared, Jared go tama daane a Mahalalel, Mahalalel go tama daane a Kenan,

³⁸ Kenan go tama daane a Enos, Enos go tama daane a Seth, Seth go tama daane a Adam, gai Adam go tama daane a de Maadua.