Luke 23 - De Beebaa Dabu

Iesu i mada i mua o Pilate

¹ Gai de hagabuulingaa dangada laa alodahi ga hulo ga dagi ia ga kave gi Pilate.

² Gai gilaadeu ga hagabaubau ia ga hai ange, “Gimaadeu gu gidee bolo taane nei e hagabasa dangada i demaadeu huaahenua ma e hai gilaadeu gi dee hagao ina ange taagisese gi Caesar. Ia e hagadaba hogi bolo go ia de Klisdo, gai se hodooligi.”

³ Aagai Pilate ga ssili ange gi Iesu, “Go koe de Hodooligi o de gau Ssuu?” Iesu ne hai ange gi de ia, “Deenaa aau e hagadaba ai naa.”

⁴ Gai Pilate ga hai ange gi de gau haimeedabu maolunga ma dangada soa, “Au e dee gidee dahi mee daudahi e hagabuu ange ai ssala gi taane nei.”

⁵ Aagai gilaadeu ga usuusu ange ia, ga hai ange, “Ia e hai gi hagahellumi dangada i Judea alodahi i ana agoago. Ia ne daamada de hai mee nei i Galilee, gai ia gu humai hogi gi kinei.”

Iesu i mada i mua o Herod

⁶ Gai ga langona huu e Pilate muna laa, gai ia ga ssili be taane laa se dangada Galilee.

⁷ Gai de masavaa huu aana ne iloo ai bolo Iesu se dangada mai i de vaaenga o Herod e dagi ai laa, gai ia ga kave Iesu gi Herod, go hiidinga Herod gu noho hogi i Jerusalem i de masavaa laa.

⁸ Aagai Herod gu malangilangi i dana gidee Iesu, go hiidinga ia gu daulooloa dana lodo e tilo ia, i hiidinga ia gu langona ono longo. Gai ia ne lodo hogi e tilo dahi sauaa a Iesu e hai laa.

⁹ Herod ne lagolago ana muna ne ssili ange gi Iesu, aagai Iesu tee basa ange donu gi dahi ana muna.

¹⁰ Gai de gau haimeedabu maolunga ma de gau sisi e tuu i kilaa ma e hevaalogi ma e hagabaubau Iesu.

¹¹ Gai Herod ma ono daane hebagi ne hagangadi mee Iesu ma de hagammae manava ia. Gai gilaadeu ga hakahu ia i hanu malo danuaa ga hagaahe ia gi daho Pilate.

¹² De laangi laa gai Pilate ma Herod gu danuaa olaau magavaa; i mua gai gilaau e baubau.

De hagamodu muna o Iesu e daa gi magau

¹³ Gai Pilate ne hagabuni de gau haimeedabu maolunga, ma dagi o dangada, aama dangada,

¹⁴ ga hai ange gi gilaadeu, “Goodou ne gaamai taane nei gi de au bolo se daane e haia dangada gi hai baasi mai. Gai au gu ssili ono dagodo i oodou mada i mua, gai tilo, au tee gidee dahi mee daudahi o taane nei e haisala ai i oodou mee e hagabaubau ai ia.

¹⁵ Herod teai hogi ana mee ne gidee, gai ia ga hagaahe mai ia gi gidaadeu. Tilo, tigi ai donu se mee daudahi a taane nei ne hai e heohi ai dono daa gi magau.

¹⁶ Deenei ai, au ga hagaduasala nei ia i mua dagu dugu ia gi hano.” [

¹⁷ Gai deenei tahulinga i de masavaa laa, Pilate e hagasao mai dahi dangada i lo te hale pono i laangi o Taonga Hagasili.]

¹⁸ Aagai dangada alodahi ga hevaalogi ga hai ange, “Daia gi magau taane naa! Gai hagasao ina mai Barabbas!”

¹⁹ (Barabbas se daane ne hhao gi lo te hale pono i hiidinga ia ne hai ga hellumi dangada i de aduhale, aama de daa ga maakau hanu dangada.)

²⁰ Gai Pilate ne basa ange hogi gi gilaadeu, i dono lodo e hagaola Iesu.

²¹ Aagai gilaadeu tee helui donu de hevaalogi ga hai ange, “Daudau ina ia i de laagau lui! Daudau ina ia i de laagau lui!”

²² Aagai Pilate ga ssili ange gi gilaadeu i tolu hanonga, “Gai se baubau aha donu a taane nei gu hai? Au tee gidee dahi mee daudahi e heohi ai dono daa gi magau! Deenei ai, au ga hagaduasala nei ia i mua dagu dugu ia gi hano.”

²³ Aagai gilaadeu ga kii ange donu de usuusu ange ia ma de hevaalogi ga hai ange bolo gi daudau ina ia i de laagau lui, gai gu sula de mee olaadeu e hevaalogi ai laa.

²⁴ Gai ia ga hagamodu bolo gi haia gi bei olaadeu lodo,

²⁵ gai gi hagasao ina mai delaadeu dangada e llodo ai, go taane gu hhao laa gi lo te hale pono, i hiidinga dana hai gi hellumi aama dana daa dangada ga maakau, deenei taane alaadeu ne dangidangi ange ai; gai Pilate ga gaavange Iesu gi gilaadeu bei delaadeu hai e llodo ai.

De daudau o Iesu i de laagau lui

²⁶ De masavaa alaadeu e dagi ai Iesu e kave, gai gilaadeu ne poo Simon taane Cyrene, ia se daane ne humai i dahi mommee i tua de aduhale, ga hai ia gi sabaia de laagau lui o Iesu gi daudali ange ai i de ia.

²⁷ Gai dahi hagabuulingaa dangada soa ne daudali ange i de ia, madali denga haahine e hinangalosaa laa ma de tangi i ono hiidinga.

²⁸ Aagai Iesu ne huli dua ga hai ange gi gilaadeu, “Denga damaa hine o Jerusalem, goodou aude tangi i ogu hiidinga, aagai goodou tangi i oodou hiidinga ma oodou dama.

²⁹ Tilo, e tae mai naa laangi a dangada e hagataba ai, ‘E manuuia denga haahine teai alaadeu dama, ma gilaadeu tee haanau, ma gaanuunu tee hakaa unuunu laa hanu dama!’

³⁰ Gai dangada e hai ange naa gi denga mounga, ‘Baakuu mai haolia gimaadeu,’ gai e hai ange naa gi denga duuduu, ‘Haolia gimaadeu!’

³¹ Gai noo dangada e hai mee nei i de masavaa e lau kohu ai denga manu ssomo, gai ni aha naa alaadeu e hai i de masavaa e mmae ai?”

³² Gai ne dogolua hogi daane ne oohaa de hainga, ne kave madali ia ga daa gu maakau.

³³ Gai ga tae huu gilaadeu gi de mommee e hagaingoo ange laa go de Ivi o de Biho, gai gilaadeu ga daudau ia ma luu daane ne oohaa de hainga i kilaa, dahi i dono baasi madau, gai dahi i dono baasi masui.

³⁴ Gai Iesu ne hagadaba, “Tamana, degi ange gi gilaadeu; go hiidinga gilaadeu e dee iloo donu alaadeu mee e hai.”  Gai gilaadeu ne dada ga duha ai ono malo.

³⁵ Aagai dangada ne tuu ga haaina ia, gai dagi o de gau Ssuu ga doo mee i de ia, ga hagataba, “Ia ne hagaola dangada ange laa; ia gi hagaola ina ia, noo go ia de Klisdo a de Maadua, de ia aana gu hili!”

³⁶ Denga daane hebagi ne hagammae manava hogi ia, ga gaavange hanu uvaini mmala ia gi unumia,

³⁷ gai gilaadeu ga hai ange, “Noo go koe de hodooligi o de gau Ssuu, gai koe hagaola ina goe!”

³⁸ Gai ne dahi hagailoo i ulu dono biho, e hai ange, “Deenei de Hodooligi o de gau Ssuu.”

³⁹ Gai dahi luu daane ne oohaa de hainga e daudau laa madali ia ne hagammae manava ia, ga hai ange, “E aha, e dee go koe de Klisdo? Hagaola ina goe aama gimaau!”

⁴⁰ Aagai taane ange laa ga hagasee dono soa, ga hai ange, “Koe e dee madagu naa donu i de Maadua, i hiidinga koe ne hagamodu oo muna e hagaduasala bei dagodo o taane nei?

⁴¹ Gidaau e heohi donu taau kave de hagaduasala nei, e hagao ai adaau hegau baubau. Gai taane nei teai donu sana mee dee heohi daudahi ne hai.”

⁴² Gai ia ga hai ange, “Iesu, manadua mai au i doo masavaa e dae ai gi doo nohoanga hodooligi!”

⁴³ Iesu ne hai ange gi de ia, “Ni muna abodonu aagu e hai adu nei gi de goe, ailaa nei gai koe madali au i Paradise.”

De magau o Iesu

⁴⁴ De masavaa laa gu daa tuele, gai gu hagagohu honga de henua alodahi ga dae ai gi tolu i de ahiahi,

⁴⁵ gai gu danu de laa. Gai de malo buibui i lo te temple gu mahanga lua.

⁴⁶ Gai Iesu ne oo i de leo mmahi, ga hagadaba, “Tamana! Au e dugu adu dogu hagasaalunga gi lodo luoo lima.” Gai ga lava huu i dana tala muna laa gai ia gu hai ana manava hagaodi.

⁴⁷ De masavaa huu a tagi o de lau ne gidee ai de mee laa, gai ia ga tuhi de Maadua, ga hagadaba, “Ni muna abodonu, taane nei se dangada heohi.”

⁴⁸ Aagai dangada soa ne hagabuni mai laa e tilo mee gu hai laa, ga hagailiili olaadeu hadahada ga ahe gi olaadeu hale.

⁴⁹ Aagai dangada alodahi e iloo laa Iesu, aama denga haahine ne daudali mai i de ia i Galilee e tuu, i de mommee mmao ma e tilo mai ai mee gu hai laa.

De danu o Iesu

⁵⁰ Gai e dahi daane dono ingoo go Joseph, ia se daane e dau i de hagabuulinga hagasaele, gai se daane danuaa ma de heohi.

⁵¹ Ia tee buni ange gi hagatau ma hegau a de hagabuulinga hagasaele. Ia se daane Arimathea, se aduhale niio de gau Ssuu, gai se daane e daalia de dae mai o de nohoanga hodooligi o de Maadua.

⁵² Ia ne hano gi daho Pilate ga dangidangi ange i de angaanga o Iesu.

⁵³ Aagai ia ga dugu iho de angaanga o Iesu ga saabini i malo linen ga hagadagodo i dahi daanunga gu hoda gi lo te baba, gai tigi ai dangada ne danu ai.

⁵⁴ De laangi laa go de laangi hagadabena, gai gu dai daamada donu Sabbath.

⁵⁵ Gai denga haahine ne daudali mai laa i Iesu i Galilee ne hulo madali Joseph ga gidee ai e gilaadeu, de mommee iai taanunga ne hagadagodo ai de angaanga o Iesu.

⁵⁶ Aagai gilaadeu ne aahe ga hagadabena mee hagamanongi ma vai manongi. Gai gilaadeu ne hagammabu i de laangi o Sabbath bei dagodo muna o de hainga.