Luke 22 - De Beebaa Dabu

De hagasaele ange de hai e daa ai Iesu gi magau

¹ De masavaa laa gai gu hai Taonga o Pelaoaa Dee Hagahua, go taonga e hagaingoo ange laa go Taonga Hagasili.

² Aagai de gau haimeedabu maolunga ma de gau sisi ne hagasaele delaadeu hai e daa ai Iesu gi magau; gai gilaadeu e maatagu i dangada.

De gaavange a Judas Iesu

³ Aagai Satan ne ulu gi lodo o Judas dahi ono ingoo laa go Iscariot, go dahi i magavaa o tinoangahulu ma dogolua.

⁴ Gai ia ne hano ga hagaheloongoi ange gi de gau haimeedabu maolunga ma de gau hagaloosi o de hale daumaha, i dana hai e gaavange ai Iesu gi gilaadeu.

⁵ Aagai gilaadeu gu malangilangi ma de buni bolo e hagao ange ia i hanu sseene.

⁶ Gai Judas ne buni ange gi delaadeu hagatau, gai ia gu ssala dana hai e gaavange ai ia, i de masavaa e deai ai dangada.

Taonga Hagasili madali denga dangada agoago

⁷ Gai ga dae mai huu de laangi o Taonga o Pelaoaa Dee Hagahua, go de laangi e daa ai ssiibi o Taonga Hagasili.

⁸ Aagai Iesu ga hai gi hulo Peter ma John, ga hai ange, “Gooluu hulo hagadabena ina Taonga Hagasili e gaimee ai gidaadeu.”

⁹ Gilaau ne ssili ange gi de ia, “Go hee aau e lodo gimaau gi hagadabena ina ai?”

¹⁰ Ia ne hai ange gi gilaau, “Tilo, de masavaa naa huu ooluu e ulu ai gi lo te aduhale, gai gooluu e gidee naa dahi daane e hagauda dahi ssaa hhao vai, gai gooluu daudali ange i de ia ga hulo gi de hale oona e ulu ai laa.

¹¹ Gai gooluu ga hai ange gi tangada aamua o de hale, ‘Tangada Agoago e ssili adu: I hee de aabi aagu e gaimee ai i Taonga Hagasili madali agu dangada agoago?’

¹² Gai ia e hagaago adu naa dahi aabi i teege i lunga gu iai goloa; gai gooluu ga hagadabena Taonga Hagasili i kilaa.”

¹³ Aagai gilaau ga hulo gu gidee bolo mee alodahi e bei donu muna a Iesu gu tala ange gi gilaau, gai gilaau ga hagadabena Taonga Hagasili.

Taonga Dabu a Tagi Maolunga

¹⁴ Gai ga dae mai huu de aoaa, gai Iesu ga hakaogao i teebele ga gaimee madali ana gau tala.

¹⁵ Aagai ia ga hai ange gi gilaadeu, “Au e lodo mmao e gaimee i Taonga Hagasili madali goodou i mua dogu hagaduasala!

¹⁶ Gai au e hai adu gi goodou, au e dee ahe ange naa donu e gaimee i Taonga Hagasili nei, ga dae ai gi de sula danuaa mai dono hagadoonunga i de nohoanga hodooligi o de Maadua.”

¹⁷ Aagai Iesu ga poo mai de ubu ga dalodalo, gai ia ga hai ange gi ana dangada agoago, “Goodou gaavee de mee nei unu ai alodahi.

¹⁸ Au e hai adu gi goodou, au e dee ahe ange naa donu e unu hua o de grapevine ga dae mai ai de nohoanga hodooligi o de Maadua.”

¹⁹ Iesu ne poo mai hogi dahi duudangaa pelaoaa ga dalodalo, ga dohidohi ga gaavange gi gilaadeu gai ia ga hai ange, “Deenei dogu angaanga ne gaavange laa i oodou hiidinga. Goodou haia de mee nei se hagamaanadu niiogu.”

²⁰ Ia ne poo mai hogi de ubu i dua delaadeu gaimee, gai ia ga hai ange gi gilaadeu, “De ubu nei go de hagatoo donu hagaheloongoi hoou, ne hai laa i ogu dodo ne hagassali laa i oodou hiidinga.

²¹ Tilo! De lima o tangada gu dai gaavange au e dagodo i honga teebele madali dogu lima!

²² Tama a Tangada e hano donu bei de hai gu hagamodu ai, gai e vakaa naa donu tangada e gaavange ia!”

²³ Gai ana dangada agoago ga daamada de hagadau ssili, be goai de gilaadeu gu dai haia de hegau laa.

Goai e maolunga?

²⁴ Gai gilaadeu ne hagadaumee i olaadeu magavaa, be goai de gilaadeu e maolunga.

²⁵ Iesu ne hai ange gi gilaadeu, “Hodooligi o denga Gentile e hai gi de mahi dangada i olaadeu sauaa, gai gilaadeu e hagahai hegau ina olaadeu sauaa e hagabinga bolo ni dangada e balea ange dangada.

²⁶ Gai goodou gi dee ago ange i gilaadeu; gai tangada e maolunga i oodou magavaa gi bei dagodo o de ia e maolalo i goodou, aagai tangada se dagi gi bei tagodo o tangada hai hegau.

²⁷ Goai tangada maolunga, go tangada e hakaogao laa i teebele aabe go de ia e gaamai gai gi teebele? Gidaadeu e iloo bolo go de ia e hakaogao laa ma e gaimee. Aagai au e noho i oodou magavaa bei dagodo o tangada hai hegau.

²⁸ Goodou ni dangada ne tuu madali au i ogu hagatale;

²⁹ gai au e gaavadu naa gi goodou dahi nohoanga hodooligi, bei de hai a dogu Damana gu gaamai ai laa hogi gi de au dahi nohoanga hodooligi,

³⁰ gai goodou ga gaimee ai ma de unu i teebele i dogu nohoanga hodooligi, ma de nnoho i honga denga nohoanga maolunga ga hagamodu ai muna o denga aamuli o Israel e dinoangahulu ma dogolua.

De tala a Iesu de hagadee iloo a Peter ia

³¹ “Simon, Simon, Satan e lodo mmao e nonu goe bei dagodo o denga grain.

³² Gai au gu dalodalo i de goe gi dee helui ai doo gai. Aagai de masavaa naa huu oou e ahe mai ai, gai koe ga hagammahi ange oo daina.”

³³ Gai Peter ga hai ange gi de ia, “Tagi Maolunga, au gu baba ange donu e hano gi lo te hale pono ma de magau madali goe!”

³⁴ Iesu ne hai ange gi de ia, “Peter, au e hai adu gi de goe, i mua de goo o de gaagoo daane ailaa nei, gai koe e hagadee iloo naa donu au i e dolu hanonga.”

Mee hhao sseene ma beagi, aama gadilaasa

³⁵ Iesu ne ssili ange hogi gi ana dangada agoago, “De masavaa aagu ne hai ai laa goodou gi hulo gai goodou tee kave oodou mee hhao sseene, aabe ni beagi, aabe ni mee vae, gai goodou ne duasala laa i dahi mee be teai?” Gilaadeu ne hai ange gi de ia, “Teai.”

³⁶ Ia ne hai ange gi gilaadeu, “Aagai iainei, noo tangada e dahi ana mee hhao sseene gai ia gi gaavee, e bei ai hogi dana beagi hhao goloa. Gai tangada e deai sana gadilaasa, gi hagao ina gi daha dono malo laa daha ga hagao ai dahi gadilaasa.

³⁷ Au e hai adu gi goodou, muna a de Beebaa Dabu nei e hagassula donu i ogu daha: ‘Ia gu dau madali de gau haisala.’ Gai mee gu sisi laa ma gu tala ai ogu dagodo e hagassula donu.”

³⁸ Aagai ana dangada agoago ga hai ange gi de ia, “Tagi Maolunga, aanei e lua gadilaasa!” Iesu ne hai ange gi gilaadeu, “Gu lava!”

Iesu e dalodalo i de Mounga o denga Olive

³⁹ Gai Iesu ne sao e hano gi de Mounga o denga Olive bei dana dahulinga i de laa tubua; gai ana dangada agoago ne hulo hogi madali ia.

⁴⁰ Gai ga dae huu ia gi de mommee laa, aagai ia ga hai ange gi ana dangada agoago, “Goodou dalodalo gi dee too ange ai goodou gi lo te hagatale.”

⁴¹ Aagai Iesu ga hano gee mai i olaadeu daha, agu made dono mmao e bei de mmao o de hadu a dahi e maga laa, aagai ia ga duuduli ga dalodalo,

⁴² ga hai ange, “Tamana, noo koe e lodo, gai gaavee gee de ubu nei mai i ogu daha. Aagai e dee go ogu lodo e hai, gai go oo lodo.”

⁴³ Gai dahi dangada de langi ga humai i de langi ga hagammahi ange ia.

⁴⁴ Gai ia ne dalodalo hagammahi i de daemaha mmao ono lodo, gai ono daadaa gu bei denga madaua dodo nnui gu too iho gi honga de gelegele.

⁴⁵ Gai ga lava huu ono dalodalo, gai ia ga ahe mai gi daho ana dangada agoago ga gidee, bolo gilaadeu gu sseni i hiidinga delaadeu hinangalosaa.

⁴⁶ Aagai ia ga hai ange gi gilaadeu, “Gu aha gu sseni ai naa goodou? Goodou hiihidi age dalodalo gi dee too ange ai goodou gi lo te hagatale.”

De boogia o Iesu

⁴⁷ De masavaa o Iesu e basa ai, gai gu tae mai hanu dangada soa, gai taane e hagaingoo ange laa go Judas, dahi i magavaa o tinoangahulu ma dogolua, ne dagina mai gilaadeu. Ia ne humai ga oso Iesu.

⁴⁸ Aagai Iesu ga hai ange gi de ia, “Judas, koe ga gaavange naa Tama a Tangada i dau oso ia?”

⁴⁹ Gai de masavaa huu a denga agoago a Iesu ne gide ai mee gu hai laa, gai gilaadeu ga ssili ange gi de ia, “Tagi Maolunga, ga hebagi gimaadeu i luu gadilaasa nei?”

⁵⁰ Gai dahi gilaadeu ga tuu gu doo talinga o tangada hai hegau o tangada haimeedabu maolunga.

⁵¹ Aagai Iesu ga hai ange, “Gu lava!” Gai ia ga poo ange talinga o taane laa ga hagaieiangi ia.

⁵² Iesu ne hai ange hogi gi de gau haimeedabu maolunga, ma de gau hagaloosi o de temple, aama denga dagi ne loomai laa e boogia ia, “Goodou e loomai naa ma denga gadilaasa ma laagau hebagi e hebagi ange gi dahi bei dagodo o tangada gaiaa ma de daa dangada.

⁵³ Laangi alodahi gai au ne noho madali goodou i lo te temple, gai goodou tee poo au. Aagai deenei doodou aoaa aama ssauaa o de gohu.”

De hagadee iloo a Peter Iesu

⁵⁴ Gai gilaadeu ga poo Iesu ga kave gi de hale o tangada haimeedabu maolunga. Gai Peter e daudali adu i ono dua i de mommee mmao.

⁵⁵ Gai gilaadeu ne haula dahi ahi i lo te buibui ga nnoho laa luu baasi, gai Peter ne hano hogi ga noho madali gilaadeu.

⁵⁶ Gai dahi gauligi hahine hai hegau ne gidee e ia Peter, i dono noho i de maalama o de ahi i kilaa. Gai ia ne haaina ia ga hagadaba, “Taane nei se daane hogi madali Iesu!”

⁵⁷ Aagai Peter ga hagadee iloo muna laa, ga hai ange, “De hine nei, au e dee iloo donu ia!”

⁵⁸ Muli mai ange gai dahi dangada ne gidee hogi ia, ga hai ange, “Koe se dangada donu hogi madali gilaadeu!” Aagai Peter ga hai ange, “Taane nei, e deai!”

⁵⁹ Dahi aoaa gi muli mai gai dahi dangada ange ne hai ange, “Ni muna abodonu, taane nei se daane donu hogi madali ia, go hiidinga ia se dangada Galilee hogi!”

⁶⁰ Aagai Peter ga hai ange, “Taane nei, au e dee iloo donu au mee e tala mai naa!” De masavaa o Peter e tala ai ana muna, gai gu goo de gaagoo daane.

⁶¹ Aagai Tagi Maolunga ga huli dua mai ga galo ange gi Peter, gai Peter gu manadua muna a Tagi Maolunga ne hai ange gi de ia, “I mua de goo o de gaagoo daane ailaa nei, gai koe e hagadee iloo naa ngau i e dolu hanonga.”

⁶² Gai Peter ga sao ga hano gu kona mmao dono dangi.

De doo ai mee ma de hagailiilia o Iesu

⁶³ Gai denga daane e hagaloosia laa Iesu ne doo ai mee ma de hagailiili ia.

⁶⁴ Gilaadeu ne nnoa hogi luoono mada gai ga ssili ange gi de ia, “Basa pelaabisi, daalaa mai be goai ne hagailia goe!”

⁶⁵ Gai ne lagolago ange alaadeu muna ne tala ga hagangadi mee ai ia.

Iesu i mada i mua o de hagabuulinga hagasaele

⁶⁶ Taiao age gai gu hagabuni denga dagi, madali de gau haimeedabu maolunga ma de gau sisi. Gai gilaadeu ne dagi ia ga kave gi mada i mua o de hagabuulinga hagasaele.

⁶⁷ Aagai gilaadeu ga hai ange gi de ia, “Noo go koe de Klisdo, gai koe daalaa mai.” Gai Iesu ga hai ange gi gilaadeu, “Noo au e tala adu gai goodou e dee hagadonusia;

⁶⁸ gai noo au e ssili adu dahi mee gi goodou, gai goodou e dee pasa mai hogi.

⁶⁹ Aagai dua iainei gai Tama a Tangada e noho naa i de baasi madau o de Maadua Mmahi laa.”

⁷⁰ Gai gilaadeu alodahi ne ssili ange, “Go koe Tama Daane a de Maadua?” Ia ne hai ange gi gilaadeu, “Goodou e hagataba bolo go au donu go ia.”

⁷¹ Gai gilaadeu ga hagataba, “Ni muna aha ange adaadeu e llodo e hagallongo? Gidaadeu gu langona donu ana muna gu tala!”